ແຂວງຊຽງຂວາງ, ໄດ້ຈັດພິທີປະກາດຈົບຊັ້ນມັດທະຍົມຕອນຕົ້ນບຳລຸງໃຫ້ປະຊາຊົນບັນດາເຜົ່າທົ່ວແຂວງເມື່ອທ້າຍອາທິດຜ່ານມານີ້ ແລະ ເປັນແຂວງອັນດັບ 2 ຂອງປະເທດຖັດຈາກແຂວງໄຊຍະບູລີທີ່ໄດ້ປະກາດຈົບຊັ້ນມັດທະຍົມຕອນຕົ້ນບໍາລຸງຢ່າງເປັນທາງການ, ໂດຍການເຂົ້າຮ່ວມຂອງທ່ານຮອງນາຍົກລັດຖະມົນຕີ,ລັດຖະມົນຕີວ່າການກະຊວງສຶກສາທິການ ແລະ ກິລາ ດຣ ພັນຄໍາ ວິພາວັນ, ທ່ານເຈົ້າແຂວງຊຽງຂວາງ ສຈ.ດຣ ສົມກົດ ມັງໜໍ່ເມກ, ມີບັນດາການນຳແຂວງ, ຄູອາຈານ, ແລະ ນັກຮຽນ-ນັກສຶກເຂົ້າຮ່ວມເປັນຈໍານວນຫລາຍ.
ທ່ານ ບົວລີ ພັນນາວົງ ຫົວໜ້າພະແນກສຶກສາທິການ ແລະ ກິລາ ແຂວງຊຽງຂວາງໃຫ້ຮູ້ວ່າ: ການຈັດຕັ້ງປະຕິບັດວຽກງານບຳລຸງຍົກລະດັບການສຶກສາໃຫ້ປະຊາຊົນບັນດາເຜົ່າຢູ່ແຂວງຊຽງຂວາງໃນໄລຍະ 7 ປີຜ່ານມາ (2008-2015) ໄດ້ຈັດການຮຽນ-ການສອນຊັ້ນມັດທະຍົມສຶກສາຕອນຕົ້ນບຳລຸງໃຫ້ກຸ່ມເປົ້າໝາຍໃນເກນອາຍຸ 15-35 ປີ,ມີຜູ້ຮຽນຈົບທັງໝົດ 15.084 ຄົນ, ຍິງ 7.639 ຄົນ, ສາມາດປະກາດຈົບຊັ້ນມັດທະຍົມສຶກສາຕອນຕົ້ນບຳລຸງໄດ້ 8 ເມືອງນັບທັງເມືອງທ່າໂທມແຂວງໄຊສົມບູນ.
ປັດຈຸບັນປະຊາກອນກຸ່ມເປົ້າໝາຍມີລະດັບການສຶກສາຈົບຊັ້ນມັດທະຍົມສຶກສາຕອນຕົ້ນທັງໝົດ 103.293 ຄົນ, ຍິງ 50.442 ຄົນເທົ່າກັບ 98,63% (ທຽບໃສ່ປະຊາກອນໃນເກນອາຍຸ 15-35 ປີ). ຜົນສໍາເລັດດັ່ງກ່າວນັ້ນ, ໄດ້ສ້າງປະໂຫຍດອັນໃຫຍ່ຫລວງໃຫ້ປະຊາຊົນບັນດາເຜົ່າທົ່ວແຂວງຊຽງຂວາງ, ໂດຍສະເພາະເຮັດໃຫ້ຜູ້ທີ່ບໍ່ຮູ້ໜັງສືໃນເມື່ອກ່ອນສາມາດອ່ານໄດ້ຂຽນເປັນ, ຫຼຸດພົ້ນອອກຈາກຄວາມໂງ່ຈ້າຫລ້າຫລັງ,ສາມາດນຳໃຊ້ຄວາມຮູ້ເຂົ້າໃນການດຳລົງຊີວິດປະຈຳວັນ ເພື່ອພັດທະນາຄຸນນະພາບຊີວິດຂອງປະຊາຊົນໃຫ້ດີຂຶ້ນ,ພ້ອມນັ້ນຍັງເປັນກຳລັງແຮງອັນສຳຄັນເພື່ອປະກອບສ່ວນເຂົ້າໃນການປົກຮັກສາ ແລະ ສ້າງສາພັດທະນາປະເທດຊາດ,ໂດຍສະເພາະແມ່ນພັດທະນາແຂວງຊຽງຂວາງໃຫ້ມີຄວາມຈະເລີນຮຸ່ງເຮືອງຂຶ້ນໄປເລື້ອຍໆ.
ແຫລ່ງຂ່າວ:
