ບາງຄົນມີພູມຕ້ານທານຕໍ່ອາການເມົາຄ້າງ ແທ້ ຫຼື ບໍ່ ການກິນອາຫານ ຫຼື ດື່ມນ້ຳຫຼັງດື່ມເຫຼົ້າມາໜັກຊ່ວຍປ້ອງກັນການເມົາຄ້າງໄດ້ ແທ້ ຫຼື ບໍ່ ຄຳຕອບຄືບໍ່ແມ່ນເລີຍ
ການດື່ມຂອງມຶນເມົາໃນປະລິມານຫຼາຍມັກຈະມີຜົນຂ້າງຄຽງຕາມມາໂດຍສະເພາະຜົນທີ່ບໍ່ດີ ແຕ່ຫາກຄົນເຮົາບໍ່ມີອາການເມົາຄ້າງເລີຍ ໂອກາດທີ່ຈະດື່ມຕໍ່ໄປນັ້ນມີສູງຫຼາຍຊຶ່ງມັກຈະເປັນຜົນບໍ່ດີຕໍ່ຮ່າງກາຍ ແລ້ວແມ່ນຫຍັງທີ່ຢູ່ເບື້ອງຫຼັງອາການນີ້ ເປັນສິ່ງທີ່ນັກວິໄຈພະຍາຍາມຄົ້ນຫາມາຕະຫຼອດ
ຫຼ້າສຸດ ນັກວິໄຈຈາກເນເທີແລນ ແລະ ແຄນາດາ ພະຍາຍາມສຳຫຼວດພຶດຕິກຳການດື່ມຂອງນັກດື່ມ ເພື່ອໃຫ້ເຂົ້າໃຈຕໍ່ໄປວ່າ ເຊົ້າມື້ຕໍ່ມາ ນັກດື່ມມີອາການເປັນຢ່າງໃດ
ໃນການສຶກສາເທື່ອນີ້ ມີການເກັບຂໍ້ມູນຈາກນັກຮຽນແຄນາດາ 789 ຄົນກ່ຽວກັບການດື່ມຂອງມຶນເມົາໃນຊ່ວງຮອບເດືອນທີ່ຜ່ານມາ ໂດຍໃນແບບສຳຫຼວດມາຖາມກ່ຽວກັບປະລິມານທີ່ດື່ມ ໄລຍະເວລາທີ່ດື່ມ ແລະ ຄວາມໜັກຂອງອາການເມົາຄ້າງ ນັກວິໄຈໄດ້ຄິດໄລ່ຈົນຄາດການໄດ້ວ່າ ຄວາມເຂ້ມຂົ້ນໃນຂອງມຶນເມົາໃນເລືອດສຳລັບຄົົນທີ່ມີອາການ ແລະ ບໍ່ມີອາການເມົາຄ້າງນັ້ນບໍ່ເທົ່າກັນ ໃນຈຳນວນຄົົນທີ່ບໍ່ໄດ້ມີອາການເມົາຄ້າງເລີຍເກືອບ 79 ເປີເຊັນນັ້ນຈະມີຄ່າຂອງມຶນເມົາໃນເລືອດຕ່ຳກວ່າປົກກະຕິປະມານ 0.10 ເປີເຊັນ (ຫຼືທຽບໄດ້ເປັນປະລິມານສອງເທົ່າຂອງປະລິມານຂອງມຶນເມົາທີ່ອະນຸຍາດໃຫ້ມີໄດ້ໃນການຂັບລົດໃນຫຼາຍປະເທດ ເຊັ່ນ ເນເທີແລນ ຝຣັ່ງ ແລະ ເຍີຣະມັນ ຫຼື ຢູ່ທີ່ເກືອບ 0.05 ເປີເຊັນ)
