ພວກເຮົາທັງຫຼາຍທີ່ມີນິໄສຂີ້ລືມນັ້ນອາດຈະໄດ້ສຳຜັດກັບອຸປະກອນຝັງຕົວໃນສະໝອງທີ່ສາມາດຊ່ວຍກະຕຸ້ນຄວາມຈື່ຈຳຂອງເຮົາໄດ້ຫາກເທກໂນໂລຍີໃໝ່ຂອງກອງທັບສະຫາລັດ ນັ້ນຖືກນຳໄປໃຊ້ແພ່ຫຼາຍຂຶ້ນ ໂດຍອຸປະກອນຝັງຕົວໃນສະໝອງດັ່ງກ່າວນັ້ນໄດ້ຮັບລາຍງານວ່າ “ສະແດງເຖິງຄວາມເປັນໄປໄດ້” ໃນການຊ່ວຍເຫຼືອຜູ້ຄົົນທີ່ກຳລັງພະຍາຍາມຂູດຄົ້ນຄວາມຈື່ຈຳຈາກສ່ວນເລິກທີ່ສຸດໃນຈິດໃຈອອກມາ
The Defence Advanced Research Projects Agency ຫຼື DARPA ນັ້ນມີຄວາມກັງວົນເປັນຫຼັກໃນເລື່ອງການຊ່ວຍເຫຼືອຜູ້ຄົົນທີ່ຕ້ອງທໍລະມານກັບການບາດເຈັບທາງສະໝອງຊຳເຮື້ອຫຼາຍກວ່າການທີ່ຈະຊ່ວຍຄົົນທີ່ມັກຈະອອກຈາກເຮືອນໂດຍລືມຈັບກະແຈເຮືອນອອກມານຳ ແຕ່ເຖິງຢ່າງໃດຂະບວນການດັ່ງກ່າວນັ້ນກໍສາມາດທີ່ຈະນຳໄປໃຊ້ໄດ້ກັບຄົນທັງສອງກຸ່ມຢູ່ດີ “ທຸກຄົນຕ່າງເຄີຍມີປະສົບການຂອງການມີບັນຫາໃນການຈື່ຈຳລາຍຊື່ສິ່ງຂອງຍາວໆ ຫຼື ທິດທາງໄປສູ່ສະຖານທີ່ບາງແຫ່ງທີ່ຊັບຊ້ອນກັນມາແລ້ວ” Justin Sanchez ຜູ້ຈັດການໂຄງການວິໄຈເທື່ອນີ້ກ່າວ “ມື້ນີ້ເຮົາກຳລັງຄົ້ນພົບວ່າ ເທກໂນໂລຍີທາງດ້ານສະໝອງທີ່ສາມາດເປັນອຸປະກອນຊະນິດຝັງຕົວໄດ້ນັ້ນສາມາດຊ່ວຍອຳນວຍຄວາມສະດວກໃຫ້ສະໝອງສາມາດເຮັດວຽກເຫຼົ່ານີ້ໄດ້ມີປະສິດທິພາບຍິ່ງຂຶ້ນ”
ສິ່ງທີ່ເຮັດໃຫ້ຂະບວນການໃໝ່ນີ້ມີຄວາມແປກໃໝ່ເປັນຢ່າງຫຼາຍນັ້ນກໍຄືວິທີທີ່ມັນ ‘ອ່ານ’ ຂະບວນການທາງປະສາດຕ່າງໆ ຂອງສະໝອງ ມັນສາມາດເຫັນວ່າ ສະໝອງຂອງເຮົາສ້າງ ແລະ ເອີ້ນໃຊ້ຄວາມຈື່ຈຳຕ່າງໆໄດ້ຢ່າງໃດ ໂດຍ Sanchez ບອກວ່າ ທີມຂອງພວກເຂົານັ້ນກຳລັງເບິ່ງວ່າຕອນໃດຄືໄລຍະເວລາທີ່ດີທີ່ສຸດຂອງສິ່ງກະຕຸ້ນທາງໄຟຟ້າກັນແທ້ ລະຫວ່າງເວລາທີ່ຄວາມຈື່ຈຳກຳລັງຖືກສ້າງຂຶ້ນ ເວລາທີ່ຄວາມຈື່ຈຳກຳລັງຖືກຂຸດຄົ້ນ ຫຼື ໄລຍະໃດໜຶ່ງລະຫວ່າງນັ້ນ
ທາງທີມວິໄຈໄດ້ວາງແຖບອິເລັກໂທຣນ້ອຍໆ ເທິງພື້ນທີ່ຕ່າງໆ ຂອງສະໝອງທີ່ເປັນທີ່ຮູ້ກັນວ່າ ມີສ່ວນຊ່ວຍຕໍ່ການກໍ່ຕົວຂອງຄວາມຈຳເຊີງປະກາດ ເຊີ່ງກໍຄື ຄວາມຈຳໄລຍະສັ້ນ ແລະ ຄວາມຈຳນ້ອຍໆ ຢ່າງເຊັ່ນ ລາຍຊື່ ຄວາມຈຳກ່ຽວກັບພື້ນທີ່ ແລະ ການຄົ້ນຫາເສັ້ນທາງ ເປັນຕົ້ນ ສຳລັບອາສາສະໝັກທີ່ເຂົ້າຮ່ວມການວິໄຈໃນເທື່ອນີ້ນັ້ນພວກເຂົາບໍ່ໄດ້ມີບັນຫາທາງດ້ານຄວາມຈຳໂດຍສະເພາະເຈາະຈົ່ງແຕ່ຢ່າງໃດ ແຕ່ວ່າພວກເຂົາຈະຕ້ອງເຂົ້າຮັບການຜ່າຕັດສະໝອງອັນເນື່ອງຈາກສາເຫດທາງດ້ານລະບົບປະສາດອື່ນໆ ເຊີ່ງພາຍຫຼັງການທົດສອບກໍພົບວ່າ ຄວາມສາມາດໃນການຂຸດຄົ້ນຄວາມຈື່ຈຳຂອງພວກເຂົານັ້ນດີຍິ່ງຂຶ້ນກວ່າເກົ່າ
ລາຍລະອຽດທັງໝົດຂອງງານວິໄຈເທື່ອນີ້ໄດ້ຖືກລະງັບໄວ້ເນື່ອງຈາກຢູ່ໃນລະຫວ່າງການກວດກາ ແລະ ການຕີພິມລົງໃນວາລະສານວິທະຍາສາດ ແຕ່ຜົນລັບບາງຢ່າງກໍໄດ້ຖືກເປີດເຜີຍອອກມາແດ່ແລ້ວ “ເຮົາຍັງມີເລື່ອງທີ່ຕ້ອງຮຽນຮູ້ອີກຫຼາຍກ່ຽວກັບວິທີການທີ່ສະໝອງຂອງມະນຸດນັ້ນເຂົ້າລະຫັດຄວາມຈຳເຊີງປະກາດ (Declarative memory) ແຕ່ການທົດລອງຂັ້ນຕົ້ນນີ້ກໍໄດ້ເຮັດໃຫ້ບາງຢ່າງມີຄວາມຊັດເຈນຫຼາຍຂຶ້ນ ແລະ ກໍຍັງຊີ້ໃຫ້ເຫັນວ່າມີຄວາມເປັນໄປໄດ້ຢ່າງຫຼາຍທີ່ເຮົາຈະສາມາດຊ່ວຍເຫຼືອຄົົນທີ່ມີຄວາມຜິດພາດບາງຢ່າງດ້ານຄວາມຈື່ຈຳໄດ້” Sanchez ກ່າວ
ນັກວິທະຍາສາດຂອງ DARPA ນັ້ນກໍກຳລັງຊອກຫາວິທີທີ່ສະໝອງນັ້ນສາມາດຖືກກະຕຸ້ນເພື່ອຊ່ວຍເຫຼືອການຮຽນຮູ້ນອກຈາກການກະຕຸ້ນການຂຸດຄົ້ນຄວາມຈື່ຈຳດ້ວຍເຊັ່ນກັນ ເຊີ່ງເຮົາຮູ້ແລ້ວວ່າການ ‘ຫຼີ້ນຊ້ຳ’ ຄວາມສາມາດບາງຢ່າງໃນສະໝອງຂອງເຮົານັ້ນສາມາດຊ່ວຍໃຫ້ເຮົາຮຽນຮູ້ມັນໄດ້ ແລະ ຕໍ່ໄປໃນປີນີ້ທາງອົງກອນເອງກໍຈະເລີ່ມພະຍາຍາມຮ່າງແຜນຂະບວນການການຫຼີ້ນຊ້ຳເຫຼົ່ານີ້ເວລາທີ່ມັນເກີດຂຶ້ນໃນສະໝອງຂອງເຮົາດ້ວຍເຊັ່ນກັນ