ກຸ່ມນັກວິໄຈຊຶ່ງນຳໂດຍ Angelika Lingnau ຈາກພະແນກຈິດວິທະຍາທີ່ Royal Holloway, University of London ນັ້ນສາມາດທີ່ຈະທຳການຄາດຄະເນການເຄື່ອນໄຫວຂອງຜູ້ເຂົ້າຮ່ວມທົດສອບໄດ້ດ້ວຍພຽງແຕ່ການວິເຄາະປະຕິກິລິຍາທາງສະໝອງຂອງພວກເຂົາເທົ່ານັ້ນ
ງານວິໄຈດັ່ງກ່າວທີ່ໄດ້ຖືກຕີພິມລົງໃນວາລະສານ Journal of Neuroscience ນັ້ນ ນັບເປັນງານວິໄຈມະນຸດເທື່ອທຳອິດທີ່ໄດ້ທຳການກວດສອບສັນຍານປະສາດຂອງການກະທຳທີ່ ຖືກວາງແຜນໄວ້ກ່ອນໂດຍຜູ້ເຂົ້າຮ່ວມທົດລອງສາມາດເລືອກໄດ້ຢ່າງອິດສະຫລະ ເຮັດໃຫ້ງານເທື່ອນີ້ອາດເປັນກ້າວທຳອິດໃນການພັດທະນາສ່ວນເຊື່ອມຕໍ່ປະສາດລະຫວ່າງສະໝອງ ແລະ ເຄື່ອງຄອມພິວເຕີກໍເປັນໄດ້
ດຣ. Lingnau ແລະທີມງານຂອງນາງໄດ້ໃຊ້ເຄື່ອງຖ່າຍພາບດ້ວຍສະໜາມແມ່ເຫລັກທີ່ວັດການເຮັດວຽກງານຂອງສະໝອງ (fMRI ຫລື functional Magnetic Resonance Imaging) ໃນຂະນະທີ່ຜູ້ເຂົ້າຮ່ວມທົດສອບນັ້ນກຳລັງວາງແຜນແລະທຳການເຄື່ອນໄຫວມືຢ່າງງ່າຍໆໃນ ເຄື່ອງຖ່າຍພາບ ໂດຍສິ່ງສຳຄັນກໍຄືຜູ້ເຂົ້າຮ່ວມທົດສອບນັ້ນສາມາດທີ່ຈະເລືອກໜຶ່ງໃນສາມການ ເຄື່ອນໄຫວຂອງມືໄດ້ຢ່າງອິດສະຫລະ ຊຶ່ງດ້ວຍການໃຊ້ Machine learning ຫລືທີ່ເອີ້ນວ່າ “ການຮຽນຮູ້ຂອງເຄື່ອງ” ນັ້ນ ນັກວິໄຈໄດ້ເບິ່ງວ່າພວກເຂົາຈະສາມາດຄາດການຊະນິດຂອງການເຄື່ອນໄຫວທີ່ຜູ້ເຂົ້າຮ່ວມທົດສອບຈະເລືອກ ໄດ້ ຫລື ບໍ່ ຜ່ານປະຕິກິລິຍາຂອງສະໝອງຊຶ່ງໄດ້ຖືກວັດໄວ້ໃນໄລຍະການ ວາງແຜນ
ດຣ. Lingnau ກ່າວວ່າ “ພວກເຮົາຕື່ນເຕັ້ນກັບການຄົ້ນພົບຂອງເຮົາຫລາຍ ເນື່ອງຈາກວ່າມັນເປັນເທື່ອທຳອິດຂອງການສຶກສາວິໄຈກັບມະນຸດໃນລັກສະນະດັ່ງກ່າວທີ່ ຜູ້ເຂົ້າຮ່ວມທົດສອບນັ້ນສາມາດເລືອກການເຄື່ອນໄຫວດ້ວຍຕົນເອງ ອີກທັງຍັງເປັນຜູ້ດຽວທີ່ຮູ້ວ່າຕົວເອງຄິດວ່າຈະເຮັດຫຍັງອີກດ້ວຍ ຊຶ່ງພວກເຮົາສາມາດທີ່ຈະຄາດການໄດ້ວ່າພວກເຂົາຈະເລືອກເຮັດຫຍັງໂດຍເບິ່ງຈາກສັນຍານສະໝອງຂອງພວກເຂົາເທົ່ານັ້ນ”
“ງານເທື່ອນີ້ເຜີຍໃຫ້ເຫັນເຖິງຄວາມເປັນໄດ້ຈຳນວນຫລາຍ ສຳລັບອະນາຄົດ ຊຶ່ງລວມໄປເຖິງການພັດທະນາເທກໂນໂລຍີທີ່ເຈົ້າສາມາດຄວບຄຸມໄດ້ຜ່ານຄວາມຄິດຂອງເຈົ້າເອງ ເຊັ່ນດຽວກັບການເຮັດໃຫ້ເກີດການພັດທະນາຂອງວິທີການຕ່າງໆທີ່ຈະຊ່ວຍໃຫ້ຜູ້ທີ່ມີອາການພິການ ຫລື ເປັນອຳມະພາດນັ້ນສາມາດທີ່ຈະໃຊ້ສະໝອງຄວບຄຸມໃນຈຸດທີ່ມີອາການໄດ້ອີກດ້ວຍ”