ປັດຈຸບັນ ຜ້າໄໝມ້ອນຢູ່ບ້ານເຮົາ ພວມໄດ້ຮັບຄວາມນິຍົມຊົມຊອບຈາກຄົນລາວ ແລະ ຄົນຕ່າງປະເທດຢ່າງຫລວງຫລາຍ. ເປັນຜະລິດຕະພັນທີ່ເປັນເອກະລັກຂອງລາວ ເຊິ່ງໄດ້ສືບທອດມາຈາກປູ່ຍ່າຕາຍາຍ ຫລາຍເຊັ່ນຄົນແລ້ວ ແລະ ຕົກມາຮອດຍຸກປັດຈຸບັນ ນີ້ກໍຍັງສືບຕໍ່, ມີການປະຍຸກ ແລະ ພັດທະນາທາງດ້ານສີມື ໃນການຄວັດລວດລາຍ ໃຫ້ມີສີສັນສວຍງາມ ແລະມີຫລາຍຮູບແບບ ໄປຕາມຄ່ານິຍົມຂອງສັງຄົມມະນຸດ ທັງນີ້ກໍເພື່ອເປັນການເພີ່ມມູນຄ່າ ເຄື່ອງຫັດຖະກຳຜ້າໄໝມ້ອນ ໃຫ້ສູງເດັ່ນ ເຮັດໃຫ້ຜູ້ຄົນສົນໃຈ ແລະ ຫັນມາຊົມໃຊ້ຫລາຍຂຶ້ນ. ພ້ອມນີ້ ຢູ່ຫລາຍໆບ່ອນ ກໍໄດ້ມີການຈັດຕັ້ງ ກຸ່ມຫັດຖະກຳຕໍ່າຫູກ ໂດຍສະເພາະແມ່ນ ຫັດຖະກຳຜ້າໄໝມ້ອນ ແນໃສ່ໃຫ້ເປັນທຸລະກິດ ຢ່າງແທ້ຈິງ ຕິດພັນກັບການອະນຸລັກຮັກສາ.
ທ່ານ ນ. ຊ່ຽນ ມາຖາວອນ ປະທານສະມາຄົມຂອງກຸ່ມຫັດຖະກໍາຕໍ່າຜ້າໄໝມ້ອນບ້ານໂພໄຊ, ເມືອງຊຳເໜືອ, ແຂວງຫົວພັນ ໄດ້ເປີດເຜີຍວ່າ: “ຕົນເອງໄດ້ເລີ່ມຕົ້ນ ດຳເນີນທຸລະກິດຕໍ່າຜ້າໄໝມ້ອນມາແຕ່ປີ 2002 ປະກອບມີ 10 ກີ່ ແລະ ໄດ້ລົງທຶນຊື້ຟືມ, ໄໝ ແລະ ສີຍ້ອມ ແລ້ວຈ້າງປະຊາຊົນຢູ່ກັບບ້ານຕໍ່າ ເຊິ່ງນຳໃຊ້ທຶນທັງໝົດ 25-30 ລ້ານກີບ, ໂດຍມີລາຍຮັບ ຈາກການຈຳໜ່າຍ ຜະລິດຕະພັນຜ້າໄໝມ້ອນ ສະເລ່ຍປະມານ 80-90 ລ້ານກີບ/ປີ. ມາຮອດປັດຈຸບັນ, ຫັດຖະກຳຜ້າໄໝມອ້ນຂອງບ້ານໂພໄຊ, ເມືອງຊຳເໜືອ ກຳລັງໄດ້ຮັບຄວາມນິຍົມຊົມຊອບ ຈາກບັນດາລູກຄ້າທົ່ວໄປ ແລະ ຂາປະຈຳຫລາຍແຫ່ງ ຈຶ່ງໄດ້ຂະຫຍາຍທຸລະກິດອອກຕື່ມ ໂດຍໄດ້ເພີ່ມເປັນ 100 ກີ່, ສາມາດສ້າງລາຍຮັບ ໄດ້ປະມານ 100 ກວ່າລ້ານກີບ/ປີ”.
ທ່ານ ນ. ຊ່ຽນ ມາຖາວອນ ຍັງໃຫ້ຮູ້ຕື່ມອີກວ່າ: “ຜະລິດຕະພັນຈາກຜ້າໄໝມ້ອນນອກຈາກມີສິ້ນ ແລະ ຕີນສິ້ນແລ້ວ ຍັງໄດ້ຕໍ່າແຜ່ນແພສຳລັບຕັດເສື້ອ, ຜ້າປູໂຕະ, ຜ້າບ່ຽງ ແລະ ອື່ນໆຕາມທີ່ລູກຄ້າສັ່ງຈອງ. ຜ່ານມາກໍເຄີຍໄປວາງສະແດງ ຜະລິດຕະພັນໃນນາມສິນຄ້າ ODOP ມາແລ້ວຫລາຍງານ. ໃນອະນາຄົດ ຈະໄດ້ຝາກຝັງວຽກງານນີ້ ໄວ້ກັບລູກກັບຫລານ ເພື່ອໃຫ້ເຂົາເຈົ້າໄດ້ສືບຕໍ່ ແລະ ຮັກສາສີໄມ້ລາຍມື ທີ່ເປັນມູນມໍລະດົກສືບທອດ ມາແຕ່ບູຮານ ທັງປົກປັກຮັກສາ ເອກະລັກຂອງຊາດລາວ ໄວ້ໃຫ້ຢູ່ຄູ່ບ້ານຄູ່ເມືອງຕະຫລອດໄປ”.
ຂໍສະແດງຄວາມຍິນດີ ແລະ ຂໍຍ້ອງຍໍຊົມເຊີຍນໍ້າໃຈຂອງ ກຸ່ມຫັດຖະກໍາຜ້າໄໝມ້ອນບ້ານໂພໄຊ, ເມືອງຊຳເໜືອ ທີ່ສາມາດຮັກສາເອກະລັກ ຂອງລວດລາຍລາວເຮົາໄວ້ ເຊິ່ງເປັນມູນມໍລະດົກກົກຮາກ ຈາກປູ່ຍ່າຕາຍາຍພວກເຮົາແທ້ໆ ແລະ ຫວັງຢ່າງຍິ່ງວ່າ ຄົນລຸ້ນໃໝ່ ຈະຫວງແຫນ, ຮູ້ຮັກສາຊັບສົມບັດອັນລ້ຳຄ່າ ແລະ ເສີມຂະຫຍາຍໃຫ້ຢູ່ຄຽງຄູ່ຊາດລາວ, ຄົນລາວ ແລະ ເປັນທີ່ຮູ້ຈັກຂອງຄົນທົ່ວໂລກຕໍ່ໄປ.
ຂອບໃຈບົດຂ່າວຈາກ:
