ຂປລ.ເມື່ອເດືອນ ພະຈິກ 2015 ຜ່ານມານີ້ ຢູ່ທີ່ເມືອງລະມາມ ແຂວງເຊກອງ, ໄດ້ມີພິທີມອບ-ຮັບ ນ້ຳບາດານຊຸມຊົນ ແຈກທໍ່ໃຫ້ປະຊາຊົນແບບມີສ່ວນຮ່ວມ ຂຶ້ນທີ່ໂຮງຮຽປະຖົມສົມບູນ ບ້ານຫ້ວຍ-ອາວັງຊ້າງ, ໂດຍການເຂົ້າຮ່ວມຂອງ ທ່ານ ດຣ.ບຸນມາ ໄຊຍະສຸກ, ຫົວໜ້າກອງສົ່ງເສີມສຸຂະພາບຊຸມຊົນອົງການກາແດງລາວ, ທ່ານ ອີຣິກວາຍເຊິນຈາກຄະນະກຳມະການກາແດງສາກົນ ປະຈຳລາວ, ທ່ານ ໜູລາ ຢາປາລອງຮັງ ຫົວໜ້າກາແດງແຂວງ, ພະນັກງານວິຊາການນ້ຳສະອາດແຂວງ, ພ້ອມດ້ວຍອຳນາດການປົກຄອງ ແລະ ພໍ່ແມ່ປະຊາຊົນເຂົ້າຮ່ວມ.
ໃນພິທີດັ່ງກ່າວ, ທ່ານ ໂສວັດ ແສນທະວີສຸກ ຫົວໜ້າຂະແໜງບໍລິຫານກາແດງ ແຂວງເຊກອງ ກ່າວວ່າ: ໂຄງການດັ່ງກ່າວ ໄດ້ເລີ່ມການເກັບກຳຂໍ້ມູນພື້ນຖານ, ຄິດໄລ່ອອກແບບ, ເຈາະນ້ຳບາດານ, ສ້າງອ່າງເກັບນ້ຳຂະໜາດ 6 ແມັດກ້ອນ, ຕິດຕັ້ງໂປມໄຟຟ້າ, ລະບົບທໍ່ ແລະ ກົງເຕີ ເພື່ອເປັນບ່ອນແຈກນ້ຳໄປສູ່ແຕ່ລະຄອບຄົວ, ໂດຍໄດ້ສົມທົບກັບພາກສ່ວນຮັບຜິດຊອບນ້ຳສະອາດ ແຂວງ. ລວມມູນຄ່າໃນການກໍ່ສ້າງທັງໝົດປະມານ 415 ລ້ານກີບ, ໂດຍໄດ້ຮັບການຊ່ວຍເຫລືອ ຈາກຄະນະກຳມະການກາແດງສາກົນ 346.217.000 ກີບ ແລະ ທຶນສົມທົບຂອງປະຊາຊົນຈຳນວນໜຶ່ງ, ນອກນັ້ນຍັງໄດ້ສ້າງນ້ຳບາດານ ແບບປ້ຳມື 2 ບໍ່, ໂດຍໄດ້ຮັບການຊ່ວຍເຫລືອລ້າ ໃຫ້ແກ່ປະຊາຊົນຜູ້ທີ່ທຸກຍາກຂາດເຂີນ ແລະ ໄດ້ຮັບຜົນກະທົບຈາກລະເບີດທີ່ບໍ່ທັນແຕກ.
ໃນເດືອນດຽວກັນນີ້, ອົງການກາແດງລາວ ໄດ້ສົມທົບ ກັບກາແດງ ແຂວງ ແລະ ຫ້ອງວ່າການປົກຄອງເມືອງ ເພື່ອມອບ-ຮັບ ນ້ຳບາດານ ແບບແຈກທໍ່ໃຫ້ແກ່ບ້ານພູໂຮມ, ເມືອງ ພູວົງ ແຂວງ ອັດຕະປື, ໂດຍການເຂົ້າຮ່ວມຂອງທ່ານນາງ ພວງສິດ ໄຊສົງຄາມ ຄະນະປະຈຳພັກເມືອງ ຮອງເຈົ້າເມືອງໆ ພູວົງ, ຜູ້ຊີ້ນຳຂົງເຂດວັດທະນະທຳ-ສັງຄົມ, ທ່ານດຣ.ບຸນມາ ໄຊຍະສຸກ ຫົວໜ້າກອງສົ່ງເສີມສຸຂະພາບຊຸມຊົນອົງການກາແດງລາວ, ທ່ານ ອີຣິກວາຍເຊິນ ຈາກຄະນະກຳມະການກາແດງສາກົນ ປະຈຳລາວ ແລະ ທ່ານ ດຣ.ວຽງໄຊ ໄຊສົມບັດ ຫົວໜ້າກາແດງແຂວງ ອັດຕະປື, ພ້ອມດ້ວຍອຳນາດການປົກຄອງ ແລະ ພໍ່ແມ່ປະຊາຊົນເຂົ້າຮ່ວມ.
ທ່ານ ດຣ.ວຽງໄຊ ໄຊສົມບັດ ກ່າວວ່າ: ໂຄງການດັ່ງກ່າວ ແມ່ນໄດ້ເລີ່ມຈັດຕັ້ງປະຕິບັດມາແຕ່ກາງເດືອນມີນາ 2015, ດຍໄດ້ສ້າງອ່າງເກັບນ້ຳຂະໜາດ 5 ແມັດກ້ອນ ເພື່ອເປັນບ່ອນແຈກນ້ຳ ໄປສູ່ແຕ່ລະຄອບຄົວ, ຈົນເຖິງກາງເດືອນ ພະຈິກ 2015 ຈຶ່ງສຳເລັດ, ເຊິ່ງໃຊ້ເວລາການກໍ່ສ້າງ 9 ເດືອນ, ລວມມູນຄ່າການກໍ່ສ້າງທັງໝົດ ປະມານ 423.601.325 ກີບ, ໂດຍໄດ້ຮັບທຶນການກໍ່ສ້າງ ຈາກຄະນະກຳມະການກາແດງສາກົນ 387.361.325 ກີບ, ທຶນແຮງງານສົມທົບຈາກປະຊາຊົນຄິດໄລ່ເປັນເງິນ ປະມານ 16.000.000 ກີບ ແລະ ທຶນສົມທົບຈາກອົງການກາແດງແຂວງ 6.500.000 ກີບ. ໂຄງການດັ່ງກ່າວ ໄດ້ເຮັດໃຫ້ປະຊາຊົນຈຳນວນ 135 ຄອບຄົວ, 837 ຄົນ, ສາມາດມີນ້ຳໃຊ້ທີ່ສະອາດຢ່າງພຽງພໍຕະຫລອດປີ.
ທັງນີ້, ກໍເພື່ອ ເປັນການເຮັດໃຫ້ນ້ອງນັກຮຽນ ກໍຄື ພໍ່ແມ່ປະຊາຊົນລາວບັນດາເຜົ່າ ໃຫ້ມີນ້ຳໃຊ້ທີ່ສະອາດ ແລະ ພຽງພໍຕໍ່ການຜະລິດ, ປູກຝັງ, ລ້ຽງສັດ ເຮັດໃຫ້ຊີວິດການເປັນຢູ່ຂອງປະຊາຊົນລາວບັນດາເຜົ່າ ນັບມື້ດີຍິ່ງຂຶ້ນ ແລະ ສາມາດຫລຸດພົ້ນອອກຈາກຄວາມທຸກຍາກ.
ແຫລ່ງຂ່າວ:
