ກອງປະຊຸມປຶກສາຫາລື ເຜີຍແຜ່ ແລະ ຖອດຖອນບົດຮຽນ ໃນການຈັດຕັ້ງປະຕິບັດການເຝົ້າລະວັງ ແລະ ປ້ອງກັນພະຍາດໄຂ້ຍຸງລາຍ ປີ 2015 ໃນນະຄອນຫຼວງວຽງຈັນ (ນວ) ຈັດຂຶ້ນວັນທີ 17 ພະຈິກ 2015 ທີ່ຫ້ອງວ່າການປົກຄອງ ນວ ໂດຍເປັນປະທານຂອງທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ມີທ່ານ ດຣ. ພອນປະເສີດ ອຸນາພົມ ຫົວໜ້າພະແນກສາທາລະນະສຸກ ນວ ທ່ານຮອງຫົວໜ້າຫ້ອງການກະຊວງສາທາລະນະສຸກ ບັນດາທ່ານຮອງເຈົ້າເມືອງ ພ້ອມດ້ວຍພະນັກງານວິຊາການກ່ຽວຂ້ອງເຂົ້າຮ່ວມ.
ທ່ານ ດຣ. ພອນປະເສີດ ອຸນາພົມ ກ່າວວ່າ: ພະຍາດໄຂ້ຍຸງລາຍແມ່ນພະຍາດທີ່ບົ່ມຊ້ອນ ໃນບັນດາປະເທດເຂດຮ້ອນ ແລະ ເປັນພະຍາດທີ່ເກີດຈາກພາຫະນຳເຊື້ອຈາກຍຸງລາຍທີ່ອາໄສຢູ່ໃນເຮືອນ ອ້ອມແອ້ມເຮືອນຂອງພວກເຮົາ ໂດຍສະເພາະແຫຼ່ງເພາະພັນ ເຊັ່ນ: ນ້ຳສະອາດທີ່ບັນຈຸໃນພາຊະນະ ກະໂປະ ກະປ໋ອງ ຢາງຕີນລົດເກົ່າທີ່ປະໄວ້ໃນເຮືອນ ແລະ ນອກເຮືອນທີ່ບໍ່ມີການປົກປິດ ຫຼື ເກັບໄວ້ພະຍາດໄຂ້ຍຸງລາຍແມ່ນສາເຫດການເຈັບເປັນ ແລະ ມີຜົນກະທົບທາງດ້ານສາທາລະນະສຸກແທ້ຈິງ ໃນແຕ່ລະປີມີຄົນເປັນພະຍາດດັ່ງກ່າວ ປະມານ 50 ລ້ານຄົນ ໃນນັ້ນ ຜູ້ທີ່ມີອາການເລືອດໄຫຼ ປະມານ 5 ແສນຄົນ ແລະ ເສຍຊີວິດ ປະມານ 22.000 ຄົນຕໍ່ປີ ໃນທົ່ວໂລກ.
ສຳລັບການເຝົ້າລະວັງ ໃນປີ 2015 ຂອງພະແນກສາທາລະນະສຸກ ນວ ໄດ້ມີການວາງຍຸດທະສາດໃນການເຝົ້າລະວັງ ໂດຍເນັ້ນໃສ່ການເຝົ້າລະວັງກໍລະນີຄົນເຈັບ ແລະ ປະຕິບັດມາດຕະການຄວບຄຸມປ້ອງກັນການລະບາດ ການເຝົ້າລະວັງ ແລະ ປະຕິບັດມາດຕະການຄວບຄຸມແຫຼ່ງເພາະພັນ ພາຫະນຳເຊື້ອ ການຄຸ້ມຄອງກໍລະນີ ແລະ ການໂຄສະນາສຸຂະສຶກສາ ນອກຈາກນີ້ ຈາກການເຝົ້າລະວັງແຕ່ອາທິດທີ 1 ຮອດອາທິດທີ 46 ໃນປີ 2015 ຈຳນວນກໍລະນີທີ່ຖືກຢັ້ງຢືນໄຂ້ຍຸງລາຍມີທັງໝົດ 112 ກໍລະນີ (ບໍ່ມີກໍລະນີເສຍຊີວິດ) ເຊິ່ງສະເລ່ຍ ອັດຕາການເຈັບເປັນ 13,9 ຕໍ່ປະຊາກອນ 100.000 ຄົນ ໃນປີ 2015 ພະແນກສາທາລະນະສຸກ ນວ ໄດ້ເນັ້ນໃສ່ປະຊາຊົນທຸກຄົວເຮືອນ ໃຫ້ເປັນເຈົ້າການໃນການທຳລາຍແຫຼ່ງເພາະພັນໜອນນ້ຳຍຸງລາຍ ໂດຍໃຫ້ປະຕິບັດຕາມຫຼັກການ 5 ປ ຄື: ປິດ ປ່ຽນ ປ່ອຍ ປັບປຸງ ແລະ ປະຕິບັດ ໃນນັ້ນ ຍັງມີການປະກອບສ່ວນຂອງອາສາສະໝັກ ຂອງນ້ອງນັກຮຽນມັດທະຍົມສຶກສາຊັ້ນປີທີ 5-6 ເຂົ້າມາຊ່ວຍໃນການເຝົ້າລະວັງກວດກາໜອນນ້ຳຍຸງລາຍ ໃນແຕ່ລະອາທິດອີກດ້ວຍ.
ແຫ່ລງຂ່າວ
