ພາຍ​ໃຕ້​ການ​ຊີ້​ນຳ-ນຳພາຂອງ​ພັກ-ລັດຖະບານ ເຮັດ​ໃຫ້​ຕະຫຼອດ​ໄລຍະ 40 ປີ ຜ່ານ​ມາ ຂະແໜງ​ອຸດສາຫະກຳ ສືບຕໍ່​ຂະຫຍາຍ​ຕົວຢ່າງ​ຕໍ່​ເນື່ອງ ເຊິ່ງ​ໃນ 5 ປີ​ທຳ​ອິດ (1986-1990) ເຕີບໃຫຍ່​ຢູ່​ໃນ​ລະດັບ 8% ຕໍ່​ປີ ຮອດສົກ​ປີ 2014-2015 ການ​ເຕີບໃຫຍ່​ຂອງ​ຂະແໜງ​ດັ່ງກ່າວ ​ໄດ້ປະກອບສ່ວນ​ເຂົ້າ​ໃນ​ຍອດ​ຜະລິດຕະ​ພັນ​ພາຍ​ໃນ ຫຼື GDP ແມ່ນ 29% ສ່ວນ​ການ​ຄ້າ​ແມ່ນ​ຂະຫຍາຍ​ຕະຫຼາດ​ລົງ​ສູ່​ຮາກ​ຖານ ແລະ ສາມາດ​ຈໍ​ລະ​ຈອນ​ສິນຄ້າໄດ້​ຢ່າງ​ທົ່ວ​ເຖິງ.

ພາຍຫຼັງ​ທີ່​ປະເທດ​ລາວ​ເຮົາ ໄດ້​ສະຖາປະນາໃນ​ວັນ​ທີ 2 ທັນວາ 1975 ເປັນຕົ້ນ​ມາ ພື້ນຖານອຸດສາຫະກຳ​ຈຳນວນ​ໜຶ່ງ​ໄດ້​ຮັບການ​ກໍ່ສ້າງ ແລະ ພັດທະນາ​ເປັນກ້າວໆ ເຊິ່ງ​ໃນ​ໄລຍະ​ຕົ້ນ​ຂອງການ​ປ່ຽນແປງ​ໃໝ່ 1986-1990 ຂະແໜງ​ອຸດສາຫະກຳ​ ໄດ້​ຮັບການ​ພັດທະນາ​ຢ່າງ​ຕໍ່​ເນື່ອງ ຕົ້ນຕໍ​ແມ່ນ​ຂະແໜງ​ຜະລິດ​ປຸງ​ແຕ່ງ ແລະ ໂຮງ​ຈັກ ໂຮງງານ ມີ​ຈຳນວນ​ເພີ່ມ​ຂຶ້ນ​ຈາກ 100 ແຫ່ງ ໃນປີ 1975 ມາ​ເປັນ 26.200 ແຫ່ງ ໃນ​ປີ 2005 ມາ​ຮອດ​ສົກ​ປີ 2006-2010 ການ​ຂະຫຍາຍຕົວຂອງ​ອຸດສາຫະກຳ​ສະເລ່ຍ 12% ຕໍ່​ປີ ແລະ ເປັນ 39.872 ແຫ່ງ ໃນ​ປີ 2013 ເດັ່ນ​ກວ່າ​ໝູ່​ໃນ​ໄລຍະ 2011-2013 ແມ່ນ​ອຸດ​ສາຫະ​ກຳ​ປຸງ​ແຕ່ງ ໂດຍ​ສະເພາະ ອຸດສາຫະກຳ​ຜະລິດ​ສະບຽງ​ອາຫານ​ກວມ 21% ຊິ້ນ​ສ່ວນ​ອາ​ໄຫຼ່ 18% ຜະລິດ​ຕະ​ພັນ​ແຮ່​ທາດອື່ນໆ​ທີ່​ບໍ່​ແມ່ນ​ໂລຫະ 16% ແລະ ອຸດສາຫະກຳ​ຜະລິດ​ເຄື່ອງ​ດື່ມກວມ 15,5% ຂອງ​ມູນ​ຄ່າ​ອຸດ​ສາຫະ​ກຳ​ປຸງ​ແຕ່ງ ສ່ວນ​ການ​ຜະລິດນ້ຳ ນ້ຳຫວານ​ສະໜອງ​ໄດ້ 86% ຊີມັງ 65% ເຫຼັກ​ເສັ້ນ​ປະມານ 25% ຂອງ​ຄວາມ​ຕ້ອງການ​ທັງໝົດ.

ສຳລັບ​ໃນ​ໄລຍະ 5 ປີຜ່ານ​ມາຂອງ​ຂະແໜງການ​ອຸດສາຫະກຳ ແລະ ການ​ຄ້າ ຍັງ​ສືບຕໍ່​ຂະຫຍາຍ​ຕົວ​ດີ ແລະ ຕໍ່​ເນື່ອງ ຄື​ຂະແໜງ​ອຸດສາຫະກຳ​ປຸງ​ແຕ່ງ ແລະ ການ​ຄ້າອຸດສາຫະກຳ​ປຸງ​ແຕ່ງ 10% ແລະ ການ​ຄ້າຂາຍ​ຍົກ-ຂາຍຍ່ອຍ 19% ໄດ້​ປະກອບສ່ວນ​ເຂົ້າ​ໃນ​ຍອດ​ຜະລິດ​ຕະ​ພັນພາຍ​ໃນ ຫຼື GDP ໃນ​ສົກ​ປີ 2014-15 ແມ່ນ 29% ສ່ວນ​ວຽກ​ງານການ​ຄ້າ ເຊັ່ນ: ການ​ຄ້າ​ພາຍ​ໃນຂະຫຍາຍຕົວ​ຢ່າງ​ຕັ້ງໜ້າ​ທາງດ້ານ​ປະລິມານ ແລະ ຄຸນະພາບຈັງຫວະ​ການ​ຂະຫຍາຍຕົວ​ສະເລ່ຍ 7,2% ຕໍ່​ປີ ພ້ອມ​ນັ້ນ ກໍ່​ໄດ້ປະກອບສ່ວນ​ສ້າງ​ວຽກ​ເຮັດ​ງານທຳ​ປະມານ 440 ພັນ​ຄົນ​ໃນ​ປີ 2013 ເພີ່ມ​ຂຶ້ນ 20% ທຽບ​ກັບ​ປີ 2012 ແລະ ມີ​ຕະຫຼາດ​ຂາຍຍົກ-ຂາຍຍ່ອຍ​ສິນຄ້າ​ໃນ​ຂອບ​ເຂດ​ທົ່ວ​ປະເທດ ​ທັງ​ໝົດ 753 ແຫ່ງ (ປີ 2014) ທຽບໃສ່​ປີ 2010 ເພີ່ມ​ຂຶ້ນ 138 ແຫ່ງ ເທົ່າ​ກັບ 22,4% ເຮັດ​ໃຫ້ການ​ຈໍ​ລະ​ຈອນ​ສິນຄ້າລົງ​ເຖິງ​ຮາກ​ຖານ​ປະຊາຊົນ.

ແຫ່ລງຂ່າວ