ຖ້າຫາກໄປຂັດຂວາງແບບແຜນການນອນຕາມທຳມະຊາດແລ້ວ ບັນຫາສຸຂະພາບອີກຫລວງຫລາຍກໍອາດຈະຕາມມາ ເຊິ່ງນັ້ນເປັນເຫດຜົນທີ່ວ່າເຫດໃດພະຍາດນອນບໍ່ຫລັບເຖິງເປັນບັນຫາຮຸນແຮງສຳລັບຄົົນທີ່ຕ້ອງມີຊີວິດຢູ່ກັບພາວະດັ່ງກ່າວ ແຕ່ການຫາສາເຫດຂອງບັນຫາການນອນຂອງຄົນໆໜຶ່ງນັ້ນອາດເປັນເລື່ອງທີ່ຍາກຫລາຍ ເນື່ອງຈາກປັດໄຈທີ່ຈະຕ້ອງຄຳນຶງເຖິງນັ້ນມີຫລວງຫລາຍ ແຕ່ໃນຕອນນີ້ມີງານວິໄຈຊິ້ນໜຶ່ງທີ່ມີທິດສະດີໃໝ່ ເຊິ່ງບອກວ່າບັນຫານັ້ນອາດຈະມາຈາກຍີນ ຫຼື ລະຫັດພັນທຸກຳຂອງເຮົາເອງກໍເປັນໄດ້
ງານວິໄຈຊິ້ນໜຶ່ງຈາກ Virginia Commonwealth University ໃນສະຫkລັດໄດ້ສະແດງໃຫ້ເຫັນເຖິງຄວາມກ່ຽວຂ້ອງທາງພັນທຸກຳອັນໜາແໜ້ນລະຫວ່າງພໍ່ແມ່ ແລະ ລູກໃນຈຸດທີ່ກ່ຽວກັບບັນຫາການນອນບໍ່ຫລັບ ອີກທັງຍັງໄດ້ລະບຸເຖິງຄວາມສ່ຽງຕໍ່ການຖ່າຍທອດທີ່ສູງຂຶ້ນຫລາຍໃນເພດຍິງເມື່ອທຽບກັບເພດຊາຍ ເຊິ່ງທາງນັກວິໄຈໄດ້ຄາດການອັດຕາການຕິດຕໍ່ຂອງພະຍາດນອນບໍ່ຫລັບຂອງເພດຍິງວ່າຢູ່ທີ່ 59% ແລະ 38% ສຳລັບເພດຊາຍ ດັ່ງນັ້ນເຮົາອາດຈະໂທດພໍ່ ແລະ ແມ່ຂອງເຮົາໄດ້ຫາກເຈົ້າກຳລັງມີບັນຫາກັບການນອນຫລັບຢູ່ຕອນນີ້
“ການວິໄຈເທື່ອນີ້ຊີ້ໃຫ້ເຫັນວ່າພັນທຸກຳນັ້ນອາດຈະມີບົດບາດຫລາຍກວ່າທີ່ຄິດໃນການພັດທະນາອາການຂອງພະຍາດນອນບໍ່ຫລັບສຳລັບຜູ້ຍິງຫລາຍກວ່າຜູ້ຊາຍ ເຊິ່ງເປັນຫລັກຖານທຳອິດຂອງຄວາມແຕກຕ່າງທາງເພດໃນກຸ່ມຕົວຢ່າງທີ່ເປັນຜູ້ໃຫຍ່” Mackenzie Lind ເຊິ່ງເປັນໜຶ່ງໃນກຸ່ມນັກວິໄຈກ່າວ “ດ້ວຍຫລັກຖານທີ່ມີກ່ຽວກັບຄວາມແຕກຕ່າງທາງເພດນີ້ ອາດຈະເປັນການດີທີ່ຈະເລືອກຜູ້ຍິງເປັນພິເສດໃນການນອນ”
ຈາກຂໍ້ມູນຂອງ American Academy of Sleep Medicine ນັ້ນ ໃນປະຈຸບັນ ປະຊາກອນຂອງສະຫາລັດ ປະມານ 30-35% ນັ້ນມີຄວາມທຸກເນື່ອງຈາກບັນຫາພະຍາດນອນບໍ່ຫລັບຊົ່ວຄາວ ໃນຂະນະທີ່ 10% ນັ້ນມີບັນຫານອນບໍ່ຫລັບຊະນິດຊຳເຮື້ອ ເຊິ່ງໝາຍເຖິງການປະສົບບັນຫາກັບການນອນຢ່າງໜ້ອຍສາມເທື່ອຕໍ່ອາທິດເປັນເວລາຕໍ່ເນື່ອງກັນຫລາຍກວ່າ 3 ເດືອນ ມັນເປັນພາວະທີ່ເປັນທີ່ຮູ້ກັນດີຢູ່ແລ້ວວ່າພົບໄດ້ຫລາຍກວ່າໃນເພດຍິງ ແຕ່ນັກວິທະຍາສາດກໍຍັງບໍ່ຮູ້ວ່າເປັນເພາະຫຍັງກັນແທ້
Lind ແລະ ເພື່ອນຮ່ວມງານຂອງນາງໄດ້ທຳການວິເຄາະຂໍ້ມູນທີ່ໄດ້ມາຈາກຜູ້ເຂົ້າຮ່ວມທົດລອງກວ່າ 7,500 ລາຍ ພວກເຂົາບອກວ່າ ນິ້ເປັນເທື່ອທຳອິດທີ່ການທົດລອງຊະນິດດັ່ງກ່າວຖືກເຮັດເປັນໄລຍະເວລາດົນເພື່ອກວດສອບຜົນກະທົບທາງພັນທຸກຳ ແລະ ສິ່ງແວດລ້ອມຕ່າງໆຕໍ່ພະຍາດນອນບໍ່ຫລັບໃນຝາແຝດທີ່ເປັນຜູ້ໃຫຍ່ແລ້ວ ພວກເຂົາຍັງເນັ້ນອີກວ່າ “ປັດໄຈທາງສະພາບແວດລ້ອມທີ່ເປັນເອກະລັກ ສະນັ້ນຍັງເປັນສ່ວນສຳຄັນຂອງຄວາມປ່ຽນແປງ ສ່ວນໃຫຍ່ໃນພະຍາດນອນບໍ່ຫລັບ” ນອກຈາກປັດໄຈທາງພັນທຸກຳຕ່າງໆແລ້ວ
ຜົນການວິໄຈໃນເທື່ອນີ້ໄດ້ຖືກຕີພິມລົງໃນວາລະສານ Sleep ງານວິໄຈໃໝ່ນີ້ໄດ້ສະໜັບສະໜູນການຄົ້ນພົບຂອງງານວິໄຈຊິ້ນໜຶ່ງທີ່ໄດ້ຖືກຕີພິມໄປໃນເດືອນມັງກອນທີ່ຜ່ານມາໂດຍນັກວິຊາການຈາກ University of Pennsylvania ເຊິ່ງກໍໄດ້ໃຫ້ຄວາມສົນໃຈໄປທີ່ຝາແຝດເຊັ່ນກັນ ໂດຍມີຈຳນວນທັງໝົດ 1,412 ຄູ່ ເຊິ່ງບໍ່ພຽງແຕ່ຄວາມເຊື່ອມໂຍງລະຫວ່າງພັນທຸກຳ ແລະ ພະຍາດນອນບໍ່ຫລັບໄດ້ຖືກຄົ້ນພົບເທົ່ານັ້ນ ລະດັບຂອງຜົນກະທົບຍັງປ່ຽນແປງໄປຕາມອາຍຸອີກດ້ວຍ ເຊິ່ງປັດໄຈທາງພັນທຸກຳນັ້ນເປັນສ່ວນປະກອບຫລາຍເຖິງ 38% ໃນກໍລະນີຂອງເດັກທີ່ມີອາຍຸ 8-10 ປີ ແລະ ຫລາຍເຖິງ 24% ໃນເດັກທີ່ມີອາຍຸລະຫວ່າງ 14-15 ປີ
“ເຮົາປະຫລາດໃຈທີ່ສຸດກັບຂໍ້ເທັດຈິງທີ່ວ່າປັດໄຈທາງພັນທຸກຳນັ້ນບໍ່ໄດ້ຄົງທີ່ໄປຕະຫລອດ ດັ່ງນັ້ນຜົນກະທົບຂອງພັນທຸກຳນັ້ນຂຶ້ນຢູ່ກັບລະດັບຂັ້ນຂອງພັດທະນາການຂອງເດັກ” Philip Gehrman ຜູ້ເປັນເຈົ້າຂອງງານວິໄຈກ່າວ “ຜົນລັບເຫລົ່ານີ້ນັ້ນມີຄວາມສຳຄັນເພາະວ່າສາເຫດຂອງພະຍາດນອນບໍ່ຫລັບນັ້ນອາດຈະແຕກຕ່າງກັນໄປໃນໄວລຸ້ນ ແລະ ເດັກ ດັ່ງນັ້ນມັນອາດຈະຈຳເປັນທີ່ຈະຕ້ອງມີວິທີການປິ່ນປົວທີ່ແຕກຕ່າງອອກໄປອີກດ້ວຍ”