ກອງເລຂາຄະນະກຳມະການແມ່ນ້ຳຂອງແຫ່ງຊາດລາວ (ກຄມຊ)ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດຊຸດສຳມະນາ ພາຍໃຕ້ຫົວຂໍ້ “ ລະບຽບວ່າດ້ວຍການແຈ້ງໃຫ້ກັນຊາບ, ການປຶກສາຫາລືກັນກ່ອນ ແລະ ການເຮັດຂໍ້ຕົກລົງຂອງສັນຍາແມ່ນ້ຳຂອງ ປີ 1995 ” ໃນວັນທີ 19 ກັນຍາ 2013 ທີ່ສູນການຮ່ວມມືສາກົນແລະຝຶກອົບຮົມ (ICTC)ເພື່ອໃຫ້ກອງເລຂາຄະນະກຳມະການແມ່ນນ້ຳຂອງສາກົນ (ກຄມສ)ຖ່າຍ ທອດຄວາມຮູ້ ແລະ ປະສົບການກ່ຽວກັບການແຈ້ງໃຫ້ກັນຊາບໃຫ້ແກ່ ກຄມຊ.ແລະ ຂະແໜງການທີ່ກ່ຽວຂ້ອງ ແລະ ສ້າງຄວາມເຂົ້າໃຈ ກ່ຽວກັບວິ ທີການ ແລະ ຈຸດປະສົງຫລັກ ຂອງການແຈ້ງໃຫ້ກັນຊາບ ເພື່ອຄວາມເປັນເອກະພາບ ລະຫວ່າງ ກຄມຊ.,ຂະແໜງການກ່ຽວຂ້ອງ ແລະ ກຄມສ.ໂດຍມີທ່ານ ນາງ ມອນມະນີ ຍອຍບົວກ່ອງ ຫົວໜ້າ ກຄມຊ, ມີຫົວໜ້າ ກຄມສ,ຮອງຫົວໜ້າ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ມອນມະນີ ຍອຍບົວກ່ອງ ກ່າວວ່າ:ລັດຖະບານ ສປປ.ລາວ ມີຄວາມເອົາໃຈໃສ່ຢ່າງຕັ້ງໜ້າ ໃນການ ປະຕິບັດສັນຍາແມ່ນ້ຳຂອງ ປີ 1995 ໂດຍສະເພາະແມ່ນການນຳໃຊ້ຂັ້ນຕອນການແຈ້ງໃຫ້ຊາບ ພາຍໃຕ້ລະບຽບວ່າດ້ວຍການແຈ້ງໃຫ້ກັນຊາບ, ປືກສາຫາລືກັນກ່ອນ ແລະ ການເຮັດ ຂໍ້ຕົກລົງເຂົ້າໃນຂັ້ນຕອນການສ້າງເຂື່ອນໄຟຟ້າພະລັງງານນ້ຳ ຕາມລຳແມ່ນ້ຳຂອງ ແລະ ແມ່ນ້ຳສາຂາຂອງແມ່ນ້ຳຂອງ ທັງສ້າງຈິດສຳນຶກໃຫ້ມວນຊົນ ຢ່າງກວ້າງຂວາງ ໃຫ້ເຂົ້າໃຈເຖິງຄວາມສຳຄັນ ຂອງຊັບພະຍາກອນນ້ຳ ຢູ່ໃນອ່າງແມ່ນ້ຳຂອງຕອນລຸ່ມ ແລະ ຄວາມຕ້ອງການນຳໃຊ້, ວິທີການຄຸ້ມຄອງ ຊັບພະຍາກອນນ້ຳ ແບບປະສົມປະສານ.
ທ່ານ ນາງ ມອນມະນີ ຍອຍບົວກ່ອງ ກ່າວຕື່ມວ່າ:ແມ່ນ້ຳຂອງເປັນແມ່ນ້ຳສາຍຫລັກ ແລະ ສຳຄັນຕໍ່ການພັດທະນາເສດຖະກິດ ສປປ.ລາວ ແລະ ລາວກໍເປັນປະເທດທີ່ມີແຫລ່ງອຸດົມສົມບູນດ້ານຊັບພະຍາກອນນ້ຳ ຊຶ່ງແມ່ນປັດໄຈອັນສຳຄັນ ແລະ ເປັນທ່າແຮງອັນໃຫຍ່ຫລວງ ໃນການພັດທະນາພະລັງ ງານໄຟຟ້ນ້ຳຕົກ ປະກອບສ່ວນອັນສຳຄັນຕໍ່ການພັດທະນາເສດຖະກິດ-ສັງຄົມແຫ່ງຊາດ ເພື່ອຮັບປະກັນການພັດທະນາ ແລະ ນຳໃຊ້ຊັບພະຍາກອນນ້ຳ ໂດຍມີການປະສານງານ ໃຫ້ໄດ້ຜົນປະໂຫຍດສູງສຸດ ແລະ ມີຄວາມຍືນຍົງ ໂດຍສະເພາະຂັ້ນຕອນ, ລະບຽບວ່າດ້ວຍການແຈ້ງໃຫ່ກັນຊາບ, ການປືກ ສາຫາລືກັນກ່ອນ ແລະ ການເຮັດຂໍ້ຕົກລົງຂອງສັນຍາວ່າດ້ວຍການຮ່ວມມື ເພື່ອພັດທະນາອ່າງແມ່ນ້ຳຂອງແບບຍືນຍົງ ຊຶ່ງແມ່ນຂັ້ນຕອນໜຶ່ງທີ່ສຳຄັນ ສະແດງໃຫ້ເຫັນເຖິງຄວາມໂປ່ງໃສ ໃນການຮ່ວມມືອັນດີກ່ຽວກັບການພັດທະນາພະລັງງານໄຟຟ້ານ້ຳຕົກ ຂອງບັນດາປະເທດພາຄີແມ່ນ້ຳຂອງຊຶ່ງປະ ກອບດ້ວຍ: ກຳປູເຈຍ, ລາວ,ໄທ ແລະ ຫວຽດນາມ ບົນພື້ນຖານຈິດໃຈຮ່ວມມືກັນ ຕ່າງຝ່າຍຕ່າງໄດ້ຮັບຜົນປະໂຫຍດໃນການນຳໃຊ້ນ້ຳຢ່າງເປັນທຳ ແລະ ສົມເຫດສົມຜົນ ບົນຫລັກການສະເໝີພາບ,ເຄົາລົບນັບຖືອຳນາດ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ ແລະ ກັນ ຊຶ່ງໄດ້ຮ່ວມ ກັນລົງນາມ ໃນວັນທີ 5 ເມສາ 1995 ທີ່ແຂວງຊຽງລາຍ ປະເທດໄທ.ສັນຍາດັ່ງກ່າວປະກອບມີຫ້າລະບຽບການ ຄື: ລະບຽບວ່າດ້ວຍການແລກປ່ຽນຂໍ້ ມູນຂ່າວສານ, ລະບຽບວ່າດ້ວຍການແຈ້ງໃຫ້ກັນຊາບ,ການປືກສາຫາລືກັນກ່ອນ ແລະ ການເຮັດຂໍ້ຕົກລົງ, ລະບຽບວ່າດ້ວຍການຕິດ ຕາມການກວດກາການນຳໃຊ້ນ້ຳ,ລະບຽບວ່າດ້ວຍການຮັກສາລະດັບການໄຫລຂອງນ້ຳຢູ່ໃນລຳແມ່ນ້ຳຂອງ ແລະ ລະບຽບວ່າດ້ວຍຄຸນນະພາບນ້ຳ.
ການແຈ້ງໃຫ້ກັນຊາບພາຍໃຕ້ລະບຽບວ່າດ້ວຍການແຈ້ງໃຫ້ກັນຊາບ, ການປຶກສາຫາລືກັນກ່ອນ ແລະ ການເຮັດຂໍ້ຕົກລົງຂອງສັນຍາແມ່ນ້ຳຂອງ ປີ 1995 ເປັນບ່ອນອີງໃນການເຄື່ອນໄຫວວຽກງານ, ເປັນເຄື່ອງມືດ້ານນິຕິກຳໃນການຄຸ້ມຄອງ ຊັບພະຍາກອນນ້ຳໃນອ່າງແມ່ນ້ຳຂອງ ໂດຍຢັ້ງຢືນຄືນກ່ຽວ ກັບການຕັດສິນໃຈ ເພື່ອສຶບຕໍ່ຮ່ວມມື ແລະ ສົ່ງເສີມດ້ວຍວິທີການອັນສ້າງສັນ ແລະ ມີຜົນປະໂຫຍດຮ່ວມກັນ ໂດຍສອດຄ່ອງກັບຄວາມຕ້ອງການເພື່ອ ປ້ອງກັນຮັກສາ,ເສີມຂະຫຍາຍ ແລະ ຄຸ້ມຄອງເງື່ອນໄຂທາງດ້ານສິ່ງແວດລ້ອມ ແລະ ສິ່ງທີ່ມີຊິວິດຢູ່ໃນນ້ຳ ແລະ ບໍາລຸງຮັກສາຄວາມດຸ່ນດ່ຽງທາງ ດ້ານນິເວດວິທະຍາ.