ນາຊ່າ ເຜີຍ ຍານສຳຫລວດພົບຮ່ອງຮອຍຂອງນ້ຳເທິງດາວອັງຄານ ຊີ້ໃຫ້ເຫັນວ່າ ເກີດຈາກນ້ຳເຄັມທີ່ໄຫລລົງມາຈາກພູເຂົາເທິງພື້ນຜິວຂອງດວງດາວ
ເມື່ອວັນທີ່ 28 ກັນຍາ ອົງການບໍລິຫານການບິນ ແລະ ອາວະກາດແຫ່ງຊາດສະຫາລັດ ຫຼື ນາຊ່າ ໄດ້ຢືນຢັນຢ່າງເປັນທາງການວ່າ ຢານອາວະກາດສຳຫລວດດາວອັງຄານ (Mars Reconnaissance Orbiter : MRO) ສຳຫລວດພົບຮ່ອງຮອຍການໄຫລຂອງນ້ຳເທິງດາວໃນຊ່ວງໄລຍະທີ່ອຸນຫະພູມຂອງດາວອຸ່ນຂຶ້ນ ໂດຍຈາກການວິເຄາະສາມາດຢືນຢັນໄດ້ວ່າຮ່ອງຮອຍດັ່ງກ່າວເກີດຈາກນ້ຳເຄັມທີ່ໄຫລລົງມາຈາກພູເຂົາເທິງພື້ນຜິວຂອງດວງດາວ
ນາຊ່າລະບຸຜ່ານການຖ່າຍທອດສົດທາງນາຊ່າທີວີວ່າ ຮ່ອງຮອຍດັ່ງກ່າວຖືກຄົ້ນພົບເທື່ອທຳອິດເມື່ອປີ 2010 ໂດຍມີລັກສະນະເປັນເສັ້ນສີດຳ ແລະ ຈະມີຄວາມໜາຂຶ້ນ ແລະ ຍາວຂຶ້ນໃນໄລຍະທີ່ອຸນຫະພູມອົບອຸ່ນ ແລະ ຈະຄ່ອຍໆ ຈາງລົງກ່ອນຈະຫາຍໄປເມື່ອດາວອັງຄານເຂົ້າສູ່ລະດູໜາວ ແຕ່ນ້ຳເຄັມເຫລົ່ານີ້ມີຈຸດແຂງຕ່ຳກວ່ານ້ຳທຳມະດາຈຶ່ງບໍ່ກາຍເປັນນ້ຳກ້ອນແມ່ນວ່າອຸນຫະພູມເທິງດາວອັງຄານຈະຕິດລົບເຖິງ 62 ອົງສາ
ລູເຈນຊາ ໂອຈາ ນັກສຶກສາຈາກສະຖາບັນເທກໂນໂລຍີຈໍເຈຍຂອງສະຫາລັດ ອາເມຣິກາ ຊຶ່ງເຂົ້າຮ່ວມຖະແຫລງການຄົ້ນພົບຮ່ວມກັບນາຊ່າ ຄາດວ່າ ນ້ຳເຄັມທີ່ເກີດຂື້ນມາຈາກ “ເປີລ໌ຄໍເຣດ” ຊຶ່ງເປັນເກືອຊະນິດໜຶ່ງທີ່ດຶງນ້ຳມາຈາກຊັ້ນບັນຍາກາດຂອງດາວອັງຄານໃນໄລຍະທີ່ອາກາດຊຸ່ມ ຫຼື ອາດມາຈາກນ້ຳແຂງກ້ອງພື້ນຜິວຂອງດາວທີ່ປ່ຽນເປັນນ້ຳເມື່ອສຳຜັດກັບເກືອ
