ສຳນັກຂ່າວຕ່າງປະເທດ ລາຍງານໃນວັນທີ 17 ກັນຍານີ້ວ່າ ພາຍຫລັງເກີດເຫດແຜ່ນດິນໄຫວຂະໜາດ 8.3 ແມັກນິຈູດ ຢູ່ບໍລິເວນຊາຍຝັ່ງປະເທດຊິລີ ເມື່ອເວລາ 19:54 ໂມງ ຂອງວັນທີ 16 ກັນຍາ ຕາມເວລາໃນທ້ອງຖິ່ນ ຊຶ່ງກົງກັບເວລາ 05:54 ໂມງ ຕອນເຊົ້າຂອງມື້ນີ້ (17 ກັນຍາ) ຕາມເວລາໃນປະເທດລາວ ໂດຍທາງການໄດ້ມີການເຕືອນໄພຄື້ນຍັກສຶນາມິ ແລະ ອົບພະຍົບປະຊາຊົນບໍລິເວນຊາຍຝັ່ງ, ຫລ້າສຸດແມ່ນມີລາຍງານວ່າ ມີຄື້ນຍັກສຶນາມິສູງ 5 ແມັດ ຊັດເຂົ້າຊາຍຝັ່ງ ບໍລິເວນໃກ້ຄຽງສູນກາງແຜ່ນດິນໄຫວໃນປະເທດຊິລີແລ້ວ ເຮັດໃຫ້ເບື້ອງຕົ້ນມີລາຍງານຜູ້ເສຍຊີວິດຢ່າງໜ້ອຍ 3 ຄົນ ແລະ ອາຄານບ້ານເຮືອນເສຍຫາຍຈຳນວນຫລາຍ.

ນອກຈາກນີ້ ຍັງມີເຕືອນໄພໃຫ້ປະຊາຊົນທີ່ອາໃສຢູ່ຕາມຊາຍຝັ່ງມະຫາສະໝຸດປາຊີຟິກຫລາຍປະເທດເຊັ່ນ ເປຣູ, ເອກວາດໍ, ລັດຮາວາຍ ສະຫະລັດອາເມຣິກາ ແລະ ໄກເຖິງປະເທດນິວຊີແລນ ໃຫ້ລະວັງອັນຕະລາຍຈາກຄື້ນຍັກສຶນາມິ.