ໂດຍສືບຕໍ່ປະຕິບັດຕາມທິດທາງນະໂຍບາຍຂອງພັກ ຄະນະພັກ ອົງການປົກຄອງນະຄອນຫຼວງວຽງຈັນ ໄດ້ຖືວຽກງານການສຶກສາເປັນວຽກງານທີ່ສຳຄັນ ແລະ ກຳນົດຄາດໝາຍສູ້ຊົນ ເຂົ້າໃນມະຕິກອງປະຊຸມໃຫຍ່ ຄັ້ງທີ VI ແລະ ແຜນພັດທະນາເສດຖະກິດ-ສັງຄົມ 2020 ປະຊາຊົນພົນລະເມືອງຕ້ອງມີລະດັບການສຶກສາຈົບຊັ້ນມັດທະຍົມປາຍ ແລະ ຮູ້ພາສາອັງກິດໃນລະດັບພື້ນຖານ.
ສະເພາະນະຄອນຫຼວງວຽງຈັນ ມີພົນລະເມືອງທັງໝົດ 823.605 ຄົນ ມີ 144.054 ຄອບຄົວ 481 ບ້ານ 9 ເມືອງ ອັດຕາການຮູ້ໜັງສືຂອງປະຊາກອນ ໃນເກນອາຍຸ 15 ປີ ຂຶ້ນໄປ ບັນລຸໄດ້ 99,99% ໄດ້ປະກາດຈົບຊັ້ນປະຖົມບຳລຸງໃນວັນທີ 16 ທັນວາ 2010 ເປັນແຂວງທຳອິດຂອງ ສປປ ລາວ ແລະ ໄດ້ສືບຕໍ່ຊຸກຍູ້ໃຫ້ອົງການປົກຄອງແຕ່ລະຂັ້ນ ຜູ້ບໍລິຫານການສຶກສາ ຄູ-ອາຈານ ແລະ ປະຊາຊົນໃນເກນອາຍຸ 15-35 ປີ ສືບຕໍ່ຮ່ຳຮຽນຈົບມັດທະຍົມຕອນຕົ້ນ ຕາມແຜນພັດທະນາເສດຖະກິດ-ສັງຄົມຂອງນະຄອນຫຼວງວາງອອກຄື: ປີ 2015 ພົນລະເມືອງໃນນະຄອນຫຼວງວຽງຈັນ ຕ້ອງມີລະດັບການສຶກສາຈົບຊັ້ນມັດທະຍົມຕົ້ນ.
ຍ້ອນການຮ່ວມແຮງຮ່ວມໃຈຂອງທຸກພາກສ່ວນ ເຫັນໄດ້ຄວາມສຳຄັນຂອງວຽກງານການສຶກສາ ໃຫ້ການປະກອບສ່ວນທາງເຫື່ອແຮງ ສະຕິປັນຍາ ອຸປະກອນຮັບໃຊ້ຕ່າງໆ ເຮັດໃຫ້ນະຄອນຫຼວງ ສາມາດບັນລຸຜົນໄດ້ຕາມຄາດໝາຍ ແລະ ປະກາດຈົບຊັ້ນມັດທະຍົມຕອນຕົ້ນທົ່ວນະຄອນຫຼວງຂຶ້ນ ເປັນແຂວງທີສາມຂອງປະເທດ ຮອງຈາກແຂວງຊຽງຂວາງ ແລະ ໄຊຍະບູລີ.
ພິທີຈັດຂຶ້ນໃນວັນທີ 30 ພະຈິກ 2015 ຢູ່ໂຮງແຮມດອນຈັນພາເລດ ໂດຍມີທ່ານ ພັນຄຳ ວິພາວັນ ຮອງນາຍົກລັດຖະມົນຕີ ລັດຖະມົນຕີວ່າການກະຊວງສຶກສາທິການ ແລະ ກີລາ ທ່ານ ດຣ. ສິນລະວົງ ຄຸດໄພທູນ ເຈົ້າຄອງນະຄອນຫຼວງ ພ້ອມດ້ວຍທ່ານຮອງເຈົ້າຄອງ ບັນດາທ່ານຫົວໜ້າກົມ ຮອງກົມ ເຈົ້າເມືອງ ຮອງເຈົ້າເມືອງ ພະແນກການ ອົງການຈັດຕັ້ງສາກົນ ທະຫານ ຕຳຫຼວດ ອົງການປົກຄອງ ພະນັກງານ ຄູ-ອາຈານ ແລະ ນັກຮຽນ-ນັກສຶກສາ ເຂົ້າຮ່ວມ.
ແຫ່ລງຂ່າວ
