ທ່ານ ວັນຄຳ ວໍຣະວົງ ຜູ້ອຳນວຍການໃຫຍ່ຕະຫຼາດຫຼັກຊັບລາວ (ຕລຊລ) ໄດ້ຖະແຫຼງຜົນແຫ່ງການ ເຄື່ອນໄຫວວຽກງານໃນໜຶ່ງປີ (2015) ຜ່ານ ມາຊຶ່ງໄດ້ ຈັດຂຶ້ນທີ່ອາຄານ ຕລຊລ ໃນ ວັນທີ 7 ທັນວາ ໂດຍທ່ານ ໄດ້ກ່າວວ່າ: ຕລຊລ ໄດ້ສຸມ ໃສ່ການພັດທະນາປັບປຸງ ກົນໄກການແລກປ່ຽນຊື້-ຂາຍ ຫຼັກ ຊາບຢ່າງຕໍ່ເນື່ອງ ເພື່ອເອື້ອອຳນວຍຄວາມສະດວກໃຫ້ບັນດານັກລົງທຶນທັງພາຍໃນ ແລະ ຕ່າງປະເທດ ໃນການແລກປ່ຽນຊື້ – ຂາຍຫຼັກຊັບ ພາຍຫຼັງ ຕລຊລ ໄດ້ສຳເລັດການຍົກລະດັບກົນໄກການແລກປ່ຽນຊື້ – ຂາຍ ຫຼັກຊັບຈາກຮູບແບບການຈັບຄູ່ເປັນໄລຍະເວລາມາເປັນການຈັບ ຄູ່ແບບ ຕໍ່ເນື່ອງ ວິນາທີຕໍ່ວິນາທີ, ຄຽງຄູ່ກັບການເພີ່ມຂອບເຂດເວລາລາຍວັນຈາກ + 5% ມາເປັນ + 10% ແລະ ເພີ່ມຈຳນວນຫຼັກຊັບ (ຮຸ້ນສາມັນ) ຕົວທີ 4 ກໍຄືການເຂົ້າຈົດທະບຽນຂອງບໍລິສັດປີໂຕຣລຽມເທຣດດິ້ງລາວ ມະຫາຊົນ (ປທລ) ໃນທ້າຍປີ 2014.
ໃນປີ 2015 ຕລຊລ ຍັງສືບຕໍ່ພັດທະນາລະບົບຄຸ້ມຄອງ ທຸລະກິດດູແລຊັບສິນ ແລະ ລະບົບການແລກປ່ຽນຊື້-ຂາຍ ພັນທະບັດ ຄາດວ່າຈະສຳເລັດ ແລະ ເປີດນຳໃຊ້ໄດ້ໃນຕົ້ນປີ ໜ້າ ເພື່ອເປັນການສົ່ງເສີມນັກລົງທຶນເຂົ້າມາມີສ່ວນຮ່ວມໃນ ຕລຊລ ໃຫ້ຫຼາຍຂຶ້ນ ໂດຍການຫຼຸຸດຕົ້ນທຶນໃນການແລກປ່ຽນ ຊື້-ຂາຍຮຸ້ນ, ຕລຊລ ຮ່ວມກັບສຳນັກງານຄະນະກຳມະການ ຄຸ້ມຄອງຫຼັກຊັບ ແລະ ບັນດາບໍລິສັດຫຼັກຊັບ ໄດ້ຫຼຸຸດອັດຕາຄ່າ ທຳນຽມແລກປ່ຽນຊື້-ຂາຍຮຸ້ນລົງ 0,2% ເຮັດໃຫ້ອັດຕາຄ່າ ທຳນຽມໃນການຊື້ ແລະ ຂາຍເຫຼືອພຽງ 0,7% ແລະ 1,0% ຕາມລຳດັບ. ນອກນັ້ນ ຍັງສ້າງເວັບໄຊ ເປີດເຜີຍ ຂໍ້ມູນຂອງບໍລິສັດຈົດທະບຽນ ເພື່ອຊ່ວຍໃຫ້ນັກລົງທຶນສາມາດເຂົ້າເຖິງຂໍ້ ມູນ ຂອງບໍລິສັດຈົດທະບຽນໄດ້ຢ່າງທັນການ ແລະ ມີຄວາມສະ ດວກ ສະບາຍຫຼາຍຂຶ້ນ. ພ້ອມດຽວກັນນັ້ນ ຕລຊລ ຍັງເອົາໃຈ ໃສ່ສົ່ງເສີມຄວາມຮູ້ ທາງດ້ານຕະຫຼາດທຶນ ໃຫ້ແກ່ສັງຄົມ ໂດຍ ໄດ້ສຳເລັດການຈັດການຝຶກ ອົບຮົມຫຼັກສູດ Program-La.PIB I ລຸ້ນທີ 3, Lao.PIB ລຸ້ນກິຕິມະສັກ, ຮ່ວມມືກັບບັນດາບໍລິສັດ ຫຼັກຊັບ ແລະ ບໍລິສັດຈົດທະບຽນຈັດຕັ້ງໂຄງ ການສົ່ງເສີມ ຄວາມຮູ້ກ່ຽວກັບຕະຫຼາດທຶນ ໃຫ້ແກ່ສັງຄົມ.
ປະຈຸບັນ ຕລຊລ ຢູ່ໃນໄລຍະກະກຽມການອະນຸຍາດໃຫ້ ນັກລົງທຶນປະເພດສະຖາບັນ ທີ່ເປັນລູກຄ້າຂອງທະນາຄານ ດູແລຊັບສິນ ສາມາດສົ່ງຄຳສັ່ງ ຊື້ຫຼັກຊັບໂດ້ ໂດຍບໍ່ຈຳເປັນ ຕ້ອງມີຄວາມພຽບພ້ອມຂອງເງິນຝາກໃນຈຳນວນ 100% ໃນ ວັນແລກປ່ຽນຊື້-ຂາຍ ຫຼື T+0 ຊຶ່ງເຊື່ອວ່າຈະເປັນການ ດຶງດູດ ການລົງທຶນຈາກສະຖາບັນຕ່າງປະເທດໃນ ຕລຊລ ຫຼາຍຂຶ້ນ ແລະ ໃນວັນທີ 11 ທັນວາ 2015 ທີ່ຈະມາເຖິງນີ້ ຕລຊລ ກໍຈະ ໄດ້ຕ້ອນຮັບການ ເຂົ້າຈົດທະບຽນຂອງບໍລິສັດ ສຸວັນນີໂຮມເຊັນເຕີມະຫາຊົນ ທີ່ຈະເປັນຮຸ້ນຕົວທີ 5 ໃນຕະຫຼາດຊຶ່ງເຊື່ອ ວ່າຈະໄດ້ຮັບຄວາມສົນໃຈຈາກນັກລົງທຶນທັງ ພາຍໃນ ແລະ ຕ່າງປະເທດເປັນຢ່າງດີ.
