ເພື່ອເຮັດໃຫ້ເຂດພິເສດໄຊສົມບູນໃນເມື່ອກ່ອນ ກໍ່ຄືເມືອງຮົ່ມ ແລະ ເມືອງໄຊສົມບູນໃນປັດຈຸບັນ ໄດ້ຮັບການພັດທະນາຄືກັບແຂວງອື່ນໆນັ້ນ ພັກ ແລະ ລັດຖະບານເຮົາ ຈຶ່ງໄດ້ເຫັນດີຕົກລົງໃຫ້ສ້າງຕັ້ງເປັນແຂວງໄຊສົມບູນ ຊຶ່ງເປັນແຂວງໃໝ່ຂອງ ສປປ ລາວ ໂດຍສະພາແຫ່ງຊາດໄດ້ຮັບຮອງເອົາ ຢູ່ໃນກອງປະຊຸມສະໄໝສາມັນເທື່ອທີ່ 6 ຂອງສະພາແຫ່ງຊາດ ຊຸດທີ 7 ທີ່ໄດ້ຈັດຂຶ້ນລະຫວ່າງວັນທີ 9-27 ທັນວາ 2013 ຜ່ານມານີ້ ຖືວ່າມາຮອດປັດຈຸບັນນີ້ ທົ່ວປະເທດເຮົາມີ 1 ນະຄອນຫຼວງ ແລະ ມີ 17 ແຂວງ ລວມທັງໝົດແມ່ນມີ 18 ເຂດປົກຄອງທ້ອງຖິ່ນ ແຂວງໄຊສົມບູນ ເຄີຍເປັນເຂດພິເສດໄຊສົມບູນ ເມື່ອປີ 2006 ຄືນຫຼັງ ແລະ ພາຍຫຼັງທີ່ໄດ້ລົບລ້າງເປັນເຂດພິເສດແລ້ວ ນັບແຕ່ນັ້ນ ມາບັນດາເມືອງກໍ່ໄດ້ມອບໂອນໃຫ້ແຂວງວຽງຈັນ ແລະ ແຂວງຊຽງຂວາງປົກຄອງ ສືບຕໍ່ພັດທະນາ.
ພື້ນທີ່ການປົກຄອງແຂວງທີ່ສ້າງຂຶ້ນໃໝ່ນີ້ ແມ່ນປະກອບດ້ວຍພື້ນທີ່ຂອງເມືອງຮົ່ມ ແລະ ເມືອງໄຊສົມບູນ ແຂວງວຽງຈັນ ກັບເມືອງທ່າໂທມ ແຂວງວຽງຈັນ ເຊິ່ງເຄີຍຂຶ້ນກັບເຂດພິເສດໄຊສົມບູນໃນເມື່ອກ່ອນ ແຕ່ໃນນີ້ໄດ້ແຍກເມືອງຮົ່ມອອກເປັນສອງເມືອງຄື: ເມືອງລ້ອງຊານ ແລະ ເມືອງຮົ່ມ ພ້ອມນີ້ຍັງໄດ້ແຍກ ແລະ ປ່ຽນຊື່ເມືອງໄຊສົມບູນເປັນ 2 ເມືອງຄື: ເມືອງອະນຸວົງ ແລະ ເມືອງລອງແຈ້ງ ພ້ອມທັງມອບໂອນເມືອງທ່າໂທມຈາກແຂວງຊຽງຂວາງ ມອບໂອນກຸ່ມບ້ານໂພນພະ ກຸ່ມເມືອງພູນເກົ່າຈາກ ເມືອງວັງວຽງ ແຂວງວຽງຈັນ ມາຂຶ້ນກັບແຂວງໃໝ່ຕື່ມອີກ ຖືວ່າແຂວງໄຊສົມບູນນີ້ ປະກອບມີ 5 ເມືອງ ມີພົນລະເມືອງທັງໝົດ 81.801 ຄົນ.
