ບັນດາທ່ານ ແລະ ພໍ່ແມ່ພີ່ນ້ອງ ທີ່ຮັກແພງ ທັງຫລາຍ,
ກ່ອນໜ້ານີ້ 70 ປີ ພາຍຫລັງສົງຄາມໂລກ ຄັ້ງທີ II ໄດ້ສິ້ນສຸດລົງ, ອົງການສະຫະປະຊາຊາດ ໄດ້ຖືກສ້າງຕັ້ງຂຶ້ນໃນວັນທີ 24 ຕຸລາ 1945 ໂດຍມີເປົ້າໝາຍຕົ້ນຕໍເພື່ອສົ່ງເສີມສັນຕິພາບ, ຄວາມໝັ້ນຄົງສາກົນ ແລະ ການຮ່ວມມືດ້ານການພັດທະນາ ແນ່ໃສ່ເຮັດໃຫ້ມວນມະນຸດ ໄດ້ດຳລົງຊີວິດ ໃນທ່າມກາງສັນຕິພາບ, ສະຖຽນລະພາບ ແລະ ມີເງື່ອນໄຂເອື້ອອໍານວຍແກ່ການພັດທະນາຢ່າງຊອບທໍາ. ຕະຫລອດໄລຍະທີ່ຜ່ານມາ, ອົງການສະຫະປະຊາຊາດ ໄດ້ປະຕິບັດພາລະບົດບາດຂອງຕົນ ບົນພື້ນຖານຂອງກົດບັດຂອງອົງການ ແລະ ມີຜົນສຳເລັດທີ່ສຳຄັນ ໃນຫລາຍດ້ານອັນໄດ້ເຮັດໃຫ້ການຮ່ວມມື ເພື່ອປົກປັກຮັກສາ, ສົ່ງເສີມສັນຕິພາບ ແລະ ຄວາມໝັ້ນຄົງ ກໍຄືການຮ່ວມມືເພື່ອການພັດທະນາ ລະຫວ່າງ ປະຊາຊາດໃນໂລກ ເຊິ່ງໄດ້ນັບມື້ນັບກາຍເປັນທ່າອ່ຽງລວມ ຂອງຍຸກສະໄໝ.
ມື້ນີ້ ວັນທີ 24 ຕຸລາ 2015, ພວກເຮົາ ຮ່ວມກັບບັນດາປະຊາຊາດໃນທົ່ວໂລກ ພ້ອມກັນສະເຫລີມສະຫລອງ ຄົບຮອບ 70 ປີຂອງການສ້າງຕັ້ງອົງການສະຫະປະຊາຊາດ ເຊິ່ງມີຄວາມຫມາຍສຳຄັນຍິ່ງ ໂດຍສະເພາະຕໍ່ການສົ່ງເສີມ ແລະ ຮັບປະກັນສັນຕິພາບ, ຄວາມໝັ້ນຄົງ ໃນຂອບເຂດທົ່ວໂລກ ແລະ ຊຸກຍູ້ການຮ່ວມມືເພື່ອການພັດທະນາ ທີ່ຍືນຍົງຕໍ່ໄປ. ອົງການ ສປຊ ເປັນອົງການຈັກກະວານດຽວໃນໂລກ ແລະ ເປັນເວທີທີ່ເປີດກວ້າງໃຫ້ແກ່ປະເທດສະມາຊິກ 190 ກວ່າປະເທດ ໄດ້ມີໂອກາດສະແດງທັດສະນະ ແລະ ຈຸດຢືນຂອງຕົນເພື່ອປຶກສາຫາລື, ຊອກຊ່ອງທາງ ແລະ ຮູບແບບຂອງການແກ້ໄຂບັນຫາສາກົນ ແລະ ພາກພື້ນ ທັງເປັນການສ້າງ ແລະ ຮັບຮອງເອົາມາດຕະການສາກົນ ເພື່ອສົ່ງເສີມການຮ່ວມມືຂອງສາກົນ ທີ່ນັບມື້ນັບມີປະສິດທິຜົນດີຂຶ້ນ.
