ສາດສະດາຈານ George Church ແລະທີມງານ ໃຊ້ວິທີການທີ່ເອີ້ນວ່າ “Crispr” ເພື່ອປັບປ່ຽນໂຄງສ້າງຂອງເຊລ໌ຮ່າງກາຍໝູ ໃຫ້ມີຄວາມເໝາະສົມສຳລັບຮ່າງກາຍຂອງມະນຸດ
ໃນໄລຍະທຳອິດຂອງການວິໄຈໃນເທື່ອນີ້ ເພື່ອແກ້ໄຂບັນຫາກ່ຽວກັບການຕໍ່ຕ້ານແລະການຕິດເຊື້ອທີ່ເກີດຈາກໄວຣັດຊຶ່ງຝັງຢູ່ໃນ DNA ຂອງໝູ ຫລາຍປີທີ່ຜ່ານໄປສຳລັບງານວິໄຈ ເຮັດໃຫ້ພົບວ່າໝູທີ່ໄດ້ຮັບການດັດແປງພັນທຸກຳ ມີອະໄວຍະວະທີ່ເໝາະສົມກັບມະນຸດຫລາຍຂຶ້ນ ຊຶ່ງອາດເປັນອີກທາງເລືອກໜຶ່ງໃຫ້ກັບການແກ້ບັນຫາຂາດແຄນຜູ້ບໍລິຈາກອະໄວຍະວະໄດ້
“Crispr” ເປັນວິທີການທາງວິທະຍາສາດທີ່ຂ້ອນຂ້າງໃໝ່ ຊຶ່ງຊ່ວຍໃຫ້ນັກວິທະຍາສາດສາມາດຕັດແຕ່ງແລະຫລິ້ນກັບ DNA ຊຶ່ງເປັນລະຫັດຂອງຊີວິດໄດ້ ໃນຕອນທຳອິດສາດສະດາຈານ Church ຈາກມະຫາວິທະຍາໄລຮາວາດ ໄດ້ໃຊ້ມັນເພື່ອຢຸດຣີໂຊໄວຣັດ (Retrovirus) ເຊັ່ນພະຍາດໄຂ້ຫວັດໝູ ອັນເກີດໄດ້ຈາກການຖ່າຍທອດ DNA ຂອງໝູ ຜົນການທົດລອງໃນແລັບ ພົບວ່າໄວຣັດຊະນິດນີ້ສາມາດເກີດຂຶ້ນໃນປະຕິກິລິຍາລະຫວ່າງເຊລ໌ຂອງໝູກັບເຊລ໌ຂອງມະນຸດໄດ້
ໃນການທົດສອບໄລຍະທຳອິດທີ່ໃຊ້ໝູອ່ອນ ສາດສະດາຈານ Church ສາມາດກຳຈັດຣີໂຊໄວຣັດ 62 ຕົວຢ່າງຂອງໃນເຊລ໌ໝູໄດ້ດ້ວຍວິທີການ Crispr ຈາກນັ້ນພວກເຂົາຈຶ່ງກວດສອບເຊລ໌ຂອງໝູທີ່ໄດ້ຮັບການຕັດແຕ່ງພັນທຸກຳດ້ວຍວິທີການດັ່ງກ່າວ ວ່າຈະເຮັດໃຫ້ເກີດພະຍາດໄຂ້ຫວັດໝູ ຫລືປະຕິກິລິຍາຕໍ່ຕ້ານເພື່ອພົບເຊລ໌ມະນຸດຫລືບໍ່ ແລະພົບວ່າບໍ່ເກີດປະຕິກິລິຍາຕໍ່ຕ້ານໃດໆ ລະຫວ່າງເຊລ໌ໝູແລະເຊລ໌ມະນຸດ ຢ່າງໃດກໍຕາມ ຍັງພົບໂອກາດການແພ່ເຊື້ອຢູ່ນຳເລັກໜ້ອຍ
ສາດສະດາຈານຍ໌ Church ກ່າວວ່າມັນເປັນຈຸດເລີ່ມຕົ້ນອັນດີສຳລັບການຄົ້ນພົບວິທີການນຳອະໄວຍະວະຂອງສັດເຂົ້າມາໃສ່ໃນມະນຸດໄດ້ໂດຍບໍ່ມີປະຕິກິລິຍາຕໍ່ຕ້ານ ຊຶ່ງທາງການແພດເອີ້ນວ່າ ການປູກຖ່າຍອະໄວຍະວະ (xenotransplantation) ແລະພວກເຂົາຍັງບອກອີກວ່າ
“ຕອນນີ້ເຮົາມາເຖິງໃນຈຸດທີ່ໜ້າອັດສະຈັນຫລາຍສອງຈຸດ ຈຸດທຳອິດຄືການໄດ້ບັນທຶກວ່າວິທີການ Crispr ຫລືການດັດແປງພັນທຸກຳຂອງສັດອື່ນໆ ນັ້ນ ໄດ້ແກ້ບັນຫາທີ່ເກີດຂື້ນໃນການປູກຖ່າຍອະໄວຍະວະຈາກສັດທີ່ເກີດຂື້ນມາຕະຫລອດໄດ້ແລ້ວ ແລະເຮົາສາມາດຈັດການກັບລະບົບພູມຄຸ້ມກັນຕ່າງໆ ໃນຮ່າງກາຍສິ່ງມີຊີວິດໄດ້ ສອງຈຸດນີ້ເຮັດໃຫ້ເຮົາພົບເສັ້ນທາງທີ່ຊັດເຈນໃນການກຳຈັດເບື້ອງຫລັງຂອງການເກີດໄວຣັດທັງຫລາຍ”
ດຣ. Sarah Chan ຜູ້ຊ່ຽວຊານຈາກມະຫາວິທະຍາໄລເອດິນເບີກ ກ່າວວ່າ “ແມ່ນວິທີການທີ່ຖືກຫລັກການແລະປອດໄພຈະຖືກເຜີຍແຜ່ອອກໄປແລ້ວ ເຮົາກໍຍັງລະວັງເຖິງຄວາມເປັນໄປໄດ້ໃນທາງວັດທະນະທຳ ແລະຜົນກະທົບທາງດ້ານສັງຄົມຢູ່ ວ່າທົ່ວໂລກຈະຍອມຮັບການປູກຖ່າຍອະໄວຍະວະສັດລົງໄປໃນຮ່າງກາຍຂອງມະນຸດໄດ້ຫລືບໍ່”
“ຢ່າງໃດກໍຕາມ ຜົນການຄົ້ນພົບນີ້ມີຄຸນຄ່າຢ່າງຍິ່ງ ແລະເປັນອີກໜຶ່ງຫລັກຖານວ່າການວິໄຈທາງວິທະຍາສາດນັ້ນ ໄດ້ພັດທະນາໄປອີກກ້າວແລ້ວ”