ຂປລ. ໃນຫວ່າງບໍ່ດົນມານີ້ເຈົ້າໜ້າທີ່ສະເພາະກິດແຂວງອຸດົມໄຊໄດ້ໃຫ້ສໍາພາດນັກຂ່າວສໍານັກຂ່າວສານປະເທດລາວວ່າ:ຕົນເອງສັ່ງໂຈະໂຄງການປູກໝາກກ້ວຍໄວ້ຊົ່ວຄາວແລ້ວເພື່ອລົງກວດກາ ແລະ ສຶກສາເບິ່ງຜົນໄດ້ຜົນເສຍຕົວຈິງ ຖ້າຫາກວ່າພາກລັດ ແລະ ປະຊາຊົນບໍ່ໄດ້ຮັບຜົນປະໂຫຍດໂດຍກົງ ຫລື ມີຜົນກະທົບດ້ານສິ່ງແວດລ້ອມ ແລະ ສັງຄົມຈະສັ່ງໂຈະຖາວອນ. ຂະນະນີ້ ທາງແຂວງດັ່ງກ່າວໄດ້ອະນຸຍາດໃຫ້ນັກລົງທຶນຕ່າງປະເທດສໍາປະທານເນື້ອທີ່ປູກໝາກກ້ວຍແລ້ວປະມານ 5.000 ເຮັກຕາ ແຕ່ໃນຕົວຈິງໄດ້ປູກແລ້ວ 3.000 ພັນເຮັກ ແລະ ສືບຕໍ່ປູກຕື່ມອີກຈົນຄົບຕາມຈໍານວນອະນຸມັດ.
ນັກວິຊາການຈາກຂະແໜງການສົ່ງເສີມການລົງທຶນແຂວງອຸດົມໄຊໄດ້ຊີ້ແຈງວ່າ: ໃນຄວາມເປັນຈິງນັກລົງທຶນຕ່າງປະເທດຕ້ອງການເນື້ອທີ່ຫລາຍພັນເຮັກຕາເພື່ອປູກໝາກກ້ວຍຫອມສົ່ງອອກຕ່າງປະເທດ ແຕ່ພວກເຮົາບໍ່ສາມາດອະນຸຍາດໃຫ້ໄດ້ຕາມຄໍາຮ້ອງຂອງເຂົາເຈົ້າ ເນື່ອງຈາກວ່າປັດຈຸບັນມີເນື້ອທີ່ຈໍາກັດ ແລະ ຕ້ອງສະຫງວນໄວ້ເພື່ອປູກຜືກເສດຖະກິດແນວອື່ນທີ່ເປັນບູລິມະສິດຂອງລັດຖະບານ ນອກຈາກນັ້ນພວກເຮົາຍັງຕ້ອງໄດ້ສຶກສາ ແລະ ກວດສອບເບິ່ງຜົນໄດ້ຜົນເສຍມີຫຍັງແນ່ກ່ຽວກັບການປູກໝາກກ້ວຍດັ່ງກ່າວ. ຜ່ານມາພວກເຮົາໄດ້ອະນຸຍາດໃຫ້ນັກລົງທຶນຕ່າງປະເທດສໍາປະທານເນື້ອທີ່ພຽງ 5.000 ເຮັກຕາເທົ່ານັ້ນ ແຕ່ເຂົາເຈົ້ານໍາໃຊ້ເນື້ອທີ່ດິນປູກພຽງແຕ່ 3.000 ເຮັກຕາ ປັດຈຸບັນເຂົາເຈົ້າເລີ່ມເກັບກ່ຽວຜົນຜະລິດ ແລະ ໄດ້ສົ່ງອອກຕ່າງປະເທດແລ້ວ. ສະເພາະປີ 2015 ນີ້ ບໍລິສັດຕ່າງປະເທດຍັງຈະສືບຕໍ່ປູກຕື່ມອີກ 2.000 ເຮັກຕາ ແຕ່ພວກເຮົາຈະບໍ່ອະນຸຍາດໃຫ້ຂະຫຍາຍເນື້ອທີ່ປູກຕື່ມອີກຍ້ອນເຫດຜົນຈໍາເປັນທີ່ພວກເຮົາຕ້ອງໄດ້ກວດກາ ແລະ ສຶກສາເບິ່ງອີກວ່າພາກລັດ ແລະ ປະຊາຊົນໄດ້ຮັບຜົນປະໂຫຍດນັ້ນແມ່ນແທ້ ຫລື ບໍ່?. ອະດີດຜ່ານມານັ້ນ ນັກລົງທຶນຕ່າງປະເທດແມ່ນໃຊ້ວິທີເຊົ່າດິນຂອງປະຊາຊົນໂດຍກົງພ້ອມກັບຈ່າຍຄ່າເຊົ່າດິນໃຫ້ປະຊາຊົນ 12 ລ້ານກີບຕໍ່ເຮັກຕາ ສະນັ້ນປະຊາຊົນຈໍານວນໜຶ່ງຈຶ່ງຫັນທິດຖິ້ມວິທີການຜະລິດພືດດ້ວຍຕົນເອງແລ້ວໃຫ້ນັກລົງທຶນເຊົ່າປູກພືດ. ປະຊາຊົນຈໍານວນບອກວ່າ: ການຜະລິດພືດແຕ່ລະປີຂອງເຂົາເຈົ້າເອງແມ່ນໄດ້ຮັບຜົນໜ້ອຍ ແລະ ຜົນຜະລິດຕໍ່າບໍ່ສາມາດກຸ້ມກິນ ແລະ ບາງປີກໍໄດ້ຊື້ເຂົ້າກິນ ເຖິງແມ່ນວ່າຈະອອກເຫື່ອເທແຮງຫລາຍປານໃດກໍຕາມ ສົ່ງຜົນເຮັດໃຫ້ເຂົາເຂົ້າທໍ້ຖອຍ ດ້ວຍເຫດດັ່ງກ່າວຈຶ່ງໃຫ້ນັກລົງທຶນສໍາປະທານຈະດີກວ່າໝາຍວ່າບໍ່ໄດ້ເຮັດຫຍັງກໍມີລາຍໄດ້. ແນວໃດກໍດີ ເຈົ້າໜ້າທີ່ສະເພາະກິດດ້ານກະສິກໍາຢືນຢັນວ່າ: ປັດຈຸບັນນີ້ ພວກເຮົາໄດ້ເຮັດວຽກຮ່ວມກັນກັບຫລາຍພາກສ່ວນເພື່ອກວດສອບ ແລະ ຕິດຕາມເບິ່ງຜົນກະທົບດ້ານສິ່ງແວດລ້ອມ ແຕ່ໄລຍະຜ່າມາຍັງບໍ່ມີຜົນກະທົບ ດັ່ງທີ່ມີຂ່າວວ່ານັກລົງທຶນໄດ້ນໍາໃຊ້ສານເຄມີເກີນຂະໜາດເຂົ້າໃນການປູກຝັງ
ຂ່າວຈາກ ຂ່າວສານປະເທດລາວ
