ຂປລ. ມື້ທີ 5 ຂອງການດໍາເນີນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີVII ໃນວັນທີ 11 ທັນວາ 2015 ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດພ້ອມບັນດາ ສສຊ ໄດ້ສືບຕໍ່ຮັບຟັງການລາຍງານກ່ຽວກັບ ໂຄງການດາວທຽມລາວ ແລະ ໂຄງການກໍ່ສ້າງທາງລົດໄຟ ລາວ-ຈີນ ເຊິ່ງເປັນໂຄງການໃຫຍ່ ແລະ ມີການລົງທຶນຂອງລັດຖະບານ.
ໃນໂອກາດດັ່ງນີ້, ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນໍາວຽກງານການຜະລິດ ແລະ ຈໍລະຈອນ ໄດ້ລາຍງານສະພາບການຈັດຕັ້ງປະຕິບັດໂຄງການດາວທຽມລາວ ແລະ ໂຄງການກໍ່ສ້າງທາງລົດໄຟ ແຕ່ຊາຍແດນລາວ-ຈີນ ຫາ ນະຄອນຫລວງວຽງຈັນວ່າ:ໂຄງການດາວທຽມລາວ ໃນຕໍາແໜ່ງ 128,5 ອົງສາຕາເວັນອອກ ເປັນໂຄງການທີ່ລັດຖະບານສ້າງຂຶ້ນ ໃນສະໄໝ ທ່ານ ຄໍາໄຕສີພັນດອນ ເປັນນາຍົກລັດຖະມົນຕີ ແລະ ໄດ້ສືບຕໍ່ປຶກສາຫາລືກັບລັດຖະບານຈີນ. ອີງຕາມການຕົກລົງລະຫວ່າງສອງຜູ້ນໍາຂັ້ນສູງ ຂອງສອງພັກ ແລະ ສອງລັດ ໂດຍໄດ້ສະເໜີກູ້ຢືມເງິນຈາກລັດຖະບານຈີນ ໃນປີ 2008 ຈາກນັ້ນ ລັດຖະບານລາວໄດ້ຍື່ນເອກະສານຂໍຈອງຕໍາແໜ່ງວົງໂຄຈອນຈາກສະຫະພາບໂທລະຄົມມະນາຄົມສາກົນ ໃນວັນທີ 13 ພຶດສະພາ 2008 ເຊິ່ງໂຄງການໄດ້ແບ່ງອອກເປັນສອງໄລຍະຄື:ໄລຍະທີ 1 ແມ່ນດໍາເນີນການທາງດ້ານເຕັກນິກຕ່າງໆ ຈົນຮອດການສົ່ງດາວທຽມເຂົ້າໃນຕໍາແໜ່ງວົງໂຄຈອນຈົນສໍາເລັດ; ສ່ວນໄລຍະທີ 1 ແມ່ນການບໍລິຫານລະບົບດາວທຽມ ເພື່ອໃຫ້ເກີດຜົນປະໂຫຍດທາງດ້ານເສດຖະກິດ-ສັງຄົມ ສະເພາະດາວທຽມລາວແຊດ 1 ຈະມີການທົດລອງລະບົບຕ່າງໆ ໃຫ້ສົມບູນແມ່ນຈະໃຊ້ເວລາປະມານ 2 ເດືອນ ຈຶ່ງສາມາດໃຫ້ບໍລິການຢ່າງຖາວອນ ແລະ ມີອາຍຸການນໍາໃຊ້ງານຕໍ່າສຸດ 15 ປີ ມີຊ່ອງສັນຍານ 22 ຊ່ອງ ແລະ ກວມເອົາ 15 ປະເທດອ້ອມຂ້າງ ເຊິ່ງຈະະຖືກນໍາໃຊ້ເຂົ້າໃນວຽກງານສື່ສານຂອງພາກລັດ ແລະສັງຄົມທົ່ວໄປ, ການໃຫ້ເຊົ່າຊ່ອງສັນຍານແກ່ຕ່າງປະເທດ, ການບໍລິການຜ່ານດາວທຽມ ວຽກງານສື່ສານໃນຊົນນະບົດ, ການບໍລິການໂທລະພາບຜ່ານດາວທຽມ, ນໍາໃຊ້ສໍາລັບການສຶກສາ ແລະ ການແພດທາງໄກ, ການສື່ສານໃນວຽກງານສຸກເສີນ ແລະ ວຽກງານຟື້ນຟູໄພພິບັດຕ່າງໆ.
ໂຄງການດັ່ງກ່າວ ໄດ້ມີການຮ່ວມທຶນ ລະຫວ່າງ ລັດຖະບານລາວ ກັບ ບັນດາບໍລິສັດຂອງ ສປ. ຈີນ ເຊິ່ງລັດຖະບານລາວ ຖືຫຸ້ນ 45%, ບໍລິສັດຈີນ (china Asia-pacific Mobile Telecommnications Satellite co.ltd (APMT) 35%, ບໍລິສັດ Space Star Technology co.Ltd (SSTC) 15% ແລະ ບໍລິສັດ Asia-Pacific Satellite Technology (APST) 5% ປັດຈຸບັນ ຜູ້ຮ່ວມທຶນກໍາລັງກະກຽມສ້າງຕັ້ງບໍລິສັດຮ່ວມທຶນ ເພື່ອບໍລິຫານໂຄງການໃຫ້ມີຜົນປະໂຫຍດທາງດ້ານທຸລະກິດ ໃຫ້ສໍາເລັດໃນທ້າຍປີ 2015 ແລະ ໃຫ້ສາມາດດໍາເນີນທຸລະກິດໃນເດືອນມັງກອນ 2016 ຕາມແຜນການ, ບໍລິສັດຮ່ວມທຶນຈະສາມາດສ້າງຜົນກໍາໄລ ເພື່ອທົດແທນເງິນກູ້ ແລະ ເຫລືອໄວ້ສໍາລັບສືບຕໍ່ໂຄງການພາຍຫລັງໝົດອາຍຸນໍາໃຊ້ຂອງດາວທຽມດວງທໍາອິດ
ທ່ານຮອງນາຍົກລັດຖະມົນຕີກ່າວຕື່ມວ່າ: ສໍາລັບໂຄງການກໍ່ສ້າງທາງລົດໄຟ ລາວ-ຈີນ ມີຄວາມຍາວທັງໝົດປະມານ 427,2 ກິໂລແມັດ ນັບແຕ່ ຊາຍແດນຈີນ-ລາວ ມາເຖິງນະຄອນຫລວງວຽງຈັນ ຈົນຮອດຈຸດຂົວເຊື່ອມຕໍ່ລົດໄຟ ລາວ-ໄທ ແຫ່ງໃໝ່, ຄວາມກວ້າງຂອງລາງແມ່ນມາດຕະຖານສາກົນຄື: 1.435 ມມ, ເປັນປະເພດລາງດ່ຽວ, ຄວາມໄວອອກແບບສໍາລັບຂົນສົ່ງໂດຍສານແມ່ນ 160 ກມ/ຊມ ແລະ ໄດ້ອອກແບບສໍາຮອງ ເພື່ອໄວ້ 200 ກມ/ຊມ ໃນເຂດທົ່ງພຽງ ຄືຊ່ວງຕອນທາງແຕ່ເມືອງວັງວຽງ ແຂວງວຽງຈັນ ຫາ ນະຄອນຫລວງວຽງຈັນ; ຄວາມໄວອອກແບບສໍາລັບລົດໄຟຂົນສົ່ງສິນຄ້າແມ່ນ 120 ກມ/ຊມ, ລະບົບຂັບເຄື່ອນດ້ວຍໄຟຟ້າ, ຂະໜາດຮັບນໍ້າໜັກລວມຂະບວນຕູ້ລົດໄຟແມ່ນ 3.000 ໂຕນ; ມີສະຖານີ ທັງໝົດ 33 ແຫ່ງ ໃນນີ້ມີສະຖານີສໍາລັບຫລີກລົດໄຟ 21 ແຫ່ງ, ສະຖານີໂດຍສານ 11 ແຫ່ງ ແລະ ສະຖານີສິນຄ້າ 1 ແຫ່ງ. ສໍາລັບ ໜ້າວຽກກໍ່ສ້າງຕົ້ນຕໍ່ມີຄື: ກໍ່ສ້າງຊັ້ນຍົກລະດັບທາງລວງຍາວ 175 ກມ ກວມເອົາ 41% ຂອງລວງຍາວທັງໝົດ, ກໍ່ສ້າງຂົວ 170 ແຫ່ງລວງຍາວ 69 ກມ, ກວມເອົາ 16% ແລະ ທໍ່ລະບາຍນໍ້າ 567 ແທ່ງ,ລວງຍາວ 21 ກມ ແລະ ກໍ່ສ້າງອູບມຸງ 72 ແຫ່ງລວງຍາວ 183 ກມ ກວມເອົາ 43% ຂອງລວງຍາວທັງໝົດໃນນີ້ອູບມຸງທີ່ມີ ຄວາມຍາວເກີນ 7 ກມ ມີ 7 ແຫ່ງ, ອູບມຸງທີ່ຍາວກວ່າໝູ່ແມ່ນ 9,5 ກມ. ກ່ຽວກັບການກໍານົດຂອບເຂດ ການນໍາໃຊ້ເນື້ອທີ່ດິນທັງໝົດຂອງໂຄງການມີ 2 ປະເພດຄື: ນໍາໃຊ້ຖາວອນສໍາລັບແລວທາງລົດໄຟ ແລະ ສະຖານີ 3.058 ເຮັກຕາ ແລະ ນໍາໃຊ້ສໍາລັບບໍ່ດິນ, ບໍ່ຫີນ ແລະ ສະຖານທີ່ຮັບໃຊ້ໃນເວລາກໍ່ສ້າງລວມມີ803 ເຮັກຕາ. ຂອບເຂດແລວທາງລົດໄຟເບື້ອງລະ 50 ແມັດ ຈາກໃຈກາງທາງລົດໄຟ, ຄາດຄະເນມູນຄ່າການລົງທຶນທັງໝົດຂອງໂຄງການ ປະມານ 38,7 ຕື້ຢວນ, ເຊິ່ງຄິດສະເລ່ຍມູນຄ່າ ຕໍ່ກິໂລແມັດແມ່ນ 90,6 ລ້ານຢວນ,ຈະໃຊ້ເວລາກໍ່ສ້າງ 5 ປີຈື່ງສໍາເລັດ.
ແຫ່ລງຂ່າວ
