ນອກຈາກຈະເຂົ້າມາແທນທີ່ອາຊີບຕ່າງໆ ໃນຊີວິດປະຈຳວັນຂອງມະນຸດແລ້ວ ຕອນນີ້ຫຸ່ນຈັກກຳລັງຈະຍາດອາຊີບໃນຝັນຂອງມະນຸດໄປອີກດ້ວຍ ເມື່ອສອງມະຫາວິທະຍາໄລໄດ້ຮ່ວມກັນພັດທະນາຫຸ່ນຈັກຄ້າຍມະນຸດສຳລັບການປະຕິບັດງານໃນຖານະນັກບິນອາວະກາດໃນອະນາຄົດ
ຫລັງຈາກຂັ້ນຕອນການຄັດເລືອກດ້ວຍການແຂ່ງຂັນຊິງລາງວັນຈາກ NASA ມະຫາວິທະຍາໄລ MIT (Massachusetts Institute of Technology) ແລະມະຫາວິທະຍາໄລ Northeastern ຕ່າງໄດ້ຮັບມອບໝາຍໃນການສ້າງຫຸ່ນຈັກ R5 Valkyries ດ້ວຍງົບປະມານ 250,000 ດອນລາສະຫະລັດ ພ້ອມດ້ວຍການຊ່ວຍເຫລືອທາງເທກນິກຈາກທີມງານຂອງ NASA
ເຫັນໄດ້ແຈ້ງວ່າມີຄວາມທ້າທາຍຫລວງຫລາຍກ່ຽວກັບການສົ່ງຫຸ່ນຈັກຂຶ້ນໄປຍັງອາວະກາດ ຕັ້ງແຕ່ຄວາມສາມາດທາງກາຍະພາບຂອງຫຸ່ນຈັກແລະຊອບແວລ໌ຂອງພວກມັນ ລວມເຖິງສິ່ງທີ່ເອີ້ນວ່າ “ສະຕິປັນຍາ” ທາງ NASA ຄາດຫວັງວ່າມະຫາວິທະຍາໄລເຫລົ່ານີ້ຈະທຳການວິໄຈແລະພັດທະນາຊອບແວລ໌ທີ່ຈຳເປັນໃນການສົ່ງຫຸ່ນຈັກເຫລົ່ານີ້ໄປຍັງດາວອັງຄານ ໂດຍທາງມະຫາວິທະຍາໄລຈະສະແດງຄວາມຄືບໜ້າຂອງງານວິໄຈໃຫ້ NASA ໃນສອງປີໃຫ້ຫລັງ
ແຕ່ເຖິງແມ່ນທຸກຢ່າງເປັນໄປຕາມແຜນທີ່ວາງໄວ້ R5 Valkyries ກໍຈະບໍ່ແມ່ນຫຸ່ນຈັກຄ້າຍມະນຸດຕົວທຳອິດທີ່ໄດ້ຂຶ້ນໄປໃນອາວະກາດ ເນື່ອງຈາກມີຫຸ່ນຈັກຊື່ ” Robonaut ” ແລະ ” Robonaut 2″ ທີ່ຂຶ້ນໄປປະຕິບັດການຢູ່ເທິງສະຖານີອາວະກາດນານາຊາດ ຕັ້ງແຕ່ ປີ 2011 ແຕ່ກໍມີແນວໂນ້ມວ່າມັນອາດຈະເປັນ ຫຸ່ນຈັກຄ້າຍມະນຸດຕົວທຳອິດທີ່ໄດ້ໄປປະຕິບັດພາລະກິດເທິງດາວອັງຄານ
ທາງ NASA ໄດ້ມີແຜນໄລຍະຍາວທີ່ຈະເຮັດໃຫ້ຫຸ່ນຈັກເປັນສ່ວນຫນຶ່ງໃນພາລະກິດຂອງພວກເຂົາ ມັນອາດໄດ້ເດີນທາງໄປພ້ອມກັບນັກບິນອາວະກາດໄປຍັງດາວອັງຄານໃນອະນາຄົດ ພວກເຂົາເຊື່ອວ່າຫຸ່ນຍົນສາມາດນຳມາໃຊ້ປະຕິບັດພາລະກິດເບື້ອງຕົ້ນກ່ອນທີ່ມະນຸດຈະເດີນທາງໄປເຖິງ ຫລືໃຫ້ຄວາມຊ່ວຍເຫລືອມະນຸດກັບພາລະກິດຂອງພວກເຂົາໄດ້
ຄວາມກ້າວໜ້າຂອງຫຸ່ນຈັກ ລວມທັງການເຮັດວຽກງານຮ່ວມກັນຂອງມະນຸດແລະຫຸ່ນຈັກ ຈະມີຄວາມສຳຄັນໃນການພັດທະນາສິ່ງທີ່ຈຳເປັນສຳລັບການເດີນທາງ ໄປຍັງດາວອັງຄານຂອງພວກເຮົາໄດ້ ” Steve Jurczyk ຜູ້ເບິ່ງແຍງລະບົບສຳລັບພາລະກິດດ້ານເທກໂນໂລຍີອາວະກາດກ່າວ “ເຮົາຮູ້ສຶກຕື່ນເຕັ້ນທີ່ຈະມີສ່ວນຮ່ວມກັບວິໄຈຂອງມະຫາວິທະຍາໄລເຫລົ່ານີ້ ມັນຈະຊ່ວຍໃຫ້ NASA ໄດ້ກ້າວຕໍ່ໄປອີກຂັ້ນ ແລະເປັນກ້າວທີ່ຍິ່ງໃຫຍ່ໃນການພັດທະນາເທກໂນໂລຍີດ້ານຫຸ່ນຈັກຕໍ່ໄປ”