ຂໍ້ມູນຫລ້າສຸດຈາກຍານນິວຮໍໄລຊັນຂອງອົງການບໍລິຫານການບິນແລະອາວະກາດແຫ່ງຊາດ ສະຫາຣັດ ຫລືນາຊ່າ ລະບຸວ່າພື້ນຜິວຂອງດາວພູໂຕມີຄວາມຫລາກຫລາຍແລະຊັ້ນບັນຢາກາດອຸດົມໄປດ້ວຍແກສ໌ໄນໂຕຣເຈນ ຢ່າງໃດກໍຕາມ ດາວພູໂຕກຳລັງເສຍໄນໂຕຣເຈນອອກສູ່ບັນຢາກາດທຸກໆຊົ່ວໂມງເພາະມີແຮງດັນນ້ອຍນັ້ນເອງ
ແລ້ວໄນໂຕຣເຈນເຫລົ່ານີ້ມາຈາກໃສ? ດຣ. ເຄຊີ ຊິງເກີ ນັກວິໄຈທີ່ສະຖາບັນວິໄຈເຊົາເວດ ແລະ ດຣ. ອະລັນສະເທີນ ຮອງຜູ້ອຳນວຍການສະຖາບັນ ໜຶ່ງໃນຜູ້ນຳພາລະກິດຍານນິວຮໍໄລຊັນໄດ້ອອກມາຕອບຄຳຖາມນີ້ຈາກງານວິໄຈໃນຫົວຂໍ້ On the Provenance of Pluto’s Nitrogen ທີ່ໄດ້ຮັບການຍອມຮັບໃຫ້ຕີພິມໃນວາລະສານວິຊາການ The Astrophysical Journal Letters ແລ້ວ
“ໄນໂຕຣເຈນຈຳນວນຫລາຍຈະຕ້ອງມາຈາກບ່ອນໃດບ່ອນໜື່ງແນ່ນອນເພື່ອຊົດເຊີຍໃຫ້ກັບນ້ຳແຂງໄນໂຕຣເຈນທີ່ກຳລັງເຄື່ອນທີ່ໄປອ້ອມຮອບພື້ນຜິວຂອງດາວໃນລະດູການແລະໄນໂຕຣເຈນຊັ້ນເທິງສຸດທີ່ກຳລັງອອກສູ່ບັນຍາກາດເນື່ອງຈາກຄວາມຮ້ອນຈາກລັງສີຍູວີຈາກດວງອາທິດ” ດຣ. ຊິງເກີເຜີຍ
ດຣ. ຊິງເກີ ແລະ ດຣ. ສະເທີນ ສົງໄສວ່າດາວຫາງຈະເຮັດໃຫ້ໄນໂຕຣເຈນໄປເກີດທີ່ພື້ນຜິວດວງດາວເພື່ອຊົດເຊີຍກັບໄນໂຕຣເຈນທີ່ຄ່ອຍໆຫລຸດອອກໄປຈາກດາວຫລືບໍ່ ຈຶ່ງໄດ້ເບິ່ງຂຸມເທິງດາວທີ່ເກີດຈາກດາວຫາງເຂົ້າຊົນວ່າໄນໂຕຣເຈນຈະຂຶ້ນມາທີ່ຜິວຫລາຍໜ້ອຍພຽງໃດ ແຕ່ຫາກວ່າການຄາດການນີ້ເປັນຈິງ ດາວພູໂຕຈະຕ້ອງມີຊັ້ນນ້ຳແຂງໄນໂຕຣເຈນທີ່ພື້ນຜິວທີ່ໜາຫລາຍ ແຕ່ກໍຍັງບໍ່ມີໃຜພິສູດໄດ້ຈົນເຖິງຕອນນີ້
“ເຮົາພົບວ່າປາກົດການທີ່ບອກວ່າໄນໂຕຣເຈນສ່ວນໃຫຍ່ມາຈາກປ່ອງພູເຂົາໄຟທີ່ເກີດຈາກດາວຫາງຊົນນັ້ນ ບໍ່ໜ້າຈະເປັນຈິງ ເພາະໄນໂຕຣເຈນບໍ່ໜ້າຈະຂຶ້ນມາຫລາຍພໍທີ່ຈະຊົດເຊີຍໄນໂຕຣເຈນທີ່ອອກໄປສູ່ອາວະກາດຕະຫລອດເວລາ” ດຣ. ຊິງເກີອະທິບາຍ
“ເປັນໄປໄດ້ວ່າ ອັດຕາຂອງໄນໂຕຣເຈນທີ່ອອກໄປໃນອະດີດນັ້ນບໍ່ໄດ້ສູງເທົ່າກັບຕອນນີ້ ເຮົາຈຶ່ງຄິດວ່າບາງທີ ການທີ່ດາວພູໂຕຍັງມີຄວາມເຄື່ອນໄຫວທາງທໍລະນີວິທະຍານີ້ທີ່ເຮັດໃຫ້ໄນໂຕຣເຈນອອກມາຈາກພາຍໃນດວງດາວຂຶ້ນມາສູ່ຜິວດາວໄດ້”
ເຖິງວ່າໃນຂະນະທີ່ຂຽນບົດຄວາມວິຊາການນີ້ ພາບຫລ້າສຸດຂອງດາວພູໂຕຈະຍັງມາບໍ່ເຖິງ ແຕ່ຫລ້າສຸດ ເຮົາໄດ້ຮູ້ແລ້ວວ່າ ຄວາມຮ້ອນທີ່ບໍລິເວນໃຕ້ພື້ນຜິວນັ້ນຮ້ອນແທ້ ແລະພົບຮອຍແຕກບໍລິເວນຜິວດາວ ຊຶ່ງກໍມີຄວາມກ່ຽວຂ້ອງກັນ
“ເຮົາທຳນາຍແລະສົ່ງບົດຄວາມໄປກ່ອນທີ່ຈະມີການໂຄຈອນຜ່ານ ເຮົາທຳນາຍວ່າດາວພູໂຕໜ້າຈະໄດ້ໂນໂຕຣເຈນມາຈາກພື້ນຜິວພາຍໃນແລະເກີດຂຶ້ນມາທີ່ຜິວດາວ ຈຶ່ງເປັນໄປໄດ້ວ່າດາວພູໂຕອາດຈະຍັງມີປ່ອງນ້ຳພຸຮ້ອນຫລືພູເຂົາໄຟເຢັນຢູ່ກໍໄດ້ ແລະເມື່ອຂໍ້ມູນຈາກຍານນິວຮໍໄລຊັນມາເຖິງ ເຮົາກໍຍິ່ງສົນໃຈທີ່ຈະພິສູດວ່າແນວຄິດຂອງເຮົາຖືກ”