ເອເອັບພີ – ແຂວງອາເຈະຂອງອິນໂດນີເຊຍຈະເລີ່ມໃຊ້ບົດລົງໂທດ “ຕີ 100 ເທື່ອ” ສຳລັບມຸດສະລິມທີ່ມີເພດສຳພັນກັບຄົນເພດດຽວກັນຊຶ່ງຖືວ່າຜິດຫລັກສາດສະໜາອິດສະລາມ ໂດຍຈະເລີ່ມບັງຄັບໃຊ້ຕັ້ງແຕ່ມື້ອື່ນນີ້ 23 ຕຸລາ ທ່າມກາງສຽງວິຈານຈາກນັກສິດທິມະນຸດທີ່ເບີ່ງວ່າກົດໝາຍດັ່ງກ່າວ “ຂາດມະນຸດສະຍະທຳ”
ຊາລິຊານ ອັບບາດ ຫົວໜ້າຝ່າຍກົດໝາຍອິດສະລາມ ປະຈຳແຂວງອາເຈະ ລະບຸວ່າ ການມີເພດສຳພັນລະຫວ່າງຜູ້ຊາຍ ຫລື “ການລູບສ່ວນຕ່າງໆ ລະຫວ່າງຜູ້ຍິງນຳກັນເພື່ອກະຕຸ້ນອາລົມທາງເພດ” ຖືເປັນພຶດຕິກຳຕ້ອງຫ້າມໃນອິດສະລາມ ຊຶ່ງກົດຂໍ້ນີ້ຖືກບັງຄັບໃຊ້ກັບຊາວມຸດສະລິມທຸກຄົນໃນອາເຈະ ບໍ່ເວັ້ນແຕ່ຊາວຕ່າງຊາດ
ກົດໝາຍສະບັບນີ້ຜ່ານການອະນຸມັດຈາກສະພາບໍລິຫານແຂວງອາເຈະເມື່ອປີ 2014 ທ່າມກາງສຽງຕິເຕືອນຈາກອົງກອນດ້ານສິດທິມະນຸດ ແຕ່ເຈົ້າໜ້າທີ່ໄດ້ໃຫ້ເວລາ 1 ປີເພື່ອຊີ້ແຈງຂໍ້ມູນແກ່ສາທາລະນະຊົນກ່ອນທີ່ຈະເລີ່ມບັງຄັບໃຊ້
“ກົດໝາຍຂໍ້ນີ້ມີວັດຖຸປະສົງເພື່ອຮັກສາສັກສີຄວາມເປັນມະນຸດ ແລະ ປ້ອງກັນບໍ່ໃຫ້ຊາວມຸດສະລິມໃນອາເຈະປະພຶດຜິດສິນລະທຳ” ອັບບາດຖະແຫລງມື້ນີ້ 22 ຕຸລາ
ການມີເພດສຳພັນແບບໄມ້ປ່າດຽວກັນບໍ່ຖືເປັນຄວາມຜິດໃນແຂວງອື່ນໆ ຂອງອິນໂດນີເຊຍ ຊຶ່ງຢຶດປະມວນກົດໝາຍອາຍາຂອງເນເທີລ໌ແລນດ໌ເປັນຕົ້ນແບບ
ອາເຈະເປັນແຂວງດຽວໃນອິນໂດນີເຊຍທີ່ນຳກົດໝາຍຊາລີອະມາບັງຄັບໃຊ້ແບບຄ່ອຍເປັນຄ່ອຍໄປ ຫລັງໄດ້ຮັບອຳນາດປົກຄອງຕົນເອງເພີ່ມຂຶ້ນໃນປີ 2001 ໂດຍກ່ອນໜ້ານີ້ໄດ້ເລີ່ມບັງຄັບໃຊ້ກົດໝາຍຫ້າມການບໍລິໂພກເຄື່ອງດື່ມແອນກໍຮໍ ການພະນັນ ການປະຕິສຳພັນລະຫວ່າງຊາຍ ແລະ ຍິງທີ່ຍັງບໍ່ໄດ້ແຕ່ງງານ ລວມໄປເຖິງການສະແດງຄວາມຮັກ ເຊັ່ນ ການສຳຜັດຫລືຈູບ ລະຫວ່າງບຸກຄົນທີ່ບໍ່ແມ່ນຜົວເມຍກັນ
ກົດໝາຍໃໝ່ຊຶ່ງກຳລັງຈະມີຜົນບັງຄັບໃຊ້ຍັງກຳນົດໂທດຕີ 100 ເທື່ອສຳລັບບຸກຄົນທີ່ “ມີຊູ້” ສ່ວນຜູ້ທີ່ກ່າວຫາຄົນອື່ນວ່າມີຊູ້ໂດຍບໍ່ມີຫລັກຖານຈະມີໂທດຕີ 80 ເທື່ອ
ທັງນີ້ ການຕີໃນອາເຈະມັກຈະໃຊ້ໄມ້ທີ່ຍາວ ແລະ ບາງ ໂດຍມີຈຸດປະສົງເພື່ອໃຫ້ຜູ້ກະທຳຜິດຮູ້ສຶກອັບອາຍຫລາຍກວ່າຄວາມເຈັບປວດທາງກາຍ ແລະ ຫາກບໍ່ຕ້ອງການຖືກຕີກໍຈະຕ້ອງເສຍຄ່າປັບເປັນທອງຄຳ ຫລືຮັບໂທດຈຳຄຸກແທນ
ອິດມາອີນ ຮາຊານີ ນັກເຄື່ອນໄຫວຈາກສະຖາບັນເພື່ອປະຊາທິປະໄຕ ແລະ ສັນຕິພາບເຊຕາລາ (Setara Institute for Democracy and Peace) ວິຈານກົດໝາຍໃໝ່ຂອງອາເຈະວ່າ “ປ່າເຖື່ອນ ຂາດມະນຸດສະຍະທຳ ແລະຂັດຕໍ່ລັດທະທຳມະນູນຂອງປະເທດ”
“ລັດຖະບານບໍ່ຄວນໄປຍຸ່ງກ່ຽວກັບການໃຊ້ຊີວິດສ່ວນຕົວຂອງປະຊາຊົນ ແຕ່ຄວນມີນະໂຍບາຍຮັບຮອງສິດທິແລະ ເສລີພາບຂອງພົນລະເມືອງຫລາຍກວ່າ” ພວກເຂົາກ່າວ