ຂປລ. ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ໄດ້ເຊັນບົດບັນທຶກ ຊ່ວຍຈຳ ກ່ຽວກັບຍຸດທະສາດ ການຮ່ວມມື ດ້ານຄົມ ມະນາຄົມ-ຂົນສົ່ງ ແຕ່ປີ 2016-2025 ແລະ ວິໄສທັດຮອດປີ 2030 ໃນ ວັນທີ 14 ກັນຍາ 2015 ທີ່ຫ້ອງວ່າການລັດຖະບານ ໂດຍເປັນກຽດ ເຂົ້າຮ່ວມເປັນສັກຂີພິຍານ ຂອງ ສະຫາຍ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຫງຽນ ເຕິນ ຢຸງ ນາຍົກລັດຖະມົນຕີ ແຫ່ງ ສສ ຫວຽດນາມ ແລະ ຜູ້ຕາງໜ້າ ລັດຖະບານ ທັງສອງຝ່າຍ ເຂົ້າຮ່ວມ.
ຮ່ວມລົງນາມ ບົດບັນທຶກ ຄັ້ງນີ້ ຕາງໜ້າ ໃຫ້ລັດຖະບານ ສປປ ລາວ ໂດຍ ສະຫາຍ ດຣ. ບຸນຈັນ ສິນທະວົງ ລັດຖະມົນຕີວ່າ ກະຊວງ ໂຍທາທິການ ແລະ ຂົນສົ່ງ ແລະ ຕາງໜ້າ ໃຫ້ລັດຖະບານ ສສ ຫວຽດນາມ ໂດຍ ສະຫາຍ ດິງ ລາ ທັງ ລັດຖະມົນຕີ ກະຊວງ ຄົມມະນາຄົມ ຂົນສົ່ງ ແຫ່ງ ສສ ຫວຽດນາມ. ທັງນີ້ ກໍເພື່ອ ໃຫ້ຂະແໜງ ຄົມມະນາຄົມ-ຂົນສົ່ງ ຂອງສອງປະເທດ ນຳໃຊ້ ເປັນບ່ອນອີງ ໃນການກຳນົດ ຍຸດທະສາດ ການຮ່ວມມື ໄລຍະແຕ່ ປີ 2016-2025 ແລະ ວິໄສທັດ ຮອດປີ 2030 ແລະ ເພື່ອເສີມຂະຫຍາຍ ທ່າແຮງ ດ້ານທີ່ຕັ້ງ ແລະ ເງື່ອໄຂ ທາງທຳມະຊາດ ຂອງສອງປະເທດ ໃຫ້ຫລາຍທີ່ສຸດ, ພິເສດ ແມ່ນທ່າແຮງ ທາງດ້ານ ທີ່ຕັ້ງເປັນໃຈກາງ ໃນການເຊື່ອມຈອດ ດ້ານຄົມມະນາຄົມ -ຂົນສົ່ງທາງບົກຂອງ ສປປ ລາວ ກັບບັນດາ ປະເທດພາກພື້ນ ແລະ ທ່າແຮງ ດ້ານທາງທະເລ ຂອງ ສສ ຫວຽດນາມ ໃນການເຊື່ອມຕໍ່ ກັບສາກົນ; ກຳນົດເອົາ ປະເພດ ການຄົມ ມະນາຄົມ-ຂົນສົ່ງ ທາງບົກ ລວມທັງ ທາງລົດໄຟ ຕາມບັນດາແລວທາງ ທີ່ເໝາະສົມ ກັບສະພາບ ເງື່ອນໄຂ ທາງທຳມະຊາດ, ສັງຄົມ, ຄວາມອາດ ສາມາດ ທາງດ້ານ ເສດຖະກິດ ຂອງແຕ່ລະແລວທາງ ເພື່ອສ້າງໃຫ້ ເປັນບຸລິມະສິດຫລັກ ໃນການພັດທະນາ ຂະແໜງຄົມ ມະນາຄົມ-ຂົນສົ່ງ ເພື່ອເຊື່ອມຈອດ ລະຫວ່າງ ສອງປະເທດ; ກຳນົດເສັ້ນທາງ ເຊື່ອມຕໍ່ລະຫວ່າງ ສອງນະຄອນຫລວງວຽງຈັນ ກັບນະຄອນຫລວງຮ່າໂນ້ຍ ແລະ ບັນດາທ້ອງຖິ່ນ ຂອງສອງປະເທດ ລາວ-ຫວຽດນາມ.
ໄປພ້ອມໆກັບ ວາງແຜນ ການພັດທະນາ ລະບົບຕາໜ່າງເ ສັ້ນທາງດ່ວນ ເຊື່ອມຈອດກັນ ໃນອານາຄົດ; ກຳນົດ ທິດທາງການພັດທະນາ ໃຫ້ສອດຄ່ອງກັບ ຄວາມຕ້ອງການ ຂອງການຂະຫຍາຍຕົວ ດ້ານເສດຖະກິດ-ສັງຄົມ ແຕ່ລະໄລຍະ, ພ້ອມກັບການ ສ້າງໃໝ່ບາງເສັ້ນທາງ ທີ່ມີປະສິດທິຜົນ ດ້ານການລົງທຶນ ດ້ວຍການສົ່ງເສີມ ຮູບການລົງທຶນ ທີ່ເໝາະ ສົມ ແບບມີສ່ວນຮ່ວມ ລະຫວ່າງ ພາກລັດ ແລະ ພາກທຸລະກິດ(PPP); ອຳນວຍ ຄວາມສະດວກ ດ້ານການຂົນສົ່ງສິນຄ້າ ໂດຍສານຂ້າມແດນ ແລະ ຜ່ານແດນ; ກໍານົດຍຸດທະສາດ ພັດທະນາ ລະບົບ ການຂົນສົ່ງ ສິນຄ້າ ທາງບົກ ລວມທັງທາງລົດໄຟ ຈາກ ລາວ ຫລື ຜ່ານລາວ ໄປສູ່ທ່າເຮືອຢູ່ ຫວຽດນາມ ແລະ ການຂົນສົ່ງ ຈາກທ່າເຮືອ ຫວຽດນາມ ມາ ລາວ ແລະ ຜ່ານໄປ ປະເທດອື່ນໆ ໃຫ້ສຳເລັດ ເປັນລະບົບທີ່ເປັນຮູບປະທຳ ສາມາດເຊື່ອມເຂົ້າ ເປັນລະບົບ ການຈໍລະຈອນແຈກຢາຍ ສິນຄ້າ ຂອງພາກພື້ນ ໃນປີ 2025. ໃນນັ້ນ ໃຫ້ເໜັ້ນໜັກໃສ່ ການນຳໃຊ້ ທ່າເຮືອ ຮອນລາ, ທ່າເຮືອຫວຸ່ງອ່າງ ແລະ ທ່າເຮືອ ຊວນຫາຍ ເປັນບຸລິມະສິດ ການສົ່ງເສີມ ການຂົນສົ່ງ ສິນຄ້າຈາກ ສປປ ລາວ ໄປຍັງປະເທດປາຍທາງອື່ນໆ; ພັດທະນາ ລະບົບການຂົນສົ່ງ ທາງອາກາດ; ເພີ່ມທະວີ ການເຊື່ອມຕໍ່ ໃຫ້ຫລາຍຂຶ້ນ, ປະສານສົມທົບກັນເພີ່ມຕື່ມ ລະຫວ່າງ ອົງການ ຄຸ້ມຄອງລັດ ຂັ້ນສູນກາງ ແລະ ທ້ອງຖິ່ນ ແລະ ວາງແຜນ ຮ່ວມມືກັນ ດ້ານການຈັດຕັ້ງປະຕິບັດ ການກໍ່ສ້າງ ແລະ ຍົກລະດັບ ພະນັກງານ ຕາມແຜນຍຸດທະສາດ ພັດທະນາ ບຸກຄະລາກອນ ຂອງແຕ່ລະປະເທດ.
ແຫລ່ງຂ່າວ:
