ທີມງານຊ່ຽວຊານຂອງໂຄງການໄຈກ້າ ພ້ອມດ້ວຍບໍລິສັດເອກະຊົນຈາກປະເທດຍີ່ປຸ່ນ ໄດ້ນຳເອົາລະບົບເທັກໂນໂລຊີແບບໃໝ່ຂອງປະເທດຍີ່ປຸ່ນ ເຂົ້າມານຳໃຊ້ໃນການປັບປຸງສະພາບການຈະລາຈອນແອອັດຕາມຖະໜົນ ໃນນະຄອນຫຼວງວຽງຈັນ (ນວ) ເຊິ່ງລະບົບດັ່ງກ່າວ ກໍ່ຄືລະບົບຕິດຕາມການໃຫ້ບໍລິການລົດເມ ແລະ ລະບົບກວດສອບສະພາບຈະລາຈອນຕາມຖະໜົນ ສຳລັບລະບົບດັ່ງກ່າວແມ່ນທາງໂຄງການ ໄດ້ມີການຕິດຕັ້ງສູນຄວບຄຸມບໍລິຫານຈັດການ ຢູ່ທີ່ຫ້ອງການສະຖານີລົດເມຕະຫຼາດເຊົ້າ.
ວັນທີ 13 ຕຸລາ 2015 ທາງອົງການໄຈກ້າປະຈຳລາວ ສະຖານທູດປະເທດຍີ່ປຸ່ນປະຈຳລາວ ແລະ ກະຊວງໂຍທາທິການ ແລະ ຂົນສົ່ງ ໄດ້ລົງສຳຫຼວດ ແລະ ຕິດຕາມເບິ່ງການເຮັດວຽກຂອງລະບົບດັ່ງກ່າວ ທີ່ຫ້ອງການສະຖານີລົດເມຕະຫຼາດເຊົ້າ ທາງທີມງານອົງການໄຈກ້າ ໄດ້ດຳເນີນຕິດຕັ້ງລະບົບຕິດຕາມບໍລິການລົດເມ ນອກຈາກຈະເພີ່ມຄວາມສະດວກສະບາຍ ໃນການບໍລິຫານຈັດການບໍລິການລົດເມ ໃຫ້ມີປະສິດທິພາບຫຼາຍຂຶ້ນກວ່າເກົ່າແລ້ວ ຍັງສາມາດຊ່ວຍໃຫ້ຜູ້ໂດຍສານ ຫຼື ປະຊາຊົນມີຄວາມສະດວກສະບາຍໃນການຕິດຕາມລົດເມ ໃນແຕ່ລະເສັ້ນທາງທີ່ລົດເມແລ່ນ ໃນ ນວ ໂດຍບໍ່ຈຳເປັນຕ້ອງເສຍເວລາຖ້າລົດເມເປັນເວລາດົນອີກຕໍ່ໄປ ນອກນີ້ ຍັງຈະສາມາດຊ່ວຍການຄວບຄຸມການຈະລາຈອນຕາມຖະໜົນໄດ້ ປັດຈຸບັນ ປະຊາຊົນສາມາດເຂົ້າໃຊ້ບໍລິການດັ່ງກ່າວໄດ້ແລ້ວ ທີ່ເວບໄຊ: http://lao.busnavi.asia ໂດຍຜ່ານໂທລະສັບມືຖືສະມາດໂຟນ ແລະ ຄອມພີວເຕີທຸກລຸ້ນຂອງທ່ານ ໂດຍບໍ່ຕ້ອງເສຍຄ່າໃຊ້ຈ່າຍໃດໆ ພຽງແຕ່ໂທລະສັບຂອງທ່ານມີສັນຍານອິນເຕີເນັດເທົ່ານັ້ນ.
ແຕ່ເຖິງຢ່າງໃດກໍ່ຕາມການຕິດຕັ້ງລະບົບດັ່ງກ່າວ ຈະມີຄວາມແຕກຕ່າງຈາກການນຳໃຊ້ທົ່ວໄປ ເຊັ່ນວ່າ: ຂໍ້ມູນຕຳແໜ່ງຂອງລົດເມ ຄວາມໄວ ແລະ ລວມເຖິງຈຳນວນຜູ້ເຂົ້ານຳໃຊ້ ແມ່ນຈະສາມາດເຂົ້າໄປເບິ່ງໄດ້ ສະເພາະພະນັກງານທີ່ຮັບຜິດຊອບເທົ່ານັ້ນ ສະນັ້ນ ການສະແດງຂໍ້ມູນບອກຕຳແໜ່ງຂອງລົດເມ ທີ່ສາມາດກວດສອບໄດ້ທຸກເວລາ ນອກນີ້ ກໍ່ຍັງສາມາດກວດສອບສະພາບການຈະລາຈອນຕິດຂັດຕາມຖະໜົນ ເຊິ່ງອຸປະກອນສົ່ງສັນຍານຂອງລະບົບ ແມ່ນໄດ້ມີການຕິດຕັ້ງຕາມຈຸດສີ່ແຍກສຳຄັນໃນ ນວ ລະບົບນີ້ຈະຊ່ວຍໃຫ້ປະຊາຊົນສາມາດກວດສອບ ເບິ່ງສະພາບການຈະລາຈອນຕາມຈຸດສຳຄັນໃນຕົວເມືອງ ໄດ້ຢ່າງສະດວກສະບາຍ.
ດັ່ງນັ້ນ ລັດວິສາຫະກິດລົດເມ ແລະ ຜູ້ນຳໃຊ້ລົດເມ ກໍ່ຈະສາມາດບໍລິຫານຈັດການຕິດຕາມ ກວດສອບຈຸດຕຳແໜ່ງລົດເມໄດ້ສະດວກສະບາຍ ແລະ ເຊັ່ນດຽວກັນກັບການຫຼີກລ່ຽງສະພາບການຈະລາຈອນຕິດຂັດ ສຳລັບຄວາມຄາດຫວັງ ກໍ່ຫວັງວ່າລະບົບທັງສອງນີ້ ຈະຊ່ວຍໃຫ້ຈຳນວນຜູ້ນຳໃຊ້ລົດເມເພີ່ມຂຶ້ນ ແລະ ສົ່ງເສີມໃຫ້ຄົນຫັນມານຳໃຊ້ລົດເມສາທາລະນະຫຼາຍຂຶ້ນ ແທນການນຳໃຊ້ລົດສ່ວນຕົວ ແລະ ນອກຈາກນີ້ ລັດວິສາຫະກິດລົດເມ ຍັງໄດ້ມີການນຳເອົາລະບົບບັດລົດເມສຳລັບນັກຮຽນ-ນັກສຶກສາໃນ ນວ ຕັ້ງແຕ່ເດືອນພະຈິກ 2014 ເຊິ່ງໄດ້ຮັບການຊ່ວຍເຫຼືອຈາກອົງການໄຈກ້າ ແລະ ສິ້ນສຸດໂຄງການໄລຍະທຳອິດແມ່ນເດືອນມີນາ 2015 ແຕ່ຈະສືບຕໍ່ນຳໃຊ້ບັດລົດເມນັກສຶກສາ.
ແຫລ່ງຂ່າວ:
