ການໃຊ້ຫົວຫລິ້ນບານເຮັດໃຫ້ເກີດການກະທົບ ແຕ່ມັນບໍ່ແມ່ນສາເຫດຫລັກຂອງການເກີດອາການບາດເຈັບທາງສະໝອງ
ກົດຫລັກຂອງກິລາເຕະບານກໍຄື ຫ້າມໃຊ້ແຂນຫລືມືໃນການຫລິ້ນ ດັ່ງນັ້ນເມື່ອລູກບານຖືກສົ່ງຂື້ນຢູ່ເທີງອາກາດ ວິທີທີ່ງ່າຍທີ່ສຸດຂອງຜູ້ຫລິ້ນທີ່ຈະທຳການປ່ຽນແປງທິດທາງຂອງລູກບານຄື ການໃຊ້ຫົວ ຜູ້ຫລິ້ນທີ່ໃຊ້ຫົວໃນການໂໝ່ງບານສາມາດເຮັດໃຫ້ເກີດການກະທົບກະເທືອນຕໍ່ສະຫມອງຊຶ່ງເປັນ ຊະນິດໜຶ່ງຂອງອາການບາດເຈັບຂອງສະຫມອງໄດ້
ອົງກອນກີລາຫລາຍໆ ອົງກອນນັ້ນສະໜັບສະໜູນການຫ້າມບໍ່ໃຫ້ຜູ້ຫລິ້ນທຳການໃຊ້ຫົວໂໝ່ງບານໃນກຸ່ມຂອງຜູ້ຫລິ້ນເຍົາວະຊົນ ແຕ່ນັກວິໄຈທີ່ University of Colorado ໃນ Denver ໄດ້ລາຍງານວ່າ ຜູ້ຫລິ້ນທີ່ໃຊ້ຫົວໃນການຫລິ້ນບໍ່ໄດ້ເປັນບັນຫາຫລັກຂອງເລື່ອງນີ້ ການກະທົບກະເທືອນຂອງສະຫມອງນັ້ນເກີດມາຈາກ ຜູ້ຫລິ້ນບານໃນທີມທຳການສະກັດກັ້ນຢ່າງຮຸນແຮງແລະຮ່າງກາຍຂອງຜູ້ຫລິ້ນຊົນກັນເອງ
ນັກລະບາດວິທະຍາ Dawn Comstock ເປັນຜູ້ນຳການສຶກສານີ້ ຊຶ່ງປາກົດໃນວາລະສານທາງວິຊາການລະດັບນານາຊາດ JAMA Pediatrics
Comstock ແລະທີມວິໄຈຂອງນາງໄດ້ທຳການວິເຄາະຂໍ້ມູນຈາກ ລາຍງານຂໍ້ມູນອອນໄລນ໌ຂອງໂຮງຮຽນມັດທະຍົມປາຍ ໂດຍທີ່ໃນເວັບໄຊຕ໌ນີ້ຈະທຳການຕິດຕາມອາການບາດເຈັບທາງກີລາຂອງນັກກີລາໃນໂຮງຮຽນມັດທະຍົມປາຍຂອງປະເທດສະຫາຣັດອາເມຣິກາ ເມື່ອປີທີ່ແລ້ວ ກຸ່ມວິໄຈຂອງ Comstock ໄດ້ສະແດງເຖິງການວິເຄາະແບບດຽວກັນກັບອາການບາດເຈັບຂອງກີລາປະເພດໜຶ່ງທີ່ເອີ້ນວ່າ lacrosse ແລ້ວ ໃນຕອນນີ້ ພວກເຂົາໄດ້ເນັນໄປທີ່ອາການການກະທົບກະເທືອນທີ່ເກີດຈາກກີລາແຕະບານຊຶ່ງມີຫລາຍກວ່າ 600,000 ກໍລະນີທີ່ລາຍງານໃນໄລຍະປີ 2005 ເຖິງ 2014
ໃນບາງອາການບາດເຈັບ (17% ໃນກຸ່ມເດັກຜູ້ຊາຍ ແລະ 29% ໃນກຸ່ມເດັກຜູ້ຍິງ) ເກີດມາຈາກລູກບານ ຫລື ສ່ວນບາງຢ່າງຂອງອຸປະກອນສວມໃສ່ ການກະທົບກະເທືອນອື່ນໆ ເກີດມາຈາກເມື່ອຜູ້ຫລິ້ນລົ້ມລົງກັບພື້ນ (13.3% ໃນເດັກຜູ້ຊາຍແລະ 19.2% ໃນເດັກຜູ້ຍິງ) ແຕ່ການກະແທກກັນລະຫວ່າງຜູ້ຫລິ້ນສອງຄົນນັ້ນຈະຢູ່ທີ່ 68.6% ໃນເດັກຜູ້ຊາຍ ແລະ 51.3% ໃນເດັກຜູ້ຍິງຊຶ່ງມີອາການບາດເຈັບທາງສະຫມອງ
ນັກວິໄຈຍັງໄດ້ສຶກສາກ່ຽວກັບການກະທົບເທືອນທີ່ເກີດຈາກການໃຊ້ຫົວຫລິ້ນອີກດ້ວຍ ປະມານ 30.6% ໃນເດັກຜູ້ຊາຍຈະໄດ້ຮັບການກະທົບກະເທືອນຮູບແບບນີ້ ແລະ 25.3 % ຈະເປັນໃນສ່ວນຂອງເດັກຜູ້ຍິງ ແຕ່ມີເປີເຊັນພຽງເລັກນ້ອຍເທົ່ານັ້ນທີ່ເກີດອາການບາດເຈັບທາງສະຫມອງທີ່ມາຈາກໝາກບານກະທົບເຂົ້າທີ່ຫົວ ຫລາຍກວ່າເຄີ່ງໜຶ່ງຂອງການກະທົບກະເທືອນທີ່ມີຜົນຕໍ່ການບາດເຈັບທາງສະຫມອງນັ້ນມາຈາການການຊົນກັນຂອງຜູ້ຫລິ້ນສອງຄົນ
ການຊົນກັນໃນເກມເຕະບານນັ້ນເປັນເລື່ອງທີ່ເກີດຂື້ນເປັນເລື່ອງປົກກະຕິຢູ່ແລ້ວ ຊຶ່ງນັ້ນສະທ້ອນໃຫ້ເຫັນເຖິງການຫລິ້ນທີ່ເບິ່ງເຂັມຂົ້ນຫລາຍຂຶ້ນ ທາງອອກທີ່ດີທີ່ສຸດໃນການຫລຸດຜ່ອນອາການບາດເຈັບທາງສະໝອງບໍ່ແມ່ນການຫ້າມຜູ້ຫລິ້ນໃຊ້ຫົວໃນການເຂົ້າຫລິ້ນ ການອອກກົດລະບຽບແລະການປ້ອງກັນການຊົນກັນໜ້າຈະເປັນເລື່ອງທີ່ເບິ່ງມີປະສິດທິພາບຫລາຍກວ່າ