ເຈົ້າກຳລັງຕັ້ງໃຈກັບການສອບ ຫລື ກັງວົນກ່ຽວກັບການຊ້ອມດົນຕີຣ ຫລື ຮູ້ສຶກວ່າຈະບໍ່ສຳເລັດງານບາງຢ່າງທີ່ສຳຄັນໃນເວລາໄດ້ ສິ່ງເຫລົ່ານີ້ຄືຄວາມຄຽດ ແລະ ເຈົ້າຈະພົບວ່າ ມັນຍາກຫລາຍທີ່ຈະບໍ່ກິນຂອງຫວານ ຫລື ກະແລ່ນຈັກອັນໜຶ່ງ ຊຶ່ງສິ່ງເຫລົ່ານີ້ສາມາດອະທິບາຍໄດ້ໂດຍການສຶກສາຂອງຊາວສະວິດເຊີແລນວ່າເກີດຫຍັງຂຶ້ນ
ແທ້ໆແລ້ວ ການສຶກສາຄົ້ນພົບວ່າ ສະໝອງຂອງພວກເຮົາອາດຈະກຳລັງຄິດຕໍ່ຕ້ານເຮົາຢູ່ ໃນບາງຄົນ ມັນອາດຈະທຳລາຍຄວາມຕັ້ງໃຈໃນການກິນສິ່ງທີ່ຖືກຕ້ອງກໍໄດ້
Silvia Maier ເຮັດວຽກໃຫ້ກັບ University of Zurich ປະເທດສະວິດເຊີແລນ ນາງແລະທີມວິໄຈຂອງນາງໄດ້ທຳການເຊີນກຸ່ມຜູ້ຊາຍໄວລຸ້ນຈຳນວນກວ່າ 41 ຄົນເຂົ້າມາໃນຫ້ອງແລັບເພື່ອທຳການທົດສອບ ພວກເຂົາເລີ່ມໂດຍການສະແດງອາຫານກວ່າ 180 ຊະນິດເທິງໜ້າຈໍຄອມພິວເຕີໃຫ້ແຕ່ລະຄົນເບິ່ງ ໃນແຕ່ລະເທື່ອ ພວກເຂົາຈະຖາມຜູ້ຊາຍເຫລົ່ານັ້ນເພື່ອໃຫ້ຕັດສິນໃຈວ່າ ມັນດີຕໍ່ສຸກຂະພາບບໍ ລົດຊາດເປັນຢ່າງໃດ ຄວາມໜ້າກິນຂອງອາຫານເປັນຢ່າງໃດ
ຫລັງຈາກນັ້ນ ນັກວິໄຈໄດ້ເຮັດການສ້າງຄວາມຄຽດໃຫ້ກັບຜູ້ຊາຍຈຳນວນກວ່າ 29 ຄົນ ພວກເຂົາສ້າງມັນໂດຍການໃຫ້ຜູ້ຊາຍເຫລົ່ານັ້ນນຳມືຂ້າງໜຶ່ງວາງໄວ້ໃນນ້ຳເຢັນເປັນເວລາສາມນາທີ ຖ້ານ້ຳນັ້ນເຮັດໃຫ້ບໍ່ພໍໃຈ ອາສາສະໝັກເຫລົ່ານັ້ນສາມາດຖອນມືອອກມາໄດ້ ແຕ່ພວກເຂົາຍັງຕ້ອງທຳການເບິ່ງວິດີໂອອີກດ້ວຍ ອາສາສະໝັກຈະຖືກໂນ້ມນ້າວໃຫ້ວາງມືເຂົ້າໄປໃນນ້ຳເຢັນອີກເທື່ອ ນັກວິໄຈຈະທຳການເບິ່ງ ແລະ ບັນທຶກພາບ
ຜູ້ຊາຍອີກ 22 ຄົນຈະເອົາມືຂ້າງໜຶ່ງຈຸ່ມລົງໄປໃນນ້ຳອຸ່ນ ແລະ ບໍ່ໄດ້ທຳການບັນທຶກວິດີໂອ
ຫລັງຈາກນັ້ນ ນັກວິໄຈໄດ້ສະແດງກຸ່ມຂອງພາບອາຫານສອງຊຸດໃຫ້ແຕ່ລະຄົນເບິ່ງ ພວກເຂົາເຮັດແບບນີ້ປະມານ 210 ເທື່ອ ແລະ ກ່ອນທີ່ພວກເຂົາຈະເລີ່ມທຳການເລືອກ ຜູ້ຊາຍເຫລົ່ານີ້ຈະຖືກຖາມໃຫ້ເລືອກວ່າອັນໃດດີຕໍ່ສຸກຂະພາບຫລາຍກວ່າກັນໃນສອງອັນ ເມື່ອການທົດສອບຈົບລົງ ນັກວິທະຍາສາດຈະໃຫ້ຂອງກິນຫລິ້ນແກ່ອາສາສະໝັກ ແຕ່ລະຄົນຈະໄດ້ຮັບຂອງກິນຫລິ້ນທີ່ພວກເຂົາບອກວ່າພວກເຂົາຢາກໄດ້ມັນ
ທັ້ງໆທີ່ມີການແນະນຳກ່ຽວກັບການເລືອກອາຫານທີ່ດີຕໍ່ສຸກຂະພາບແລ້ວນັ້ນ ກຸ່ມຄົົນທີ່ມີຄວາມຄຽດມີແນວໂນ້ມທີ່ຈະເລືອກອາຫານທີ່ດີຕໍ່ສຸກຂະພາບນ້ອຍກວ່າ
ນັກວິໄຈຍັງສະແດງໃຫ້ເຫັນເຖິງການສະແກນທາງສະໝອງຂອງອາສາສະໝັກອີກດ້ວຍ ຊຶ່ງມັນສະແດງໃຫ້ເຫັນເຖິງສ່ວນຂອງສະໝອງສ່ວນໃດທີ່ຖືກກະຕຸ້ນເມື່ອພວກເຂົາທຳການເລືອກ “ການຄົ້ນພົບຂອງເຮົາຊີ້ໃຫ້ເຫັນວ່າ ຄວາມຄຽດນັ້ນສົ່ງຜົນຕໍ່ກະບວນການຕັດສິນໃຈ” ທີມຂອງ Maier ໄດ້ສະຫລຸບໄວ້ ແລະ ມັນເຮັດສິ່ງນີ້ໄດ້ໂດຍການປັບປ່ຽນທາງເດີນຂອງສະໝອງສອງທາງເດີນ ທາງເດີນໜຶ່ງຈະສົ່ງຜົນຕໍ່ຂໍ້ມູນຂອງການຮັບລົດຊາດ ອີກທາງເດີນໜຶ່ງຈະສົ່ງຜົນຕໍ່ຄວາມສາມາດຂອງບຸກຄົນທີ່ຕັ້ງເປົ້າໝາຍໄວ້ ແລະ ທຳການຕັດສິນໃຈທີ່ຈະຍ່າງຕາມເປົ້າໝາຍທີ່ວາງໄວ້ ເຊັ່ນການເລືອກກິນສິ່ງທີ່ດີຕໍ່ສຸກຂະພາບເຮົາ
ການຄົ້ນພົບນີ້ຖືກຕີພິມໃນວາລະສານທາງວິຊາການລະດັບນານາຊາດ Neuron ເມື່ອວັນທີ່ 5 ສິງຫາ
ການສຶກສາທີ່ຫລາຍກວ່ານີ້ຍັງເປັນທີ່ຕ້ອງການຢູ່ເພື່ອທີ່ຈະຢືນຢັນການຄົ້ນພົບເທື່ອໃໝ່ນີ້ ແຕ່ສັນຍານທີ່ເກີດຂື້ນຊີ້ໃຫ້ເຫັນວ່າ ຄວາມຄຽດບໍ່ພຽງເຮັດໃຫ້ອາຫານນັ້ນເບິ່ງໜ້າດຶງດູດໃຈ ແຕ່ມັນຍັງສົ່ງຜົນຕໍ່ຄວາມສາມາດທາງສະໝອງໃຫ້ຕໍ່ຕ້ານການກິນສິ່ງທີ່ຖືກຕ້ອງອີກດ້ວຍ