ດຣ. ຍໍລິດ ເວິລ໌ສະເຕີລ໌ ແຫ່ງມະຫາວິທະຍາໄລອູເຊກ ເນເທີແລນໄດ້ເຜີຍວ່າ “ເຮົາກຳລັງເຮັດວຽກຮ່ວມກັບຊາວແຄນາດາ ແລະ ນັກຮຽນຊາວດັດຊ໌ ໂດຍທົ່ວໄປແລ້ວເຮົາພົບຄວາມສຳພັນທີ່ກົງໄປກົງມາບາງຢ່າງ ເມື່ອເຮົາດື່ມ ເຮົາກໍຈະເມົາຄ້າງຫຼາຍຂຶ້ນ ຄົນສ່ວນໃຫຍ່ທີ່ເຄີຍບອກວ່າບໍ່ເຄີຍພົບກັບອາການເມົາຄ້າງເລີຍນັ້ນເບິ່ງຄືວ່າຈະດື່ມໜ້ອຍກວ່າ ຫຼື ບາງທີອາດຈະດື່ມໜ້ອຍຫຼາຍຈົນບໍ່ໜ້າຈະເກີດອາການເມົາຄ້າງໄດ້ເລີຍ”
ໃນການສຶກສາເພີ່ມເຕີມ ນັກວິໄຈສຶກສາວ່າການກິນອາຫານ ແລະ ດື່ມນ້ຳຫຼັງຈາກດື່ມຂອງມຶນເມົາໄປຫຼາຍໆນັ້ນຊ່ວຍບໍ່ໃຫ້ເກີດອາການເມົາຄ້າງໄດ້ ແມ່ນ ຫຼື ບໍ່ ຈຶ່ງໄດ້ລວມຄຳຕອບຈາກແບບສອບຖາມນັກຮຽນຊາວດັດຊ໌ 826 ຄົົນທີ່ເຄີຍມີໄລຍະດື່ມໜັກເມື່ອໄວໆນີ້ ແລະ ຖາມວ່າໄດ້ມີການກິນອາຫານ ຫຼື ດື່ມນ້ຳຫຼັງຈາກນັ້ນ ຫຼື ບໍ່ ນັກຮຽນຈຳນວນ 449 ຄົນ ຫຼື ເກືອບຄຶ່ງໜຶ່ງຕອບວ່າ ກິນອາຫານ ຫຼື ດື່ມນ້ຳຫຼັງຈາກດື່ມຂອງມຶນເມົາ ຫຼັງຈາກນັ້ນນັກວິໄຈໄດ້ຖາມເຖິງຄວາມຮຸນແຮງຂອງອາການເມົາຄ້າງ
ດຣ. ຍໍລິດ ເວິລ໌ສະເຕີລ໌ ເຜີຍວ່າ “ຄົົນທີ່ກິນອາຫານ ຫຼື ນ້ຳນັ້ນຈະມີໂອກາດທີ່ຈະເມົາຄ້າງຫຼຸດລົງໄປໜ້ອຍໜື່ງເທົ່ານັ້ນ ແຕ່ກໍບໍ່ໄດ້ແຕກຕ່າງຢ່າງມີຄວາມໝາຍທາງທິດສະດີໃດໆ ຈາກສິ່ງທີ່ເຮົາຮູ້ຈາກແບບສຳຫຼວດຄື ວິທີການດຽວທີ່ຈະປ້ອງກັນການເມົາຄ້າງໄດ້ຄື ດື່ມໃຫ້ມັນໜ້ອຍລົງ”
“ການສຶກສາເທື່ອນີ້ເປັນການສຶກສາໂດຍໃຊ້ແບບສອບຖາມ ແລະ ຖືເປັນເທື່ອທຳອິດເລີຍ ຊຶ່ງກໍໝາຍຄວາມວ່າ ການວິໄຈເທື່ອນີ້ຍັງມີຂໍ້ຈຳກັດຢູ່ຫຼາຍ ແຕ່ເຮົາກໍໄດ້ຊີ້ໃຫ້ເຫັນວ່າຫຍັງເປັນຫຍັງ ກ້າວຕໍ່ໄປຄືການສຶກສາໂດຍມີກຸ່ມຕົວຢ່າງຄວບຄຸມທີ່ຫຼາຍກວ່ານີ້”