ຂປລ. ໂດຍໄດ້ຮັບການມອບໝາຍຈາກກົມການເມືອງ ໃຫ້ຕາງໜ້າສູນກາງພັກ ແລະ ລັດຖະບານ ແຫ່ງ ສປປ ລາວ, ທ່ານ ສົມສະຫວາດ ເລັ່ງສະຫວັດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ໄດ້ນຳພາຄະນະຜູ້ແທນຂັ້ນສູງຂອງລາວ ເຊິ່ງປະກອບດ້ວຍລັດຖະມົນຕີຊ່ວຍວ່າການກະຊວງພະລັງງານ ແລະ ບໍ່ແຮ່, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ພ້ອມດ້ວຍພະນັກງານການນຳຂັ້ນກົມ ຈາກຂະແໜງການກ່ຽວຂ້ອງຈຳນວນໜຶ່ງ ໄດ້ໄປຢ້ຽມຢາມ ແລະ ເຮັດວຽກ ຢູ່ ລາຊະອານາຈັກກຳປູເຈຍ ແຕ່ວັນທີ 4-7 ຕຸລາ 2015.
ຈຸດປະສົງຕົ້ນຕໍ ຂອງການໄປຢ້ຽມຢາມເຮັດວຽກໃນຄັ້ງນີ້ ແມ່ນເພື່ອແຈ້ງໃຫ້ລັດຖະບານລາຊະອານາຈັກ ກຳປູເຈຍ ຊາບກ່ຽວກັບ ແຜນການພັດທະນາໂຄງການໄຟຟ້ານ້ຳຕົກດອນສະໂຮງ ທີ່ແຂວງຈຳປະສັກ ເຊິ່ງເປັນໂຄງການໜຶ່ງ ທີ່ມີຄວາມສຳຄັນ ໃນແຜນພັດທະນາພະລັງງານໄຟຟ້າ ຂອງ ສປປ ລາວ. ໃນໄລຍະຢູ່ ຢ້ຽມຢາມກຳປູເຈຍ ຄັ້ງນີ້, ທ່ານ ສົມສະຫວາດ ເລັ່ງສະຫວັດ, ໄດ້ເຂົ້າຢ້ຽມຄຳນັບ ສົມເດັດ Hun Sen, ນາຍົກລັດຖະມົນຕີ, ໄດ້ພົບປະເຮັດວຽກກັບ ທ່ານ Hor Namhong, ຮອງນາຍົກ ລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແລະ ການຮ່ວມມືສາກົນ ແຫ່ງລາຊາອະນາຈັກກຳປູເຈຍ, ພ້ອມກັນນັ້ນ ກໍໄດ້ຮັບການຮັບຕ້ອນຈາກ ທ່ານ Sok An, ຮອງນາຍົກລັດຖະມົນຕີກຳປູເຈຍ. ໃນ ໂອກາດດັ່ງກ່າວ ທ່ານ ສົມສະຫວາດ ເລັ່ງສະຫວັດ, ໄດ້ສະແດງຄວາມປິຕິຍິນດີ ແລະ ຄວາມຂອບໃຈຢ່າງຈິງໃຈ ຕໍ່ການນຳ ແລະ ເຈົ້າຫນ້າທີ່ຂັ້ນສູງຂອງກຳປູເຈຍ ທີ່ ໄດ້ໃຫ້ການຕ້ອນຮັບຢ່າງອົບອຸ່ນ ແລະ ອຳນວຍຄວາມສະດວກທຸກປະການ ແກ່ການມາຢ້ຽມຢາມເຮັດວຽກໃນຄັ້ງນີ້ ໂດຍໄດ້ສະແດງຄວາມມຸ້ງມາດປາດຖະໜາ ຂອງພັກ-ລັດ ແຫ່ງ ສປປ ລາວ ໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການ ຮ່ວມມືທີ່ດີ ຖານບ້ານໃກ້ເຮືອນຄຽງ ລະຫວ່າງ ປະຊາຊົນສອງຊາດ ລາວ-ກຳປູເຈຍ ໃຫ້ນັບມື້ນັບຂະຫຍາຍຕົວຂຶ້ນຢ່າງບໍ່ຢຸດຢັ້ງ. ນອກຈາກນັ້ນ, ທ່ານ ຮອງນາຍົກ ສົມສະຫວາດ ເລັ່ງສະຫວັດ, ໄດ້ແຈ້ງໃຫ້ການນຳຂອງກຳປູເຈຍຊາບ ໂດຍສັງເຂບກ່ຽວກັບ ສະພາບເສດຖະກິດ-ສັງຄົມ ແລະ ການເມືອງຂອງ ລາວ ໃນປະຈຸບັນ ກໍຄືການກຽມພ້ອມ ຂອງ ສປປ ລາວ ເພື່ອກ້າວເຂົ້າສູ່ການເປັນປະຊາຄົມເສດຖະກິດອາຊຽນ ໃນທ້າຍ ປີ 2015 ແລະ ການເປັນປະທານອາຊຽນ ຂອງ ສປປລາວ ໃນ ປີ 2016. ໃນໂອກາດດຽວກັນນີ້, ທ່ານ ສົມສະຫວາດ ເລັ່ງສະຫວັດ, ກໍໄດ້ຊີ້ແຈ້ງໃຫ້ຝ່າຍກຳປູເຈຍ ຊາບວ່າ: ເພື່ອສ້າງທຶນຮອນໃຫ້ແກ່ການພັດທະນາປະເທດ ແລະ ນຳເອົາປະເທດຊາດຫລຸດພົ້ນອອກ ຈາກສະຖານະພາບປະເທດດ້ອຍພັດທະນາ, ທັງມີພື້ນຖານວັດຖຸເຕັກນິກ ກ້າວຂຶ້ນໄປສູ່ຄວາມຈະເລີນວັດທະນານັ້ນ; ພັກ ແລະ ລັດຖະບານລາວເຮົາໄດ້ ມີນະໂຍບາຍເສີມຂະຍາຍທ່າແຮງດ້ານຊັບພະຍາກອນນ້ຳ ດ້ວຍການສ້າງເຂື່ອນໄຟຟ້າ ທັງຢູ່ໃນສາຂາແມ່ນ້ຳຂອງ ແລະ ໃນລຳນ້ຳຂອງເອງ ໂດຍການສົ່ງເສີມການລົງທຶນຈາກພາຍໃນ ແລະ ຕ່າງປະເທດດ້ວຍຮູບການຕ່າງໆ ພັກ ແລະ ລັດຖະບານ ໄດ້ກຳນົດຢ່າງຈະແຈ້ງວ່າ ນະໂຍບາຍພະລັງງານແຫ່ງຊາດ ຂອງ ສປປ ລາວ ແມ່ນຢຶດຖືເອົາການພັດທະນາໄຟຟ້າແບບຍືນຍົງ, ປອດໄພ, ໜັ້ນຄົງ ເປັນຫລັກ, ດ້ວຍການວ່າຈ້າງ ຜູ້ຊ່ຽວຊານລະດັບສາກົນ ດຳເນີນການສຶກສາສຳຫລວດຂໍ້ມູນດ້ານນ້ຳ ແລະ ດ້ານອື່ນໆ ຢ່າງຮອບຄອບ, ຖືກຫລັກວິທະຍາສາດ, ຮັບປະກັນ ບໍ່ໃຫ້ສົ່ງຜົນກະທົບຕໍ່ສິ່ງແວດລ້ອມ ໂດຍສະເພາະ ຕໍ່ບັນດາປະເທດ ທີ່ຢູ່ລຽບແມ່ນ້ຳຂອງ ລຸ່ມຈາກປະເທດລາວ; ດ້ານໜຶ່ງອີກ ກໍເຄົາລົບນັບຖືິສັນຍາ ສະບັບ ປີ 1995 ວ່າດ້ວຍການພັດທະນາ ແລະ ຄຸ້ມຄອງອ່າງແມ່ນ້ຳຂອງໃຫ້ມີຄວາມຍືນຍົງ.
ບົນຈິດໃຈດັ່ງກ່າວ, ພັກ ແລະ ລັດຖະບານລາວ ໄດ້ສົ່ງເສີມນັກທຸລະກິດ ທັງພາຍໃນ ແລະ ຕ່າງປະເທດ ລົງທຶນ ເຂົ້າໃສ່ການພັດທະນາເຂື່ອນໄຟຟ້າຂະໜາດກາງ ແລະ ຂະໜາດໃຫຍ່ ເຊິ່ງມາຮອດປະຈຸບັນ ມີ 11 ເຂື່ອນ ໄດ້ດຳເນີນການຜະລິດແລ້ວ ເປັນຕົ້ນໂຄງການເຂື່ອນໄຟຟ້ານ້ຳເທີນ 2, ໂຄງການເຂື່ອນໄຟຟ້ານ້ຳເທີນຫີນບູນ ເຊິ່ງແມ່ນໂຄງການພັດ ທະນາ ຂອງພາກເອກະຊົນຕ່າງປະເທດຮ່ວມກັບ ລັດຖະບານລາວ ທີ່ ປະສົບຜົນສຳເລັດສູງ ໂດຍບໍ່ພຽງແຕ່ສາມາດຜະລິດໄຟຟ້າອອກຂາຍ, ແຕ່ຍັງເປັນຕົວແບບທີ່ດີຫລາຍດ້ານ ເຊິ່ງວົງຄະນາຍາດສາກົນ ແລະ ສະຖາບັນການເງິນສາກົນ ໄດ້ໃຫ້ການຍ້ອງຍໍ ວ່າເປັນຕົວແບບລະດັບໂລກໃນການສ້າງເຂື່ອນໄຟ້ຟ້ານ້ຳຕົກ ທີ່ເປັນມິດຕໍ່ສິ່ງແວດລ້ອມຢ່າງແທ້ຈິງ. ນອກນັ້ນ, ຍັງມີອີກ 12 ເຂື່ອນ ກຳລັງດຳເນີນການກໍ່ສ້າງ ແລະ ມີ 29 ໂຄງການ ທີ່ມີແຜນຈະກໍ່ສ້າງໃນອະນາຄົດ. ໃນບັນດາເຂື່ອນເຫລົ່ານັ້ນ ແມ່ນມີບໍລິມາດອ່າງເກັບນ້ຳ ທີ່ນຳໃຊ້ເຂົ້າໃນການຜະລິດໄຟຟ້າ ( Active Storage ) ລວມກັນ ທັງ ໝົດປະມານ 43.959 ລ້ານ ແມັດກ້ອນ ເຊິິ່ງບໍລິມາດດັ່ງກ່າວ ຈະຊ່ວຍບໍລິຫານຈັດການນ້ຳ ໃນລະດູແລ້ງ ແລະ ລະດູຝົນ ໃຫ້ເກີດປະໂຫຍດສູງສຸດ ຕໍ່ການຜະລິດໄຟຟ້າ ແລະ ຕໍ່ການນຳໃຊ້ເຂົ້າໃນການກະສິກຳ (ຊົນລະປະທານ, ການລ້ຽງສັດນ້ຳ), ການບໍລິໂພກ, ການເດີນເຮືອ ແລະ ອຸດສາຫະກຳຕ່າງໆ.
ເນື່ອງຈາກວ່າການສ້າງເຂື່ອນໄຟຟ້າ ຢູ່ສາຂາແມ່ນໍ້າຂອງກໍຈະໝົດແລ້ວ, ລັດຖະບານລາວຈຶ່ງໄດ້ມີນະໂຍບາຍສ້າງເຂື່ອນໄຟຟ້າ ຢູ່ຕາມລຳແມ່ນ້ຳຂອງ ທີ່ຢູ່ໃນເຂດແດນອະທິປະໄຕ ຂອງ ສປປ ລາວ ໂດຍໄດ້ເລີ່ມສ້າງເຂື່ອນໄຟຟ້າແຫ່ງທຳອິດ ຢູ່ຕາມລຳແມ່ນ້ຳຂອງຈຸດໄຊຍະບູລີ ເຊິ່ງການສ້າງເຂື່ອນດັ່ງກ່າວນີ້ ແມ່ນໄດ້ດຳເນີນຕາມຂັ້ນຕອນ ແລະ ຂໍ້ແນະນຳຈາກຄະນະກຳມາທິການແມ່ນ້ຳຂອງສາກົນ (MRC) ແລະ ວ່າຈ້າງບໍລິສັດທີ່ປຶກສາຕ່າງປະເທດ ທີ່ມີຊື່ສຽງລະດັບໂລກ ເຊັ່ນ: POYRY, CNR. ຜ່ານການຖອດຖອນບົດຮຽນຈາກເຂື່ອນໄຟຟ້ານ້ຳຂອງ ຈຸດໄຊຍະບູລີ, ລັດຖະບານພວກເຮົາຈຶ່ງໄດ້ຕົກລົງ ໃຫ້ດຳເນີນການກໍ່ສ້າງໂຄງການເຂື່ອນໄຟຟ້ານ້ຳຕົກດອນສະໂຮງ ເຊິ່ງມີທີ່ຕັ້ງຢູ່ພາກໃຕ້ສຸດຂອງປະເທດ ທີ່ແຂວງຈຳປາສັກ. ໂຄງການດັ່ງກ່າວແມ່ນມີອັນຄືກັນ ແລະ ແຕກຕ່າງກັນ ຈາກເຂື່ອນໄຟຟ້າໄຊຍະບູລີ. ອັນທີ່ຄືກັນ ແມ່ນທັງສອງເຄື່ອນນີ້ ເປັນເຂື່ອນແບບຝາຍນ້ຳລົ້ນ (RUN OF RIVER) ທີ່ບໍ່ມີອ່າງເກັບນ້ຳ, ສ່ວນອັນທີ່ຕ່າງກັນແມ່ນເຂື່ອນໄຟຟ້າຢູ່ຈຸດໄຊຍະບູລີ ແມ່ນກວມເອົາລຳນ້ຳຂອງທັງສອງຝັ່ງ, ສຳລັບເຂື່ອນໄຟຟ້າດອນສະໂຮງ ແມ່ນຕັ້ງຢູ່ຮູສະໂຮງ ເຊິ່ງເປັນຮູໜຶ່ງ ໃນຈຳນວນຫລາຍຮູນ້ຳທີ່ມີຄວາມກວ້າງສະເລຍພຽງ 35 ແມັດໃນແມ່ນ້ຳຂອງເຂດສີພັນດອນທີ່ມີຄວາມກວ້າງຫລາຍກິໂລແມັດ. ໃນນັ້ນແມ່ນໄດ້ວ່າຈ້າງບໍລິສັດທີ່ປຶກສາສາກົນ ທີ່ມີຊື່ສຽງລະດັບໂລກມາຊ່ວຍໃຫ້ຄຳປຶກສາ ແລະ ແກ້ໄຂບັນຫາຕ່າງໆ ທີ່ຍັງຄົງຄ້າງໃຫ້ຫລຸດໜ້ອຍຖອຍລົງທີ່ສຸດ, ສິ່ງສຳຄັນແມ່ນພວກເຮົາໄດ້ດຳເນີນຕາມຂັ້ນຕອນຂອງສົນທິ ສັນຍາວ່າດ້ວຍການນຳໃຊ້ແມ່ນ້ຳຂອງ ປີ 1995 ຢ່າງຈິງຈັງ ເໝືອນກັບເວລາກະກຽມກໍ່ສ້າງເຂື່ອນໄຟຟ້າໄຊຍະບູລີ.
ໃນຕອນທ້າຍ ທ່ານຮອງນາຍົກ ສົມສະຫວາດ ເລັ່ງສະຫວັດ ໄດ້ຢືນຢັນຢ່າງໜຽວແໜ້ນວ່າ ລັດຖະບານລາວ ຈະບໍ່ກະທຳສິ່ງໃດທີ່ເປັນການເອົາປຽບ ຫລື ນຳ ເອົາຜົນເສຍຫາຍມາສູ່ປະເທດເພື່ອນບ້ານຢ່າງເດັດຂາດ, ພ້ອມກັນນັ້ນກໍຈະສ້າງເຂື່ອນດ້ວຍຄວາມຮັບຜິດຊອບສູງ, ຮັບປະກັນຄວາມເປີດເຜີຍ, ໂປ່ງໃສ, ຍິນດີໃຫ້ຂໍ້ມູນຂ່າວສານ ແກ່ບັນດາປະເທດ ແລະ ອົງການ ກໍຄືທຸກຄົນທີ່ສົນໃຈ.
ຜ່ານ ການຮັບຟັງການແຈ້ງຂ່າວ ຈາກທ່ານ ຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ແລ້ວການນຳຂັ້ນສູງຂອງກຳປູເຈຍ ກໍໄດ້ມີ ຄຳເຫັນວ່າ: ລັດຖະບານລາຊາອະນາຈັກກໍາປູເຈຍ ບໍ່ມີຈຸດປະສົງທີ່ຈະໄປກົດໜ່ວງການພັດທະນາຂອງລາວ ແລະ ຖືວ່າການສ້າງເຂື່ອນໄຟຟ້າດ່ັງກ່າວ ແມ່ນຂຶ້ນກັບອະທິປະໄຕຂອງປະເທດລາວ, ພຽງແຕ່ສະເໜີລັດຖະບານລາວເອົາໃຈໃສ່ການພັດທະນາດັ່ງກ່າວ ໃຫ້ມີຄວາມຍືນຍົງ ແລະ ມີຜົນກະທົບ ຕໍ່ສິ່ງແວດລ້ອມ ແລະ ສັງຄົມ ໃຫ້ໜ້ອຍທີ່ສຸດ, ພ້ອມກັນນັ້ນ ກໍໃຫ້ແລກປ່ຽນຂໍ້ມູນຂ່່າວສານເປັນປົກກະຕິ ລະຫວ່າງ 2 ຝ່າຍ ເພື່ອຊີ້ແຈງອະທິບາຍ ໃຫ້ສາທາລະນະຊົນ ມີຄວາມຮັບຮູ້ເປັນເອກະພາບກັນ.
ທ່ານຮອງນາຍົກ ສົມສະຫວາດ ເລັ່ງສະຫວັດ, ໄດ້ນຳພາຄະນະຜູ້ແທນ ເດີນທາງກັບຄືນເຖິງນະຄອນຫລວງວຽງຈັນ ໃນຕອນຄ່ຳຂອງວັນທີ 7 ຕຸລາ 2015.
ແຫລ່ງຂ່າວ:
