ນາຊ່າ ເຜີຍຮູບແບບຫລ້າສຸດຂອງ SLS ຫລື ຈະຫລວດຂົນສົ່ງອາວະກາດລຸ້ນໃໝ່ທີ່ຈະພາມະນຸດໄປສຳຫລວດດາວອັງຄານແລະອາວະກາດເຊີງເລິກ ຫລັງສຳເລັດສິ້ນກະບວນການອອກແບບສ່ວນທີ່ສຳຄັນ (CDR) ຊີ້ ປະສິດທິພາບດີທີ່ສຸດນັບຕັ້ງແຕ່ມີຈະຫລວດແຊດເທິນໄຟເມື່ອເກືອບ 40 ປີກ່ອນ
ເປັນເທື່ອທຳອິດໃນຮອບເກືອບ 40 ປີ ທີ່ນາຊ່າສຳເລັດສິ້ນຂັ້ນຕອນການທາບທາມຄວາມປອດໄພ ແລະ ການອອກແບບສ່ວນທີ່ສຳຄັນ critical design review (CDR) ສຳລັບ SLS : Space Launch System (ເອັສແອນເອັສ: ສະເປຈລອນຊິດເຕັມ) ໂດຍຫນ່ວຍງານດ້ານອາວະກາດ ເປີດຕົວຍານພາຫະນະທີ່ອອກແບບມາເພື່ອສະໜອງຕໍ່ຄວາມທ້າທາຍໃນການເດີນທາງໄປດາວອັງຄານ ແລະ ຍັງເປັນຈະຫລວດແບບທຳອິດທີ່ໃຊ້ເພື່ອການສຳຫລວດອາວະກາດນັບຕັ້ງແຕ່ ແຊດ ເທິນໄຟ (Saturn V) ຈະຫລວດນ້ຳມັນແບບ 3 ທ່ອນ ທີ່ໃຊ້ໃນໂຄງການອະພອນໂລ ເພື່ອພາມະນຸດໄປດວງຈັນຍຸກທົດສະວັດທີ່ 70
ເຄື່ອງຈັກຈະຫລວດແບບ RS-25 ຈຳນວນ 4 ຕົວ ທີ່ຕິດກັບ SLS ຂຶ້ນທີ່ 1 ພາບຈາກນາຊາ
SLS ຖືເປັນຈະຫລວດທີ່ມີປະສິດທິພາບຫລາຍທີ່ສຸດ ເທົ່າທີ່ເຄີຍມີການສ້າງມາ ມັນອອກແບບມາເພື່ອໃຊ້ກັບຍານອາວະກາດໂອໄລອອນ (Orion Multi-Propose Crew Verhicle) ທີ່ຈະສົ່ງນັກບິນອາວະກາດຈາກເທິງແຜ່ນດິນອາເມຣິກາ ອີກທັງຍັງເປີດຍຸກໃໝ່ຂອງການສຳຫລວດອາວະກາດນອກໂລກ ໂດຍພາບ CDR ຂອງນາຊ່າຫລ້າສຸດ ຈະເຫັນເຖິງຮູບລັກສະນະໃໝ່ຫລັງຈາກທີ່ໄດ້ອອກແບບພັດທະນາລະບົບການປ່ອຍຍານ ກ່ອນທີ່ຈະນຳໄປຜະລິດຂຶ້ນມາໃຊ້ງານແທ້
ບິນ ຮິນ ຮອງຜູ້ອຳນວຍການ ຝ່າຍພັດທະນາລະບົບສຳຫລວດ ນາຊ່າ ກ່າວວ່າ ເຮົາໄດ້ຕອກຕະປູເພື່ອການອອກແບບຂອງ SLS ເຮົາປະສົບຄວາມສຳເລັດໃນການທົດສອບເຄື່ອງຈັກ ແລະ ຈະຫລວດຂັບຍູ້ຮອບທຳອິດ ລວມທັງສ່ວນສຳຄັນທັງໝົດສຳລັບການບິນໃນຖ້ຽວທຳອິດ ໂດຍຂະນະນີ້ທັງໝົດຢູ່ໃນຂັ້ນຕອນການຜະລິດແລ້ວ ຢ່າງໃດກໍຕາມຍັງມີຄວາມທ້າທາຍອີກຫລວງຫລາຍລໍຖ້າຢູ່ໃນພາຍໜ້າ ແຕ່ການກວດສອບເທື່ອສຸດທ້າຍນີ້ເຮັດໃຫ້ເຮົາເຊື່ອວ່າ ເຮົາຍ່າງມາຖືກທາງ ສຳລັບຖ້ຽວບິນທຳອິດຂອງ SLS ເພື່ອໃຊ້ຂະຫຍາຍຂອບເຂດການສະແດງການມີຕົວຕົນຂອງມະນຸດໃນຫ້ວງເລິກຂອງອາວະກາດ
ພາບຂອງສິນລະປິນທີ່ຈິນຕະນານາການ ພາບການສົ່ງ SLS ຂຶ້ນສູ່ອາວະກາດ ພາບຈາກນາຊ່າ
ຕົວຢ່າງ CDR ຂອງຈະຫລວດທີ່ປາກົດເປັນໜຶ່ງໃນ 3 ແບບທີ່ ນາຊ່າມີແຜນຈະສ້າງຂຶ້ນ ໂດຍແບບທີ່ເຜີຍເທື່ອນີ້ ຄື SLS Block 1 (ເອັສແອນເອັສ ບລັອກ 1) ທີ່ຈັດໄວ້ສຳລັບການຂົນສົ່ງຂັ້ນຕ່ຳສຸດທີ່ບໍ່ເກີນ 77 ໝື່ນກິໂລ ດ້ວຍຄວາມສາມາດຂອງຈະຫລວດທ່ອນທຳອິດ ແບບບູດເຕີລ໌ຄູ່ ແລະເຄື່ອງຈັກ RS-25 ຈຳນວນ 4 ເຄື່ອງ ໂດຍຈະຫລວດທ່ອນທຳອິດມາກັບສີສົ້ມສະດຸດຕາຄືກັບສີຂອງຖັງນ້ຳມັນໃນໂຄງການກະສວຍອາວະກາດ ໂດຍມີຈຫລວດຂັບຍູ້ເຊື້ອເພີງແຂງ (SRB) ທ່ອນສີຂາວປະຕິດດ້ານຊ້າຍແລະຂວາ ແລະລະຫວ່າງຈະຫລວດຂຶ້ນທີ່ 1 ແລະຍານອາວະກາດໂອໄລອອນ ຈະຂັ້ນດ້ວຍອະແດບເຕີລ໌ຄອບສ່ວນເຄື່ອງຈັກຂັບຍູ້ຂອງຍານໂອໄລອອນ ແລະສ່ວນເທິງສຸດ ຄື ຍານໂອໄລອອນ (Orion Multi-Propose Crew Verhicle) ພ້ອມທັງລະບົບຈະຫລວດໜີໄພ ທັງນີ້ ຈະຫລວດ SLS Block 1 ຈະພ້ອມສົ່ງຍານໂອໄລອອນສຳຫລວດດາວອັງຄານໃນປີ 2018 ແຕ່ໃນພາລະກິດ Exploration Mission 1 ຈະເປັນການສົ່ງຍານແບບບໍ່ມີຄົນຂຶ້ນໄປກ່ອນ
SLS Block 1 ທີ່ຖືກຈຳແນກອອກມາເປັນສ່ວນໆ ພາບຈາກນາຊ່າ
ແລະເພື່ອຮອງຮັບການເດີນທາງທີ່ໄກ ຫລື ການສົ່ງຍານທີ່ມີຂະໜາດໃຫຍ່ ນາຊ່າຍັງມີ SLS ແບບທີ່ອັບເກຣດຂຶ້ນມາຕົວເລືອກເພີ່ມ ເອີ້ນວ່າ SLS Block 1B (ເອັສແອນເອັສ ບລັອກ 1B) ທີ່ເພີ່ມຈະຫລວດທ່ອນທີ່ 2 ເອີ້ນວ່າ Exploration Upper Stage ພ້ອມເຄື່ອງຈັກແບບ RL-10 ສຳລັບຂົນສົ່ງໃນພາລະກິດທີ່ຕ້ອງແບກນ້ຳໜັກຫລາຍຂຶ້ນກວ່າເກົ່າ SLS Block 1B ສາມາດຂົນສົ່ງທີ່ນ້ຳໜັກບໍ່ເກີນ 115 ໝື່ນກີໂລ
SLS Block 2 ທີ່ຖືກຈຳແນກອອກມາເປັນສ່ວນໆ ພາບຈາກນາຊ່າ
ແລະ ແບບສຸດທ້າຍ SLS Block 2 (ເອັສແອນເອັສ ບລັອກ 2) ອອກແບບມາເພື່ອໃຊ້ສົ່ງຍານລຳລຽງ (ຄາລ໌ໂກ້) ໄປຍັງດາວອັງຄານ ຫລື ສະໜັບສະໜູນການສຳຫລວດຫ້ວງເລິກຂອງອາວະກາດ ໂດຍມີສ່ວນຈະຫລວດທ່ອນທີ່ 2 ທີ່ເປັນ Exploration Upper Stage ພ້ອມເຄື່ອງຈັກແບບ RL-10 ໂດຍ Block 2 ຈະແຕກຕ່າງຈາກ 2 ລຸ້ນທຳອິດ ເພາະໃຊ້ຈະຫລວດຂັບຍູ້ ຫລື ລັອກເກັດບູດເຕີລ໌ແບບໃໝ່ ທີ່ໃຊ້ເຊື້ອເພີງແຂງຫລືເຊື້ອເພີງແຫລວທີ່ທັນສະໄໝເພື່ອເພີ່ມນຳໜັກເປັນ 130 ໝື່ນກິໂລ ທັງນີ້ ຈະຫລວດ SLS ຂອງນາຊ່າທັງ 3 ແບບ ຈະໃຊ້ສ່ວນຈະຫລວດທ່ອນທຳອິດແບບດຽວກັນ ແລະ ມີເຄື່ອງຈັກຈະຫລວດແບບ RS-25 ຈຳນວນ 4 ຕົວ.