ພິທີປະກາດສ້າງຕັ້ງແຂວງໄຊສົມບູນໃໝ່ຢ່າງເປັນທາງການ ໄດ້ຈັດຂຶ້ນວັນທີ 31 ທັນວາ 2013 ຜ່ານມານີ້ ພ້ອມທັງແຕ່ງຕັ້ງຄະນະບໍລິຫານງານແຂວງ ໂດຍແຕ່ງຕັ້ງທ່ານ ດຣ. ສົມບັດ ເຢຍລີເຮີ ອະດີດເຈົ້າຄອງນະຄອນຫຼວງວຽງຈັນ ຮອງຫົວໜ້າຫ້ອງວ່າການສູນກາງພັກ ເປັນເລຂາພັກແຂວງ ທັງເປັນເຈົ້າແຂວງໄຊສົມບູນ ທ່ານ ພອຍຄຳ ຮຸ່ງບຸນຍວງ ອະດີດເຈົ້າເມືອງຈັນທະບູລີ ນະຄອນຫຼວງວຽງຈັນ ແລະ ທ່ານ ລາວປ່າວຊົງ ນະວົງໄຊ ເປັນຮອງເຈົ້າແຂວງໄຊສົມບູນ ຊຶ່ງເຂົ້າຮ່ວມພິທີດັ່ງກ່າວມີທ່ານ ທອງສິງ ທຳມະວົງ ນາຍົກລັດຖະມົນຕີ ພ້ອມດ້ວຍການນຳພັກ-ລັດອຳນາດການປົກຄອງທ້ອງຖິ່ນ ແລະ ພະນັກງານບຳນານ ພະນັກງານ-ລັດຖະກອນ ຕະຫຼອດຮອດພໍ່ແມ່ປະຊາຊົນ.
ໂອກາດດັ່ງກ່າວນີ້ ທ່ານນາຍົກລັດຖະມົນຕີຕາງໜ້າໃຫ້ພັກ-ລັດຖະບານ ກໍ່ໄດ້ໃຫ້ທິດຊີ້ນຳ ໂດຍໄດ້ເນັ້ນໃຫ້ຄະນະບໍລິຫານງານແຂວງໄຊສົມບູນ ທີ່ເປັນແຂວງສ້າງຕັ້ງໃໝ່ ຕ້ອງເຊີດຊູຄວາມຮັບຜິດຊອບການເມືອງຂອງຕົນໃຫ້ສູງ ເຮັດທຸກສິ່ງທຸກຢ່າງເພື່ອເຮັດໃຫ້ສຳເລັດໜ້າທີ່ວຽກງານຂອງຕົນ ຕາມການມອບໝາຍຂອງຂັ້ນເທິງ ເປັນຕົ້ນແມ່ນນຳພາພະນັກງານ ທະຫານ ຕຳຫຼວດ ພໍ່ແມ່ປະຊາຊົນ ແລະ ຊັ້ນຄົນຕ່າງໆໃນເຂດປົກຄອງຂອງຕົນ ສ້າງສາພັດທະນາໃຫ້ຈະເລີນຮຸ່ງເຮືອງສີວິໄລ ພື້ນຖານໂຄງລ່າງໄດ້ຮັບການປັບປຸງ ແລະ ກໍ່ສ້າງ ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍ ການໄປມາມີຄວາມສະດວກສະບາຍ ອີກອັນໜຶ່ງ ໜ້າທີ່ອັນຮີບດ່ວນກໍ່ແມ່ນຄົ້ນຄວ້າ ແລະ ວາງລະບຽບແບບແຜນວິທີເຮັດວຽກຂອງຄະນະບໍລິຫານງານ ເຮັດວຽກຕ້ອງມີແບບແຜນ ມີໂຄງການ ມີການມອບຄວາມຮັບຜິດຊອບໃຫ້ກັນ ແລະ ກັນຢ່າງລະອຽດຈະແຈ້ງ ປັບປຸງກົງຈັກການຈັດຕັ້ງແຕ່ລະຂັ້ນອ້ອມຂ້າງແຂວງໃຫ້ຖືກຕ້ອງ ແລະ ສອດຄ່ອງກັບສະພາບຕົວຈິງ ເພື່ອເຮັດວຽກໃຫ້ສະດວກ ມີຜົນສຳເລັດ ແລະ ສືບຕໍ່ປະຕິບັດວຽກງານຫັນລົງກໍ່ສ້າງຮາກຖານການເມືອງ ຕາມທິດ 3 ສ້າງໃຫ້ບັນລຸຜົນສຳເລັດເປັນກ້າວໆ
ທີ່ມາ http://www.vientianemai.net/teen/khao/1/10910