ຂປລ. ໃນວັນທີ 19 ພະຈິກ 2015 ນີ້ ທີ່ມະຫາວິທະຍາໄລແຫ່ງຊາດ ໄດ້ຈັດພິທີເປີດສູນຄົ້ນຄວ້າຈີນ ຢ່າງເປັນທາງການ ເພື່ອການຄົ້ນຄວ້າທາງດ້ານຕ່າງໆ, ໃຫ້ກຽດເຂົ້າຮ່ວມໂດຍທ່ານ ສຈ.ດຣ. ສຸກກົງແສງ ໄຊຍະເລີດ ອະທິການບໍດີ ມະຫາວິທະຍາໄລແຫ່ງຊາດ, ທ່ານ ກວນ ຮວາ ປິ່ງ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປ ຈີນ ປະຈໍາລາວ, ມີບັນດາຮອງຄະນະທິການບໍດີ, ຫົວໜ້າກົມ, ຮອງກົມ ແລະ ພະນັກງານຂັ້ນສູງ ທັງສອງຝ່າຍເຂົ້າຮ່ວມ.
ສູນຄົ້ນຄວ້າຈີນ ແມ່ນໜ່ວຍງານໜຶ່ງເຊິ່ງດໍາເນີນງານ ພາຍໃຕ້ການຊີ້ນໍາ ຂອງຫ້ອງການຄົ້ນຄວ້າວິ ທະຍາສາດ ແລະ ບໍລິການວິຊາການ ເປັນເສນາທິການໃຫ້ແກ່ອະທິການບໍດີ ເພື່ອສົ່ງເສີມການຄົ້ນຄວ້າວິ ທະຍາສາດ ຂອງມະຫາວິທະຍາໄລແຫ່ງຊາດ, ເປັນສູນຄົ້ນຄວ້າ ຖອນຖອນບົດຮຽນຈາກ ສປ ຈີນ ເພື່ອການພັດທະນາ ສປປ ລາວ ເຊິ່ງສູນດັ່ງກ່າວຈະຄົ້ນຄວ້າ ໃນທຸກຂົງເຂດເປັນຕົ້ນ ແມ່ນດ້ານການເມືອງ-ການປົກຄອງ, ວັດທະນະທໍາ–ສັງຄົມ, ເສດຖະກິດ, ວິທະຍາສາດ ແລະ ເຕັກໂນໂລຊີ, ພາລະໜ້າທີ່ສູນຄົ້ນຄ້ວາຈີນ ແມ່ນເຕົ້າໂຮມນັກຄົ້ນຄ້ວາ ເພື່ອດໍາເນີນການຄົ້ນຄ້ວາຕາມບູລິມະສິດ ຂອງການຄົ້ນຄ້ວາແຕ່ລະໄລຍະ, ຂຶ້ນງົບປະມານແກ່ສູນຄົ້ນຄວ້າ, ຄຸ້ມຄອງໂຄງການຄົ້ນຄວ້າ ທີ່ໄດ້ອະນຸມັດໄປ, ເຜີຍແຜ່ຜົນການຄົ້ນຄວ້າໃນຮູບແບບຕ່າງໆ ນອກນີ້ ຍັງມີໜ້າທີ່ພົວພັນກັບ ສະຖາບັນຄົ້ນຄວ້າຂອງຈີນ ຕາມຄໍາເຫັນດີຂອງອະທິການບໍດີ ມະຫາວິທະຍາໄລແຫ່ງຊາດ, ການບໍລິຫານງານຂອງສູນຄົ້ນຄວ້າຈີນ ປະກອບດ້ວຍຄະນະຊີ້ນໍາລວມ ແລະ ຄະນະຮັບຜິດຊອບສູນ, ສໍາລັບງົບປະມານເພື່ອການຄົ້ນຄວ້າ ແມ່ນໄດ້ມາຈາກລັດຖະບານ ສປ ຈີນ, ໂດຍຜ່ານສະຖານທູດຈີນ ປະຈໍາລາວ, ສູນດັ່ງກ່າວຍັງມີສິດ ພົວພັນ–ປະສານງານໂດຍກົງກັບຄະນະວິຊາ, ສະຖາບັນ ແລະ ພາກສ່ວນຕ່າງໆ ພາຍໃນມະຫາວິທະຍາໄລ, ມີສິດສະເໜີ ຂໍອະນຸມັດນໍາອະທິການບໍດີ ເພື່ອພົວພັນວຽກງານນໍາກະຊວງ, ອົງການທຽບເທົ່າ, ໂຮງຈັກໂຮງງານ, ບັນດາພື້ນຖານການຜະລິດ, ອໍານາດການປົກຄອງທ້ອງຖິ່ນ, ອົງການຈັດຕັ້ງຕ່າງໆທັງພາກລັດ ແລະ ເອກະຊົນ.
ແຫລ່ງຂ່າວ:
