ກອງປະຊຸມພົບປະລະຫວ່າງຜູ້ປະກອບການ ນັກທຸລະກິດຂະແໜງການຢາ ສປປ ລາວ ແລະ ຜູ້ປະກອບການໃນຂະແໜງການຢາປະເທດປາກິດສະຖານ ໄດ້ມີຂຶ້ນວັນທີ 13 ກັນຍາ 2013 ຢູ່ສະພາການຄ້າ ແລະ ອຸດສາຫະກຳແຫ່ງຊາດລາວ ໂດຍເປັນປະທານຂອງທ່ານ ຂັນທະວົງ ດາລາວົງ ເລຂາທິການໃຫຍ່ສະພາການຄ້າ ແລະ ອຸດສາຫະກຳແຫ່ງຊາດລາວ ມີບັນດາຜູ້ປະກອບການໃນຂະແໜງການຢາຈາກ ລາວ-ປາກິດສະຖານ ແລະ ແຂກຖືກເຊີນເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ເພື່ອຄົ້ນຄວ້າປຶກສາຫາລື ແລະ ຊອກຫາຊ່ອງທາງຄວາມເປັນໄປໄດ້ໃນການຊື້-ຂາຍ ການຮ່ວມມື ແລະ ລົງທຶນຮ່ວມກັນທາງດ້ານທຸລະກິດຂະແໜງການຢາ ລະຫວ່າງຜູ້ປະກອບການທັງສອງປະເທດ ລາວ-ປາກິດສະຖານ ເນື່ອງຈາກປະເທດປາກິດສະຖານ ແມ່ນປະເທດໜຶ່ງທີ່ຂະແໜງການຢາມີການຂະຫຍາຍຕົວຢ່າງວ່ອງໄວ ທັງສາມາດຜະລິດຢາ ແລະ ປິ່ນປົວຄົນ-ສັດທີ່ມີຄຸນນະພາບ ໄດ້ມາດຕະຖານສາກົນ ກໍເລີຍມີຄວາມສົນໃຈຈະມາຮ່ວມມືກັບຜູ້ປະກອບການຂະແໜງການຢາຢູ່ຂົງເຂດອາຊີຕາເວັນອອກສຽງໃຕ້ ໂດຍສະເພາະແມ່ນ ສສ.ຫວຽດນາມ ແລະ ສປປ ລາວ.
ການພົບປະໃນຄັ້ງນີ້ແມ່ນມີຄວາມສຳຄັນຢ່າງຍິ່ງ ແລະ ເປັນຄັ້ງປະຫວັດສາດສຳລັບຜູ້ປະກອບການຂະແໜງການຢາຂອງ ສປປ ລາວ ເຊິ່ງນອກຈາກໄດ້ມີໂອກາດໂອ້ລົມກັບ ບັນດາຜູ້ຜະລິດຢາປົວພະຍາດທີ່ມີຊື່ສຽງຂອງປາກິດສະຖານແລ້ວ ຍັງຈະສາມາດປຶກສາຫາລືຄວາມເປັນໄປໄດ້ໃນການຮ່ວມມື ແລະ ຊື້ຢາປົວພະຍາດຈາກຜູ້ຜະລິດໂດຍກົງ ເຊິ່ງຈະມີລາຄາຖືກກວ່າການນຳເຂົ້າຈາກປະເທດເພື່ອນບ້ານ.