ຂປລ. ໃນວັນທີ 27 ພະຈິກ 2015 ທີ່ນະຄອນຫລວງວຽງຈັນ, ຖະແຫລງການຮ່ວມກ່ຽວກັບ ກອງປະຊຸມໂຕະມົນລະດັບສູງຄັ້ງທີ 12 ລະຫວ່າງ ສປປ ລາວ ແລະ ຄູ່ຮ່ວມພັດທະນາໄດ້ເຫັນດີເປັນເອກະພາບຮັບຮອງເອົາ 4 ບັນຫາໃຫຍ່ ຄື: ການຄຸ້ມຄອງເສດຖະກິດມະຫາພາກ ແລະ ການເຕີບໂຕແບບສົມສ່ວນ–ຍືນຍົງ: ເຫັນດີສະໜັບສະໜູນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ໂດຍເຊື່ອມສານເອົາບັນດາເປົ້າໝາຍພັດທະນາແບບຍືນຍົງ (SDGs) ພ້ອມຮັບປະກັນ ໃຫ້ແກ່ການແກ້ໄຂບາງຄາດໝາຍຄົງຄ້າງຂອງເປົ້າໝາຍ MDGs ທີ່ຍັງບໍ່ບັນລຸໄດ້, ຮັກສາການເຕີບໂຕຂອງ GDP ໃຫ້ມີຄວາມໝັ້ນທ່ຽງ ສົມສ່ວນຍືນຍົງມີຄຸນນະພາບ ແລະ ທິດສີຂຽວ, ປັບປຸງການສ້າງລາຍຮັບພາຍໃນ ໂດຍການປະຕິຮູບນະໂຍບາຍການເງິນ ແລະ ອາກອນເພື່ອສົ່ງເສີມການສ້າງລາຍຮັບ, ສ້າງຄວາມເຂັ້ມແຂງທາງດ້ານງົບປະມານແຫ່ງຊາດ ໃຫ້ມີຄວາມໂປ່ງໄສ່ ແລະ ມີການລາຍງານເປັນປົກກະຕິ, ປັບປຸງວຽກງານດ້ານການຄ້າ ແລະ ສົ່ງເສີມການມີສ່ວນຮ່ວມຂອງເອກະຊົນໂດຍເລັ່ງໃສ່ສ້າງ ສະພາບແວດລ້ອມເອື້ອອໍານວຍໃນການດໍາເນີນທຸລະກິດໃຫ້ດີຂຶ້ນ, ເປັນເຈົ້າການໃນການເຂົ້າເປັນປະຊາຄົມເສດຖະກິດອາຊຽນ ເພື່ອກໍ່ໃຫ້ເກີດປະໂຫຍດສູງຕໍ່ການຄ້າ ແລະ ການເຊື່ອມໂຍງກັບພາກພື້ນ, ປັບປຸງ ແລະ ສົ່ງເສີມສະມັດຕະພາບການຜະລິດຂອງຂະແໜງກະສິກໍາໃຫ້ດີຂຶ້ນ ແລະ ຍືນຍົງ, ຮັບປະກັນການລົງທຶນຂອງລັດ ໃນຂະແໜງໂຄງລ່າງເພື່ອດຶງດູດການລົງທຶນພາກເອກະຊົນໃຫ້ມີສ່ວນຮ່ວມໃນການພັດທະນາ.
ການພັດທະນາຊັບພະຍາກອນມະນຸດ ແລະ ຂະແໜງສັງຄົມ: ເລັ່ງລັດການປະຕິຮູບໃນຂະ ແໜງສາທາລະນະສຸກ ພ້ອມເອົາໃຈໃສ່ບັນຫາຕ່າງໆ ທີ່ຕິດພັນກັບເດັກອອ່ນ, ການຕາຍຂອງແມ່ ແລະ ເດັກ, ການຂາດສານອາຫານຂອງເດັກເຕັ້ຍ, ອັດຕານໍ້າໜັກຕໍ່າກວ່າມາດຕະຖານ, ຮັບປະກັນການລົງທຶນທີ່ຍືນຍົງ, ປະຕິຮູບລະບົບການສຶກສາໂດຍສຸມໃສ່ປັບປຸງ, ພັດທະນາລະດັບການສຶກສາ ແລະ ທັກສະຄວາມສາມາດຂອງໄວໜຸ່ມ ເພື່ອຍົກລະດັບອັດຕາການເຂົ້າຮຽນ ແລະ ລອດເຫລືອຂອງນັກຮຽນຢູ່ໃນທຸກລະດັບທົ່ວປະເທດ, ເລັ່ງລັດການຈັດຕັ້ງປະຕິບັດແຜນງານ ການຄໍ້າປະກັນສະບຽງອາຫານ ແລະ ໂພຊະນາໃນທົ່ວປະເທດໂດຍສົ່ງເສີມການມີສ່ວນຮ່ວມຂອງທຸກພາກສ່ວນ.
