ນັກວິໄຈປະເທດສະຫະລັດອາເມຣິກາໄດ້ທຳການເພາະລ້ຽງເນື້ອເຍື່ອເສັ້ນສຽງໃນຫ້ອງແລັບ ຊຶ່ງໃນມື້ໜຶ່ງມັນອາດຈະຊ່ວຍຟື້ນຟູສຽງຂອງຜູ້ຄົນນັບລ້ານທີ່ໄດ້ຮັບການທໍລະມານຈາກພະຍາດມະເຮັງຫລືພະຍາດອື່ນໆໄດ້
ສຳລັບໃນຕອນນີ້ ນັກວິໄຈຍັງຢູ່ໃນໄລຍະການທົດລອງເລີ່ມຕົ້ນ ຊຶ່ງອະທິບາຍໃນວາລະສານທາງວິຊາການລະດັບນານາຊາດ Science Translational Medicine ເນື້ອເຍື່ອທີ່ໄດ້ຈະມີອາຍຸການໃຊ້ງານເປັນເວລາສາມເດືອນໃນໜູທົດລອງທີ່ໄດ້ຮັບການຕັດແຕ່ງທາງວິສະວະກຳໃຫ້ມີລະບົບພູມຄຸ້ມກັນຄ້າຍກັບມະນຸດ ແລະສ້າງການສັ່ນຂອງສຽງໄດ້ເມື່ອມີການປູກຖ່າຍເຂົ້າໄປໃນບໍລິເວນກ່ອງສຽງທີ່ເຮັດວຽກໄດ້ເປັນປົກກະຕິຂອງໝາທີ່ເສຍຊີວິດແລ້ວ
ຜູ້ນຳການວິໄຈ Dr Nathan Welham ນັກພະຍາດວິທະຍາຈາກ University of Wisconsin at Madison ໄດ້ກ່າວວ່າ “ຄວາມກ້າວໜ້ານັ້ນເປັນສິ່ງສຳຄັນເພາະວ່າເສັ້ນສຽງນັ້ນເປັນລະບົບທີ່ງົດງາມແລະຍາກທີ່ຈະມີສິ່ງໃດມາທົດແທນມັນ”
“ເສັ້ນສຽງຂອງພວກເຮົາຖືກສ້າງຂຶ້ນຈາກເນື້ອເຍື່ອຊະນິດພິເສດທີ່ຕ້ອງມີຄວາມຍືດຫຍຸ່ນຫລາຍພໍໃຫ້ເກີດການສັ່ນ ແລະມີຄວາມແຂງແຮງຫລາຍພໍທີ່ຊົນເຂົ້ານຳກັນຫລາຍກວ່າ 100 ເທື່ອຕໍ່ວິນາທີ” Dr Welham ກ່າວ
ເນື້ອເຍື່ອຕັດແຕ່ງທາງຊີວະພາບຖືກລ້ຽງຂຶ້ນມາຫລາຍກວ່າສອງອາທິດ ໂດຍການໃຊ້ເຊລ໌ຂອງກຸ່ມສຽງທີ່ມີສຸກຂະພາບທີ່ດີຊຶ່ງຮູ້ຈັກກັນໃນນາມຂອງ fibroblast ແລະ epithelial cell
ເຊລ໌ນັ້ນຖືກແຍກອອກເປັນເຊລ໌ດ່ຽວແລະມີຄວາມບໍລິສຸດ ແລະນຳໄປລ້ຽງໄວ້ເທິງໂຄງສ້າງຮ່າງຂອງຄອນລາເຈນແບບສາມມິຕິ ຊຶ່ງມີຄວາມຄ້າຍຄຶງກັບທີ່ນັກວິທະຍາສາດທຳການລ້ຽງຜິວໜັງທຽມໃນຫ້ອງທົດລອງ
“ເມື່ອພວກມັນເຕີບໃຫ່ຍ ເຊລ໌ຈະຈັບຕົວລວມກັນເປັນຊັ້ນຊຶ່ງມີໂຄງສ້າງແລະໂປຣຕີນໃກ້ຄຽງກັນກັບກ້າມເນື້ອຂອງເສັ້ນສຽງໃນທຳມະຊາດ” ນັກວິທະຍາສາດລາຍງານໄວ້
ໃນການທີ່ຈະຮູ້ວ່າເນື້ອເຍື່ອຕັດແຕ່ງທາງຊີວະພາບເຮັດວຽກໄດ້ຫລືບໍ່ນັ້ນ ເນື້ອເຍື່ອເຫລົ່ານີ້ໄດ້ຖືກປູກຖ່າຍເຂົ້າໄປໃນກ່ອງສຽງທີ່ຖືກຕັດອອກມາຈາກໝາທີ່ເສຍຊີວິດແລ້ວ ເມື່ອຄວາມຊື້ນໃນອາກາດຖືກພັດຜ່ານເຂົ້າໄປ ເນື້ອເຍື່ອຈະສັ່ນແລະຜະລິດສຽງອອກມາໃນທິດທາງດຽວກັບທີ່ນັກວິທະຍາສາດໄດ້ຄາດການເອົາໄວ້
“ເນື້ອເຍື່ອນີ້ຍັງມີຄວາມຮູ້ສຶກຄ້າຍກັບເສັ້ນສຽງຕາມທຳມະຊາດອີກດ້ວຍ ແລະມີຄວາມຊື້ນ ຄວາມຍືດຫຍຸ່ນຄືກັບເສັ້ນສຽງແທ້ໆ” Dr Welham ກ່າວ
ໃນທີ່ສຸດ ເນື້ອເຍື່ອໄດ້ຖືກປູກຖ່າຍເຂົ້າໄປຍັງໜູທົດລອງທີ່ມີການຕັດແຕ່ງໃຫ້ມີລະບົບພູມຄຸ້ມກັນແບບດຽວກັບມະນຸດເພື່ອທີ່ຈະໄດ້ສຶກສາວ່າມັນສາມາດເຮັດວຽກໄດ້ຫລືບໍ່ໃນມະນຸດ ເນື້ອເຍື່ອນັ້ນຈະເລີນເຕີບໃຫ່ຍແລະບໍ່ໄດ້ຖືກຂັດຂວາງດ້ວຍລະບົບພູມຄຸ້ມກັນຂອງມະນຸດ ມັນເຮັດວຽກໄດ້ເປັນຢ່າງດີໂດຍບໍ່ໄດ້ສົນໃຈວ່າໜູທົດລອງນັ້ນມີລະບົບພູມຄຸ້ມກັນແບບໃດ