ສຳລັບສປປ ລາວ, ປີນີ້ ເປັນປີຄົບຮອບ 60 ປີ ຂອງການຮ່ວມມື ລາວ-ສປຊ, ໂດຍສະເພາະເປັນເວລາທີ່ມີການຮ່ວມມືທີ່ນັບມື້ນັບໄດ້ມີການ ພັດທະນາ ໄປໃນທາງທີ່ມີປະສິດທິຜົນຍິ່ງຂຶ້ນ ແລະ ສ້າງຄວາມໄວ້ເນື້ອເຊື່ອໃຈກັນດີຂຶ້ນຢ່າງເປັນລໍາດັບ. ການເຄື່ອນໄຫວໃນເວທີ ສປຊ ຂອງ ສປປລາວ ຂອງພວກເຮົາໃນທຸກລະດັບຢ່າງຫ້າວຫັນນັ້ນ ໄດ້ສະແດງອອກໃຫ້ເຫັນບົດບາດຂອງຕົນ ໃນຖານະເປັນປະເທດສະມາຊິກທີ່ເກົ່າແກ່ ຫ້າວຫັນໃນອົງກອນຕ່າງໆ ຂອງອົງການ ສປຊ ລວມທັງການເປັນປະທານກຸ່ມຕ່າງໆ ເຊັ່ນ: ປະທານກຸ່ມບັນດາປະເທດກໍາລັງພັດທະນາທີ່ບໍ່ມີຊາຍແດນຕິດທະເລ, ເປັນສະມາຊິກສະພາບໍລິຫານງານ ຂອງອົງການ ສປຊ ເພື່ອການພັດທະນາ ແລະ ກອງທຶນປະຊາກອນ (UNDP/UNFPA) ແລະ ສະມາຊິກສະພາບໍລິຫານອົງການ ສປຊ ກອງທຶນເພື່ອແມ່ ແລະ ເດັກ (UNICEF) ແລະ ເປັນປະທານກອງປະຊຸມສາກົນຕ່າງໆ ໃນຂອບ ສປຊ, ອັນໄດ້ເຮັດໃຫ້ບົດບາດຂອງ ສປປ ລາວ ສູງເດັ່ນຂຶ້ນໃນເວທີສາກົນ. ການພົວພັນຮ່ວມມື ລະຫວ່າງ ສປປ ລາວ ແລະ ອົງການ ສປຊ ໄດ້ເຕີບໃຫຍ່ຂະຫຍາຍຕົວຂຶ້ນມາເປັນລໍາດັບ. ການມາຢ້ຽມຢາມເປັນທາງການຂອງເລຂາທິການໃຫຍ່ ອົງການ ສປຊ ໃນປີ 2009 ແລະ ການນໍາຂັ້ນສູງຂອງບັນດາອົງການເຄື່ອຂ່າຍ ສປຊ ໄດ້ມາຢ້ຽມຢາມ ລາວ ຢ່າງເປັນປະຈໍາ ແນໃສ່ຊຸກຍູ້ ແລະ ສົ່ງເສີມການຮ່ວມມື ລະຫວ່າງ ສປປລາວ ແລະ ອົງການ ສປຊ ອັນໄດ້ເຮັດໃຫ້ ສປປ ລາວ ສືບຕໍ່ໄດ້ຮັບການຊ່ວຍເຫລືອ ແລະ ສະໜັບສະໜູນດ້ານທຶນຮອນ ແລະ ເຕັກນິກວິຊາການຈາກອົງການ ເຄືອຂ່າຍ ສປຊ ຢ່າງສະເໝີຕົ້ນ ສະເໝີປາຍຕະຫລອດມາ.
ບົນພື້ນຖານຂອງຄວາມໄວ້ເນື້ອເຊື່ອໃຈ ແລະ ການຮ່ວມມືຢ່າງແໜ້ນແຟ້ນດັ່ງກ່າວນີ້ ອົງການເຄືອຂ່າຍສະຫະປະຊາຊາດຢູ່ ສປປ ລາວ ໄດ້ປະກອບສ່ວນອັນສໍາຄັນເຂົ້າ ໃນການພັດທະນາເສດຖະກິດ-ສັງຄົມ ຂອງປະເທດພວກເຮົາ. ອົງການເຄື່ອຂ່າຍທີ່ມີຫ້ອງການຜູ້ຕາງໜ້າປະຈໍາ ລາວ ແລະ ອົງການອີກຈຳນວນຫນຶ່ງທີ່ມີສຳນັກງານປະຈໍາຢູ່ພາກພື້ນ ໄດ້ສືບຕໍ່ໃຫ້ການສະໜັບສະໜູນຊ່ວຍເຫລືອສປປລາວ ໂດຍສະເພາະໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ເປັນຕົ້ນດ້ານສາທາລະນະສຸກ, ການສຶກສາ, ການພັດທະນາຊົນນະບົດກໍຄື ການປະຕິບັດເປົ້າໝາຍສະຫັດສະວັດດ້ານການພັດທະນາ ເພື່ອປະກອບສ່ວນໃນການສ້າງເງື່ອນໄຂ ໃຫ້ປະເທດພວກເຮົາຫລຸດພົ້ນອອກຈາກສະຖານະພາບປະເທດດ້ອຍພັດທະນາ ໃນປີ 2020.