ການເຕີບໂຕສີຂຽວ ຄວາມຍືນດ້ານສິ່ງແວດລ້ອມ ການປ່ຽນແປງດິນຟ້າອາກາດ ແລະ ການຄຸ້ມຄອງໄພພິບັດ: ສົ່ງເສີມການປົກປັກສັກສາສິ່ງແວດລ້ອມ ໃຫ້ມີຄວາມຍືນຍົງໂດຍສະເພາະການຄຸ້ມຄອງລະບົບນິເວດ ແລະ ປ່າໄມ້ໃຫ້ມີຄວາມຍືນຍົງ, ປັບປຸງລະບຽບຫລັກການໃນການເວນຄືນທີ່ດິນທີ່ນໍາໃຊ້ເຂົ້າໃນວຽກງານພັດທະນາຂອງລັດ ໃຫ້ມີຄວາມໂປ່ງໄສ, ກະກຽມຄວາມພ້ອມ ແລະ ຫລຸດຜ່ອນຜົນກະທົບຈາກໄພທໍາມະຊາດ.
ບັນຫາທີ່ປິ່ນອອ້ມ ແລະ ປະສິດທິຜົນການພັດທະນາ: ປັບປຸງວຽກງານການປົກຄອງໂດຍຍົກສູງຄວາມຮັບຜິດຊອບ, ຮັບປະກັນໃຫ້ມີຄວາມໂປ່ງໄສ່ ແລະ ເອົາ ໃຈໃສ່ວຽກງານຕ້ານການສໍ້ລາດບັງຫລວງ ເຊິ່ງລວມທັງການມີສ່ວນຮ່ວມຂອງທຸກພາກສ່ວນ ເຂົ້າໃນການປັບປຸງຂະແໜງການກົດໝາຍ ແລະ ການທົບທວນວຽກງານຂອງຂະແໜງການຕ່າງໆ ປັບປຸງລະບົບການຄຸ້ມຄອງການເງິນພາກລັດໂດຍເອົາໃຈໃສ່ການຄຸ້ມຄອງລາຍຈ່າຍ ແລະ ການຄຸ້ມຄອງເງິນຕາ ເພື່ອຫລຸດຜ່ອນຄວາມສ່ຽງ ແລະ ສາມາດກໍານົດໄດ້ລາຍຮັບ ແລະ ລາຍຈ່າຍໃຫ້ມີຄວາມສອດຄ່ອງ ແລະ ມີ ປະສິດທິຜົນ, ເລັ່ງລັດແກ້ໄຂບັນຫາ ລະເບີດບໍ່ທັນແຕກໃຫ້ໄດ້ຫລາຍທີ່ສຸດ ເພື່ອເພີ່ມເນື້ອທີ່ການຜະລິດກະສິກໍາໃຫ້ແກ່ປະຊາຊົນລາວບັນດາເຜົ່າ ກໍຄືການສ້າງລາຍຮັບເພື່ອຫລຸດຜ່ອນຄວາມທຸກຍາກ, ເອົາໃຈໃສ່ແກ້ໄຂບັນຫາຫຍໍ້ທໍ້ໃນສັງຄົມ ໂດຍສະເພາະແມ່ນປະກົດການກ່ຽວກັບຢາເສບຕິດ, ເຫັນດີ ແລະ ໄດ້ຮັບເອົາບັນດາ 8 ຫລັກການຂອງຖະແຫລງການວຽງຈັນ ວ່າດ້ວຍການເປັນຄູ່ຮ່ວມເພື່ອການພັດທະນາທີ່ມີປະສິດທິິຜົນ.
ສປປ ລາວ ແລະ ບັນດາຄູ່ຮ່ວມຍັງໄດ້ສະແດງຄວາມຊົມເຊີຍ ຕໍ່ຜົນສໍາເລັດອັນໃຫ້ຫລວງຂອງ ສປປ ລາວ ທີ່ຍາດມາໄດ້ໂດຍສະເພາະຍ້ອງຍໍຊົມເຊີຍລັດຖະບານລາວ ສາມາດຈັດຕັ້ງປະຕິບັດເປົ້າໝາຍສະຫັດສະວັດໄດ້ດີ ແລະ ມີຄວາມຄືບໜ້າໄວກວ່າບາງປະເທດໃນໂລກ ເປັນຕົ້ນການດໍາເນີນການແກ້ໄຂຄວາມທຸກຍາກ ເຫັນວ່າເຮັດໄດ້ໄວທີ່ສຸດ ພ້ອມນີ້ຄູ່ຮ່ວມພັດທະນາກໍເຫັນດີສະໜັບສະໜູນຢ່າງແຂງແຮງຕໍ່ ສປປ ລາວ ເປັນປະທານອາຊຽນ ແລະ ທັງກ້າວເຂົ້າສູ່ປະຊາຄົມເສດຖະກິດອາຊຽນດ້ວຍບາດກ້າວອັນໃໝ່ ແລະ ອື່ນໆ.
ແຫລ່ງຂ່າວ:
