ຊາວຣັດເຊຍມີເປົ້າໝາຍວ່າພວກເຂົາຈະເປັນຊາດທຳອິດທີ່ສົ່ງສັດໄປເຍືອນດາວອັງຄານໄດ້ ແລະ ພວກເຂົາກໍເລີ່ມມີການຝຶກລິງໃຫ້ກຽມພ້ອມສຳລັບພາລະກິດຢ້ຽມຢາມດາວເຄາະສີແດງໃນປີ 2017 ນີ້
ນັກວິທະຍາສາດຣັດເຊຍໄດ້ທຳການຝຶກຝົນລິງເປັນເວລາສາມຊົ່ວໂມງຕໍ່ມື້ ເພື່ອກຽມພ້ອມສຳລັບສົ່ງພວກມັນໄປຢ້ຽມຢາມອາວະກາດ ການຝຶກຝົນນີ້ເກີດຂຶ້ນທຸກມື້ໃນສະຖາບັນວິໄຈບັນຫາທາງຊີວະການແພດໃນມອດສ໌ໂຄ ລິງທັງສີ່ຖືກຝຶກໃຫ້ໃຊ້ຄັນບັງຄັບເພື່ອລະບຸເປົ້າໝາຍຈາກຕົວຊີ້ຕຳແໜ່ງ ແລະມີການໃຫ້ນ້ຳຫມາກໄມ້ເປັນລາງວັນຫາກມັນເຮັດສຳເລັດ ໂດຍລິງທັງສີ່ທີ່ຖືກເລືອກມານັ້ນມີທັກສະການຄິດແລະຄວາມສາມາດໃນການຮຽນຮູ້
“ສິ່ງທີ່ພວກເຮົາກຳລັງເຮັດ ຄືຝຶກໃຫ້ພວກມັນເປັນອັດສະລິຍະ ແລະສ້າງຄວາມເປັນໄປໄດ້ທີ່ຈະໃຊ້ພວກມັນໃນການສຳຫລວດພື້ນທີ່ນອກວົງໂຄຈອນຂອງໂລກ” Inessa Kozlovskaya ຜູ້ນຳຂອງທີມງານທີ່ຮັບຜິດຊອບໃນການຝຶກລິງກ່າວ
ເມື່ອລິງປະສົບຄວາມສຳເລັດໃນການໃຊ້ງານລະບົບຄວບຄຸມ ຂັ້ນຕໍ່ໄປຈະຝຶກໃຫ້ມັນແກ້ໄຂບັນຫາທາງຄະນິດສາດແລະປິດສະໜາທີ່ມີຄວາມຮຽບງ່າຍ ນັກວິທະຍາສາດມີຄວາມຄາດຫວັງວ່າສັດເຫລົ່ານີ້ຈະພ້ອມໃນການປະຕິບັດພາລະກິດໄດ້ ໃນປີ 2017
ກ່ອນໜ້ານີ້ ໃນປະຫວັດສາດໄດ້ມີການບັນທຶກວ່າມີການໃຊ້ສັດໄປເຮັດພາລະກິດສຳຫລວດອາວະກາດກ່ອນໜ້າມະນຸດ ເພື່ອທົດສອບເຖິງຄວາມປອດໄພໃນການເດີນທາງອອກໄປໃນອາວະກາດແລະກັບມາຍັງໂລກ
ລິງຕົວທຳອິດທີ່ເຄີຍຖືກສົ່ງໄປໃນອາວະກາດຄື Albert I ໃນເດືອນມິຖຸນາ ປີ ຄສ 1948 ແຕ່ມັນກໍຕາຍຈາກຜົນກະທົບຂອງການອອກໄປຍັງອາວະກາດ ຢ່າງໃດກໍຕາມໃນບໍ່ຈັກປີຕໍ່ມາ ຄືປີ ຄສ 1951 ມີລິງຊື່ Yorick ໄດ້ປະສົບຜົນສຳເລັດໃນການອອກໄປນອກອາວະກາດແບບຍັງມີຊີວິດເປັນເທື່ອທຳອິດ
ຢ່າງໃດກໍຕາມ ສະມາຊິກຂອງກຸ່ມປະຊາຊົນເພື່ອຮັກສາຜົນປະໂຫຍດຂອງສັດ (PETA) ໄດ້ອອກມາກ່າວວ່າພາລະກິດໃນອາວະກາດນັ້ນເປັນເລື່ອງທີ່ຍາກລຳບາກຫລາຍຢູ່ແລ້ວສຳລັບມະນຸດ ແລະ ສຳລັບສັດທີ່ບໍ່ຮູ້ວ່າຕົວເອງກຳລັງເຮັດຫຍັງຢູ່ນັ້ນ ມັນຄົງຈະຍາກຂຶ້ນໄປກວ່າເກົ່າຫລາຍ
“ພວກມັນຈະຖືກໃສ່ລົງໄປໃນແຄບຊູນທີ່ໜ້າຢ້ານນັ້ນ” Justin Goodman ຜູ້ອຳນວຍການຂອງ PETA ກ່າວ “ພວກມັນບໍ່ເຂົ້າໃຈສິ່ງທີ່ເກີດຂື້ນດ້ວຍຊ້ຳ”
ຢ່າງໃດກໍຕາມ NASA ຂອງສະຫະລັດອາເມຣິກາ ກຳລັງຢູ່ໃນຂັ້ນຕອນການສຶກສາເລື່ອງການສາມາດຈັດການການເດີນທາງໄລຍະຍາວໃນອາວະກາດຂອງມະນຸດ ແລະ ຄາດວ່າການສຶກສາເຫລົ່ານັ້ນຈະເຮັດໃຫ້ພວກເຂົາສົ່ງມະນຸດໄປຍັງດາວອັງຄານໄດ້ໃນປີ ຄສ 2030