ຕ້ອງການເຫດຜົນອື່ນໆອີກບໍທີ່ຈະເລີກງານຕາມເວລາ
ຈາກການສຶກສາໃໝ່ຄົ້ນພົບວ່າ ການເຮັດວຽກງານກວ່າ 55 ຊົ່ວໂມງຫລືຫລາຍກວ່ານັ້ນສາມາດກໍ່ໃຫ້ເກີດຄວາມສ່ຽງຂອງການເປັນພະຍາດເສັ້ນເລືອດໃນສະຫມອງແຕກໄດ້
ການສຶກສາໄດ້ຕີພິມໃນວາລະສານທາງວິຊາການ The Lancet ຊຶ່ງທຳການວິເຄາະຂໍ້ມູນຈາກການສຶກສາ 25 ການສຶກສາໂດຍທຳການຕິດຕາມສຸກຂະພາບຂອງຄົນກວ່າ 600,000 ຄົນທັງຜູ້ຍິງແລະຜູ້ຊາຍຈາກຍຸໂຣບ ສະຫາຣັດອາເມຣິກາ ແລະ ອອດສ໌ເຕເຣຍ ຫລາຍກວ່າ 8 ປີເຄີ່ງ
“ດ້ວຍຂໍ້ມູນການສຶກສາທີ່ມີນັ້ນສາມາດເຮັດໃຫ້ພວກເຮົາເຮັດການສຶກສາກ່ຽວກັບຄວາມສຳພັນລະຫວ່າງຊົ່ວໂມງການເຮັດວຽກງານແລະຄວາມສ່ຽງຂອງພະຍາດທາງຫົວໃຈໄດ້ຊຶ່ງມີຄວາມແມ່ນຍຳເພີ່ມຂຶ້ນຫລາຍກວ່າແຕ່ກ່ອນ” ຜູ້ນຳການສຶກສາໄດ້ກ່າວໄວ້ຊຶ່ງກໍຄື ສາດສະດາຈານ Mika Kivimaki ຈາກ Department of Epidemiology and Public Health ໃນ University College London
ຂໍ້ມູນສະແດງໃຫ້ເຫັນວ່າ ຄົົນທີ່ເຮັດວຽກກວ່າ 55 ຊົ່ວໂມງຕໍ່ອາທິດມີຄວາມສ່ຽງເຖິງ 33 ເປີເຊັນຂອງການເປັນພະຍາດຫລອດເລືອດໃນສະຫມອງແຕກຫລາຍກວ່າຄົົນທີ່ເຮັດວຽກໃນຊ່ວງເວລາມາດຕະຖານຄື 35-40 ຊົ່ວໂມງຕໍ່ອາທິດ
ຍິ່ງຄົນເຮົາເຮັດວຽກຫລາຍເກີນກວ່າເວລາປົກກະຕິເທົ່າໃດ ກໍມີໂອກາດທີ່ຈະເປັນພະຍາດເສັ້ນເລືອດໃນສະຫມອງແຕກໄດ້ຫລາຍເທົ່ານັ້ນ ຊຶ່ງລວມໄປເຖິງປັດໄຈອື່ນໆດ້ວຍ ເຊັ່ນ ການສູບບຸຢາ ການດື່ມເຄື່ອງດື່ມທີ່ມີທາດເຫລົ້າ ສິ່ຂອງມຶນເມົາຕ່າງໆ ກິດຈະກຳອື່ນໆ ຄວາມດັນເລືອດແລະປະລິມານຄໍເລດເຕີລອນ
ການເຮັດວຽກງານທີ່ຫລາຍກວ່າ 55 ຊົ່ວໂມງຕໍ່ອາທິດຍັງມີຄວາມເຊື່ອມໂຍງກັບຄວາມສ່ຽງຕໍ່ພະຍາດຫົວໃຈອີກດ້ວຍເຖິງ 13 ເປີເຊັນ
“ການຄົ້ນພົບຂອງເຮົາແນະວ່າ ຄວນຈະໃຫ້ຄວາມສົນໃຈກ່ຽວກັບການຈັດການເລື່ອງຄວາມສ່ຽງຂອງພະຍາດທີ່ກ່ຽວຂ້ອງກັບຫລອດເລືອດສຳລັບຄົົນທີ່ມີຊົ່ວໂມງການເຮັດວຽກງານທີ່ຍາວນານ” ນັກວິໄຈກ່າວ
ນັກວິໄຈກ່າວວ່າ “ຈຳນວນຂອງປັດໄຈອື່ນໆ ເຊັ່ນ ຄວາມຄຽດ ການດື່ມຂອງມຶນເມົາ ຄວາມເສີຍຊາຂອງຮ່າງກາຍ ອາດຈະນຳໄປສູ່ຄວາມສ່ຽງທີ່ສູງຂຶ້ນຕໍ່ການເປັນພະຍາດຫລອດເລືອດໃນສະຫມອງແຕກສຳລັບກຸ່ມຄົົນທີ່ມີຊົ່ວໂມງເຮັດວຽກເປັນເວລາຍາວນານ”
ສາດສະດາຈານ Dino Pisaniello ຈາກ University of Adelaide ກ່າວວ່າ “ຄວາມເສີຍຊາໃນຊ່ວງເວລາເຮັດວຽກທີ່ຍືດອອກໄປນັ້ນເປັນປັດໄຈສ່ຽງທີ່ສຳຄັນຫລາຍທັງພະຍາດຫລອດເລືອດໃນສະຫມອງແຕກແລະພະຍາດຫົວໃຈ”
“ການເຮັດວຽກງານເປັນເວລາຍາວນານເປັນທາງຜ່ານສຳລັບປັດໄຈສ່ຽງອື່ນໆອີກດ້ວຍ ຊຶ່ງອາດຈະກໍ່ໃຫ້ເກີດປັນຫາທາງດ້ານສັງຄົມ” Pisanello ກ່າວ
“ການສຶກສາຄວນຈະມີແຮງກະຕຸ້ນຈາກສະຖານທີ່ເຮັດວຽກແລະກົດລະບຽບຂອງທີ່ເຮັດວຽກເຂົ້າໄປດ້ວຍ ແລະທຳການກວດສອບໃໝ່ອີກເທື່ອໂດຍສະເພາະຢ່າງຍິ່ງໃນກຸ່ມຂອງຜູ້ທີ່ມີຄວາມເສີຍຊາເປັນເວລາດົນໆ ທີ່ໄດ້ຮັບເງີນຄ່າແຮງຕ່ຳ”
Tony LaMontagne ສາດສະດາຈານທີ່ເຮັດວຽກກ່ຽວກັບທາງດ້ານສຸກຂະພາບໃຫ້ກັບ Deakin University ກ່າວວ່າ “ການສຶກສາເນັ້ນໃຫ້ເຫັນເຖິງການເຕີບໂຕຂອງງານວິໄຈທີ່ກ່ຽວຂ້ອງກັບຊົ່ວໂມງການເຮັດວຽກງານແລະຜົນທີ່ໄດ້ຮັບຂອງສຸກຂະພາບທີ່ຫລາກຫລາຍ”
ງານວິໄຈກ່ອນໜ້ານີ້ຂອງ LaMontagne ຄົ້ນພົບວ່າ ການເຮັດວຽກງານທີ່ຫລາຍເກີນກວ່າ 49 ຊົ່ວໂມງນັ້ນມີຄວາມສຳພັນກັບສຸກຂະພາບຈິດທີ່ເສື່ອມຖອຍລົງ ໂດຍສະເພາະຢ່າງຍິ່ງໃນກຸ່ມຜູ້ຍິງທີ່ເຮັດວຽກໃນອາຊີບທີ່ຕ້ອງໃຊ້ທັກສະສູງ”