ນັກຈິດວິທະຍາເພງໃນປະເທດອິສາເອນໄດ້ເຜີຍຂໍ້ມູນທີ່ໜ້າສົນໃຈຂອງການເກີດອຸປະຕິເຫດໃນລົດທີ່ມີສາເຫດມາຈາກການຟັງເພງ ໂດຍສະເພາະຢ່າງຍິ່ງການໃສ່ເພງທີ່ມັກ ຫລື ເພງທີ່ເຮັດໃຫ້ເຈົ້າເກີດອາການ “ເພີດເພີນໄປຕາມອາລົມ” ບໍ່ວ່າຈະເປັນເພງທີ່ມັກ ຫລື ບໍ່ກໍຕາມ
Professor Warren Brodsky ສາດສະດາຈານນັກຈິດວິທະຍາເພງພາກວິຊາສິນລະປະສາດ ມະຫາວິທະຍາໄລ Ben-Gurion ປະເທດອິສາເອນ ໄດ້ເຜີຍຂໍ້ມູນຜ່ານທາງເວັບໄຊຕ໌ haaretz.com ວ່າການຟັງເພງໃນຂະນະຂັບລົດ ໂດຍສະເພາະເພງທີ່ເຮັດໃຫ້ເກີດອາລົມຮ່ວມໃນການຟັງຈົນເຮັດໃຫ້ເກີດສະພາວະຈິດໃຈທີ່ລ່ອງລອຍໄປກັບສິ່ງອື່ນ ຊຶ່ງຈະສົ່ງຜົນຕໍ່ສະມາທິການຂັບຂີ່ຈົນສູນເສຍການຄວບຄຸມລົດຊົ່ວຂະນະ ແລະ ກໍ່ໃຫ້ເກີດອຸປະຕິເຫດທາງລົດໄດ້ຫລາຍພໍໆ ກັບເຫງົານອນແລ້ວຂັບ
ຊຶ່ງເພງທີ່ເກີດອາລົມຮ່ວມນັ້ນເກືອບຈະຄວບຄຸມຫລາຍເພງຫລາຍແນວ ຕັ້ງແຕ່ເພງທີ່ເຮັດໃຫ້ເກີດແຮງບັນດານໃຈ, ເພງທີ່ເຮັດໃຫ້ເກີດການລຳລຶກເຫດການໃນອະດີດ, ເພງທີ່ເຮັດໃຫ້ເຈົ້າມີຄວາມສຸກຫລາຍແລະເພງທີ່ເຮັດໃຫ້ເຈົ້າເສົ້າໜັກຫລາຍ ຊຶ່ງພຽງພໍທີ່ຈະເຮັດໃຫ້ຜູ້ຂັບເກີດສະພາວະ ຝັນກາງເວັນໄດ້
ສຳນັກງານເພື່ອຄວາມປອດໄພເທິງທາງຫລວງແຫ່ງຊາດສະຫາຣັດ (NHTSA) ໄດ້ເສີມວ່າ ການຂັບລົດໃນສະພາບເພີດເພີນ ແລະ ຝັນກາງເວັນ ເປັນໄພຄຸກຄາມທີ່ສຳຄັນເທິງຖະໜົນຂອງປະເທດ ໂດຍສະຖິຕິອຸປະຕິເຫດຈາກພາວະເພີດເພີນເປັນ 1 ໃນ 4 ປັດໄຈຂອງການເກີດອຸປະຕິເຫດໃນປະເທດສະຫາຣັດ ຫລາຍເຖິງ 1.2 ລ້ານຕໍ່ປີ ໂດຍຂໍ້ມູນຈາກບໍລິສັດອີລີບ ປະກັນໄພ ໄດ້ເຜີຍວ່າອຸປະຕິເຫດທີ່ເກີດຈາກການຝັນກາງເວັນໃນຂະນະຂັບລົດເກີດອຸປະຕິເຫດທັງແບບເບົາ ໄປຈົນເຖິງເກີດອຸປະຕິເຫດຮ້າຍແຮງຊຶ່ງຫລາຍເຖິງ 60% ພາຍໃນຊ່ວງໄລຍະເວລາສອງປີ
Brodsky ໄດ້ໃຫ້ຄຳແນະນຳວ່າບໍ່ຄວນຟັງເພງທີ່ເຮັດໃຫ້ເກີດການກະຕຸ້ນທາງອາລົມໄປໃນທາງບວກ-ລົບຫລາຍຈົນເຮັດໃຫ້ເກີດສະພາວະຈິດໃຈທີ່ເລື່ອນລອຍຈົນເສຍການຄວບຄຸມ ແລະ ພວກເຂົາໄດ້ເຄີຍຄິດວ່າຢາກໃຫ້ພາຍໃນລົດມີລະບົບກວດຈັບສະພາບອາລົມຂອງຄົນຂັບ ຫາກລະບົບກວດຈັບສະພາວະຄົນຂັບລົດໄດ້ສູນເສຍການຄວບຄຸມ ລະບົບຈະແຈ້ງເຕືອນຄົນຂັບໄປຈົນເຖິງການຢຸດຫລິ້ນເພງ ຫລື ອາດຢຸດລົດທັນທີ