ສຳລັບແຜນການດຳເນີນງານໃນປີ 2016, ຕລຊລ ຈະ ໄດ້ມີການປັບຫົວໜ່ວຍ ການແລກປ່ຽນຊື້-ຂາຍຕໍ່າສຸດຈາກ 1 ຮຸ້ນຂຶ້ນເປັນ 100 ຮຸ້ນ ຊຶ່ງຈະມີຜົນບັງຄັບໃຊ້ ນັບແຕ່ວັນທີ 11/1/2016 ເປັນຕົ້ນໄປ, ສືບຕໍ່ສ້າງເງື່ອນໄຂຊຸກຍູ້ໃຫ້ມີການ ບໍລິການທຸລະກິດດູແລຊັບສິນທີ່ໄດ້ມາດຕະຖານ ສາກົນ, ສືບຕໍ່ພັດທະນາຕະຫຼາດຮຸ້ນກູ້ ແລະ ພັນທະບັດ, ພັດທະນາລະບົບການແລກປ່ຽນຊື້-ຂາຍລາຍໃຫຍ່ ແລະ ເວັບໄຊເພື່ອອຳນວຍຄວາມ ສະດວກໃຊ້ສິດເຂົ້າຮ່ວມ ກອງປະຊຸມຜູ້ຖືຮຸ້ນໃຫ້ ແກ່ນັກລົງທຶນໃຫ້ສຳເລັດ ແລະ ສາມາດນຳໃຊ້ໄດ້ ພາຍໃນໄຕ ມາດ 2 ຂອງປີ 2016, ບໍ່ພຽງແຕ່ເທົ່າ ນັ້ນດ້ານການພົວພັນສາ ກົນ ຕລຊລ ຍັງມີແຜນຈະເຊັນບົດບັນທຶກຄວາມເຂົ້າໃຈຮ່ວມ ກັບຕະຫຼາດຫຼັກຊັບເຊິນເຈິ້ນ ແລະ ຕະຫຼາດຫຼັກຊັບກຳປູເຈຍ ພາຍໃນປີ 2016 ອີກດ້ວຍ. ນອກຈາກນັ້ນ ຕລຊລ ຍັງຄາດ ໄວ້ວ່າຈະມີບໍລິສັດຈົດທະບຽນໃໝ່ ເພີ່ມຂຶ້ນອີກຢ່າງໜ້ອຍ 2 ບໍລິສັດພາຍໃນປີ 2016 ນີ້ ແລະ ຄາດວ່າຈະມີບໍລິສັດຈົດ ທະບຽນເພີ່ມຂຶ້ນເປັນ 25-35 ບໍລິສັດພາຍໃນປີ 2020.
ດັ່ງນັ້ນ ສາມາດເວົ້າໄດ້ວ່າ ພາຍໃນຊຸມປີຕໍ່ໜ້າ ຍັງມີສິ່ງ ທ້າທາຍ ແລະ ວຽກງານຫຼາຍໆດ້ານທີ່ ຕລຊລ ຕ້ອງໄດ້ສືບຕໍ່ ຈັດຕັ້ງປະຕິບັດ ເພື່ອຜົນປະ ໂຫຍດອັນສູງສຸດຂອງນັກລົງທຶນ ແລະ ຫົວໜ່ວຍທຸລະກິດຕ່າງໆ ກໍຄືປະກອບສ່ວນເຂົ້າໃນການ ພັດທະນາເສດຖະກິດຂອງປະເທດ ໃຫ້ມີຄວາມ ຮຸ່ງເຮືອງສີວິໄລ. ດັ່ງນັ້ນ ຕລຊລ ຈະເອົາໃຈໃສ່ທຸ້ມເທທຸກໆເງື່ອນໄຂເຂົ້າໃນການພັດທະນາວຽກງານຕະຫຼາດທຶນຂອງລາວໃຫ້ມີຄວາມກ້າວໜ້າທຽບ ເທົ່າກັບສາກົນ ກາຍເປັນແຫຼ່ງລະດົມທຶນ ແລະ   ບ່ອນລົງທຶນທີ່ມີປະສິດທິຜົນສູງສຸດໃຫ້ແກ່ສັງຄົມລາວ.
ມາຮອດນີ້ ການແຈ້ງຂ່າວກ່ຽວກັບວຽກງານການສ້າງສະພາບຄ່ອງໃຫ້ແກ່ ຕລຊລ ໃນປີ 2015 ແລະ ແຜນການໃນການພັດທະນາກົນໄກການ ແລກປ່ຽນຊື້-ຂາຍຮຸ້ນ ເພື່ອເພີ່ມ ສະພາບຄ່ອງໃຫ້ແກ່ ຕລຊລ ໃນປີ 2016 ກໍຖືວ່າສິ້ນສຸດ.

ແຫ່ລງຂ່າວ