ພໍ່ແມ່ພີ່ນ້ອງ ທີ່ຮັກແພງ ທັງຫລາຍ
ວົງຄະນາ ຍາດສາກົນ ໄດ້ພ້ອມກັນສຸມໃສ່ປະຕິບັດເປົ້າໝາຍສະຫັດສະວັດດ້ານການພັດທະນາ ໃຫ້ມີຜົນສຳເລັດພາຍ ໃນທ້າຍປີ 2015 ນີ້ ແລະ ຜູ້ນຳໂລກ ຫາກໍໄດ້ຮັບຮອງເອົາວາລະການພັດທະນາ ຫລັງປີ 2015 ແລະ ເປົ້າໝາຍການພັດທະນາແບບຍືນຍົງ ເຊິ່ງມີຂອບເວລາການຈັດຕັ້ງປະຕິບັດເຖິງປີ 2030 ໂດຍປະກອບມີ 17 ເປົ້າໝາຍ ແລະ 169 ຄາດໝາຍສູ້ຊົນ ທີ່ກວມເອົາ 3 ດ້ານຄື: ດ້ານເສດຖະກິດ, ສັງຄົມ ແລະ ສິ່ງແວດລ້ອມເລີ້ມເຂົ້າສູ່ການປະຕິບັດ ນັບແຕ່ວັນທີ 1 ມັງກອນ 2016 ເປັນຕົ້ນໄປ. ເປົ້າໝາຍສູງສຸດຂອງວາລະການພັດທະນາຂອງສາກົນດັ່ງກ່າວ ແມ່ນແນໃສ່ລຶບລ້າງຄວາມທຸກຍາກ, ຫລຸດຜ່ອນຄວາມບໍ່ສະເໝີພາບ, ສ້າງຄວາມຈະເລີນຮຸ່ງເຮືອງ ແລະ ປົກປັກຮັກສາສິ່ງແວດ ລ້ອມໃຫ້ຍືນຍົງ ໂດຍໃຫ້ແທດເໝາະກັບສະພາບເງື່ອນໄຂຕົວຈິງດ້ານການພັດທະນາໃນລະດັບປະເທດ ແລະ ສາມາດນຳໃຊ້ໄດ້ກັບທຸກປະເທດ ບໍ່ວ່າຈະເປັນປະເທດນ້ອຍ,ໃຫຍ່, ພັດທະນາແລ້ວ ຫລື ກໍາລັງພັດທະນາ ເຊິ່ງຖືເປັນບາດລ້ຽວໃໝ່ຂອງການຮ່ວມມືເພື່ອການພັດທະນາຂອງສາກົນ. ສປປ ລາວ ພວກເຮົາ ໂດຍຜ່ານການຮ່ວມມືສະໜັບສະໜູນຈາກວົງຄະນະຍາດສາກົນ ເວົ້າລວມ, ເວົ້າສະເພາະຈາກອົງການເຄື່ອຂ່າຍ ສປຊ ກໍຈະພ້ອມກັນຈັດຕັ້ງຜັນຂະຫຍາຍເປົ້າຫມາຍການພັດທະນາແບບຍືນ ຍົງດັ່ງກ່າວໃຫ້ສຳເລັດຜົນ ເພື່ອສ້າງສາພັດທະນາປະເທດຊາດຂອງພວກເຮົາ ໃຫ້ມີຄວາມຈະເລີນກ້າວໜ້າ ນຳເອົາຜົນປະໂຫຍດຕົວຈິງມາສູ່ປະຊາຊົນລາວທຸກຖ້ວນໜ້າຕາມກໍານົດເວລາທີ່ວາງໄວ້.
ໃນປີນີ້, ລັດຖະບານ ຮ່ວມກັບອົງການ ສປຊ ຈະຈັດຕັ້ງກອງປະຊຸມໂຕະມົນລະດັບສູງ ຄັ້ງທີ 12 ຂຶ້ນໃນວັນທີ 27 ພະຈິກ ເພື່ອປຶກສາຫາລືແບບມີສ່ວນຮ່ວມ ລະຫວ່າງລັດຖະບານລາວ ກັບຄູ່ຮ່ວມພັດທະນາ ແນໃສ່ເຮັດໃຫ້ຄູ່ຮ່ວມພັດທະນາ ໄດ້ມີໂອກາດສະເໜີຄໍາຄິດເຫັນ ແລະ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8 ເພື່ອເຮັດໃຫ້ການຊ່ວຍເຫລືອຂອງສາກົນ ສອດຄ່ອງກັບທິດທາງ ແລະ ບູລິມະສິດດ້ານການພັດທະນາຢູ່ໃນ ສປປ ລາວ ກໍຄືຮັບປະກັນປະສິດທິພາບ ຂອງການນຳໃຊ້ການຊ່ວຍເຫລືອ ຈາກສາກົນ. ພິເສດໃນປີນີ້ ທ່ານນາງ ເຮເລັນ ຄລາກ, ຜູ້ອຳນວຍການ ໃຫຍ່ອົງການສະຫະປະຊາຊາດ ເພື່ອການພັດທະນາ, ທັງເປັນປະທານກຸ່ມພັດທະນາຂອງອົງການ ສປຊ ຈະເດີນທາງມາເຂົ້າຮ່ວມເປີດກອງປະຊຸມດັ່ງກ່າວ ແລະ ຢ້ຽມຢາມປະເທດເຮົາ ຢ່າງເປັນທາງການ ເປັນຄັ້ງທີ ສອງ, ເຊິ່ງເປັນການຢັ້ງຢືນໃຫ້ເຫັນເຖິງການເປັນຄູ່ຮ່ວມມືທີ່ເຂັ້ມແຂງ ລະຫວ່າງ ສປປ ລາວ ແລະ ອົງການ ສປຊ ໃນໄລຍະໃໝ່ນີ້. ໃນໂອກາດການສະເຫລີມສະຫລອງວັນສຳຄັນດັ່ງກ່າວນີ້, ພວກເຮົາຈະໄດ້ຮ່ວມກັນຈັດຕັ້ງຫລາຍກິດຈະກໍາເພື່ອສະເຫລີມສະຫລອງຮ່ວມ ກັບບັນດາປະຊາຊາດໃນໂລກ ລວມທັງ ການເຍືອງແສງໄຟສີຟ້າໃສ່ປະຕູໄຊ ເພື່ອເປັນສັນຍາລັກຂອງການເປັນຄູ່ຮ່ວມຂອງພວກເຮົາ ກໍຄືການຢືນຢັນຄຳໝາຍໜັ້ນຮ່ວມກັນ ເພື່ອການພັດທະນາແບບຍືນຍົງ ໃນ ສປປລາວ ກໍຄື ທົ່ວໂລກ.
ສຸດທ້າຍນີ້, ຂ້າພະເຈົ້າ ຂໍສະແດງຄວາມຂອບໃຈຢ່າງຈິງໃຈ ແລະ ຝາກຄໍາອວຍພອນໄຊ ອັນປະເສີດມາຍັງບັນດາທ່ານຜູ້ນຳ, ພະນັກງານ, ທະຫານ, ຕຳຫລວດ, ນັກທຸລະກິດ, ຜູ້ປະກອບການ ແລະ ປວງຊົນລາວ ທຸກຖ້ວນໜ້າ ທັງຢູ່ພາຍໃນ ແລະ ຕ່າງປະເທດ ກໍຄືຊາວຕ່າງປະເທດທີ່ກໍາລັງປະຕິບັດໜ້າທີ່ ແລະ ດຳລົງຊີວິດຢູ່ ສປປ ລາວ ຈົ່ງມີສຸຂະພາບເຂັ້ມແຂງ, ປະສົບຜົນສຳເລັດໃນໜ້າທີ່ວຽກງານຂອງຕົນ ແລະ ຮ່ວມກັນສະເຫລີມ ສະຫລອງວັນສ້າງຕັ້ງອົງການສະຫະປະຊາຊາດ ຄົບຮອບ 70 ປີ ແລະ ຄົບຮອບ 60 ປີ ຂອງການຮ່ວມມືລາວ-ສປຊ ຢ່າງມີຄວາມໝາຍ ແລະ ມີເນື້ອໃນເລິກເຊິ່ງ. ສປປ ລາວ ຫວັງວ່າຈະສືບຕໍ່ໄດ້ຮັບການຮ່ວມມື, ສະໜັບສະໜູນ ຊ່ວຍເຫລືອຢ່າງໃກ້ຊິດຈາກອົງການສະຫະປະຊາຊາດ ໃນຊຸມປີຕໍ່ຫນ້າ.
ແຫລ່ງຂ່າວ:
