ອາການເມົາລົດເມົາເຮືອອາດຈະບໍ່ມີອີກຕໍ່ໄປໃນອີກ 5-10 ປີຂ້າງໜ້ານີ້ຫລັງຈາກທີ່ນັກວິທະຍາສາດຄົ້ນພົບວິທີການປິ່ນປົວໃໝ່ແລ້ວ
ສາເຫດຂອງອາການເມົາລົດເມົາເຮືອຍັງຄົງເປັນປິດສະໜາສຳລັບນັກວິທະຍາສາດຢູ່ເລື່ອຍມາ ໂດຍທິດສະດີທີ່ໄດ້ຮັບການຍອມຮັບຫລາຍທີ່ສຸດອະທິບາຍວ່າ ຂໍ້ຄວາມທີ່ໄດ້ຮັບຈາກຕາແລະຫູສູ່ສະໝອງນັ້ນເຮັດໃຫ້ເຮົາເກີດຄວາມສັບສົນໃນຂະນະທີ່ເຮົາກຳລັງເຄື່ອນທີ່
ອາການດັ່ງກ່າວເປັນອາການທີ່ພົບໄດ້ທົ່ວໄປແລະຕົວເຮົາເອງກໍມີໂອກາດທີ່ຈະມີອາການເມົາລົດເມົາເຮືອຫລືແມ່ນແຕ່ເມົາເຄື່ອງບິນດ້ວຍ ແຕ່ຢ່າງໃດກໍຕາມ ຄົົນທີ່ມີອາການເມົາຈົນເຖິງຂັ້ນຮຸນແຮງ ເຊັ່ນ ມຶນຫົວ ປວດຫາກ ເຫື່ອອອກ ນັ້ນມີພຽງ 3 ໃນ 10 ຄົນເທົ່ານັ້ນ
ງານວິໄຈຫລ້າສຸດຈາກອິມພີລຽນຄອນເລດ ນະຄອນຫລວງລອນດອນ ທີ່ໄດ້ຮັບການເຜີຍແຜ່ໃນວາລະສານວິຊາການ Neurology ອະທິບາຍເຖິງແນວຄິດການໃຊ້ກະແສໄຟຟ້າອ່ອນໆສົ່ງໄປທີ່ໜັງຫົວໃຫ້ຊຶມໄປເຖິງສະໝອງສ່ວນທີ່ຮັບຜິດຊອບການປະມວນຜົນການເຄື່ອນໄຫວ ດ້ວຍວິທີນີ້ ຜົນກະທົບຈາກຂໍ້ມູນຂາເຂົ້າທີ່ໜ້າສັບສົນທີ່ຮັບມາຈາກຫູແລະຕາຈະຫລຸດລົງໄປໄດ້ ແລະຈະຊ່ວຍປ້ອງກັນບັນຫາທີ່ຈະກໍ່ໃຫ້ເກີດອາການເມົາລົດເມົາເຮືອຕໍ່ໄປໄດ້
ແລະໃນອະນາຄົດ ເທກນິກນີ້ອາດຈະເປັນວິທີການຂັດຂວາງກະບວນການເມົາລົດເມົາເຮືອທີ່ມີປະສິດທິພາບ ປອດໄພ ແລະສາມາດເຂົ້າເຖິງໄດ້ໂດຍງ່າຍ
ດຣ. ຄາເດຍ ອາລ໌ຊາດ ແຫ່ງສາຂາແພດສາດ ອິມພີລຽນຄອນເລດ ນະຄອນຫລວງລອນດອນ ຫົວໜ້າໃນໂຄງການວິໄຈເທື່ອນີ້ເຜີຍວ່າ “ເຮົາໝັ່ນໃຈວ່າພາຍໃນ 5-10 ປີຄົນຈະສາມາດຍ່າງໄປຫາຊື້ອຸປະກອນປ້ອງກັນການເມົາລົດເມົາເຮືອໄດ້ ລັກສະນະຄ້າຍໆກັບເຄື່ອງທີ່ເຮົາໃຊ້ແກ້ອາການປວດຫລັງ ເຮົາຫວັງວ່າເຄື່ອງນີ້ຈະສາມາດລວມເຂົ້າກັບໂທລະສັບມືຖື ແລະສາມາດຈະສົ່ງກະແສໄຟຟ້າທີ່ພໍເໝາະຜ່ານຫູຟັງໄປຍັງສະໝອງໄດ້ ຫລືບໍ່ ອາດຈະເປັນຮູບແບບຂອງຂົ້ວໄຟຟ້າຕິດໄວ້ທີ່ຫົວຕັ້ງແຕ່ກ່ອນເດີນທາງ ແລ້ວເວລາຂຶ້ນເຮືອກໍຄ່ອຍກະຕຸ້ນໄຟຟ້າ ເປັນຕົ້ນ”
ໃນການສຶກສາເທື່ອນີ້ ອາສາສະໝັກໄດ້ໃສ່ຂົ້ວໄຟຟ້າໄວ້ທີ່ຫົວເປັນເວລາ 10 ນາທີ ຈາກນັ້ນໄດ້ຮັບຄຳສັ່ງໃຫ້ນັ່ງທີ່ຕັ່ງໝຸນແລະເລື່ອນຂຶ້ນລົງໄດ້ເພື່ອຈຳລອງການເຄື່ອນທີ່ຂອງຍານພາຫະນະທີ່ເຮັດໃຫ້ເກີດອາການເມົາ ຫລັງຈາກໄດ້ຮັບການປິ່ນປົວແລ້ວ ອາສາສະໝັກລາຍງານວ່າມີອາການປວດຫາກຫລຸດລົງ ແລະຫາຍຈາກອາການເມົາໄວຂຶ້ນ
ສາດສະດາຈານໄມເຄີນ ເກດຕີ້ ແຫ່ງອິມພິລຽນຄອນເລດ ນະຄອນຫລວງລອນດອນ ນັກວິໄຈຮ່ວມແລະຜູ້ຊ່ຽວຊານດ້ານອາການເມົາເຜີຍວ່າ “ບັນຫາຂອງວິທີການປິ່ນປົວອາການເມົາລົດເມົາເຮືອຄືປະສິດທິພາບຂອງວິທີນັ້ນໆ ຫາກວ່າເປັນໄລຍະທາງສັ້ນໆຫລືເປັນຜູ້ໂດຍສານຄົນໜຶ່ງຄືຊິບໍ່ມີປັນຫາຫຍັງ ແຕ່ຫາກເຈົ້າເຮັດວຽກຢູ່ເທິງເຮືອແລ້ວມີອາການເມົາເຮືອ ເຈົ້າຈະເຮັດວຽກໄດ້ຢ່າງໃດ”
“ເຮົາຕື່ນເຕັ້ນກັບວິທີການປິ່ນປົວໃໝ່ນີ້ ທີ່ຈະຊ່ວຍປ້ອງກັນການເມົາລົດເມົາເຮືອໄດ້ໂດຍບໍ່ມີຜົນຂ້າງຄຽງ ປະໂຫຍດຈາກວິທີນີ້ກໍຄືກັບເຮົາມີຢາປິ່ນປົວອາການເມົາຕິດຕົວຢູ່ທຸກທີ່ທີ່ໄປທ່ຽວນັ້ນແຫລະ”
ທີມວິໄຈກຳລັງເລີ່ມເຈລະຈາກັບພາກອຸດສາຫະກຳເພື່ອພັດທະນາອຸປະກອນຂຶ້ນ ໂດຍປະຈຸບັນມີຄວາມສົນໃຈຈາກທາງການທະຫານເຂົ້າມາແລ້ວ
“ຈາກການສຶກສາອື່ນໆ ການກະຕຸ້ນສະໝອງນັ້ນຍັງຊ່ວຍເພີ່ມສະມາທິແລະຄວາມຕັ້ງໃຈໄດ້ ງານວິໄຈນີ້ຈຶ່ງເປັນທີ່ສົນໃຈກັບທາງທະຫານ ແລະເຮົາກໍຄິດວ່າກຸ່ມອື່ນໆເຊັ່ນນັກຮຽນແລະຄົົນທີ່ເຮັດວຽກກັບຄອມພິວເຕີຕະຫລອດເວລາກໍຢາກຈະເອົາໄປລອງ”
“ກະແສໄຟຟ້າທີ່ເຮົາໃຊ້ຂ້ອນຂ້າງນ້ອຍແລະບໍ່ມີເຫດຜົນໃດເລີຍທີ່ຈະຄິດເຖິງເລື່ອງຜົນຂ້າງຄຽງຫາກເຮົາໃຊ້ໃນໄລຍະສັ້ນ”