ປະຈຸບັນການສຶກສາໃນລາວ ແມ່ນເປັນການສຶກສາທີ່ມີລະບົບພາຍໃຕ້ການຊີ້ນຳ ແລະ ຮັບຜິດຊອບຂອງກະຊວງສຶກສາທິການ ແລະ ກິລາ, ເພື່ີອໃຫ້ການສຶກສາລາວກ້າວກະໂດດຂັ້ນ ແລະ ທັນສະໄໝຂຶ້ນ ທາງລັດຖະບານນໍເວ ຈື່ງສົນໃຈທີ່ຈະໃຫ້ຄວາມຊ່ວຍເຫຼືອໃນການຍົກລະດັບການສຶກສາຂອງເພື່ອໃຫ້ທຽບເທົ່າສາກົນ.
ໃນວັນທີ 6 ກັນຍາ ທີ່ຜ່ານມາ ທ່ານ ສຈ ຢັນສຕິນ ຜູ່ຊ່ຽວຊານ ນັກຂ່າວຈາກປະເທດນໍເວ ໄດ້ຈັດກອງປະຊຸມພົບປະແລກປ່ຽນຄວາມຄິດເຫັນຂຶ້ນທີ່ສະມາຄົມນັກຂ່າວແຫ່ງປະເທດລາວກ່ຽວກັບການ ນຳເອົາຂ່າວໂທລະພາບ, ຂ່າວວາລະສານ, ຂ່າວໜັງສືພິມ ແລະ ຂ່າວຕ່າງໆ ເພີ່ມເຂົ້າໃນການສຶກສາ ຜ່ານທາງລະບົບໂຊຊ້ຽວມີເດຍ (social media) ແລະ ລະບົບການສຶກສາຂອງລາວ ໂດຍມີຄະນະບັນນາທິການ ແລະ ນັກຂ່າວຈາກສື່ຕ່າງໆເຂົ້າຮ່ວມ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອຄົ້ນຄວ້າແລກປ່ຽນຄວາມຄິດເຫັນວິທີການທີ່ຈະນຳເອົາຫຼັກສູດດັ່ງກ່າວເຂົ້າໃນການສຶກສາ ເພື່ອເປັນການດຶງດູດຄວາມສົນໃຈຂອງນັກຮຽນ-ນັກສຶກສາໂດຍອີງໃສ່ທ່າແຮງຈາກການຊົມໃຊ້ລະບົບໂຊຊ້ຽວມີເດຍ ຫຼື ອິນເຕີເນັດ (social media or internet) ເຊີ່ງເປັນການເຂົ້າຫາລະບົບດັ່ງກ່າວ ໄດ້ຢ່າງວ່ອງໄວ ແລະ ທັນການ ເພື່ອເຮັດໃຫ້ພັດທະນາການສຶກສາຂອງລາວກ້າວໄປສູ່ຄວາມທັນສະໄໝ ແລະ ທຽບເທົ່າກັບສາກົນ.
