ຂປລ. ງານວາງສະແດງສິນຄ້າ ວຽງຈັນ ເອັກສໂປ 2015 ຈະຈັດຂຶ້ນເປັນຄັ້ງທຳອິດ ໃນລະຫວ່າງວັນທີ 30 ພະຈິກ ເຖິງ 6 ທັນວາ 2015 ທີ່ສູນການຄ້າລາວ-ໄອເຕັກ ເຊິ່ງເປັນງານວາງ ສະແດງລະດັບຊາດ ແລະ ພາກພື້ນ ໂດຍໄດ້ລວມລວບ ເອົາຜົນສຳເລັດ ຂອງການພັດທະນາເສດຖະກິດ ແລະ ສັງຄົມ ຕະຫລອດໄລຍະ 40 ປີ ແຫ່ງການສ້າງສາ ແລະ ພັດທະນາຂອງ ສປປ ລາວ ນຳມາວາງສະແດງ ໂດຍມີ ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການກະຊວງ ອຸດສາຫະກຳ ແລະ ການຄ້າ ພ້ອມທັງທູຕານຸທູດ ຈາກຫລາຍປະເທດເຂົ້າຮ່ວມ.
ທ່ານ ນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ໄດ້ກ່າວໃນງານຖະແຫລງຂ່າວ ວຽງຈັນ ເອັກສໂປ ໃນວັນທີ 18 ສິງຫາ 2015 ນີ້ວ່າ: ໃນການຈັດງານວາງສະແດງ ສິນຄ້າຄັ້ງນີ້ແມ່ນໄດ້ລວບລວມເອົາ ຫົວໜ່ວຍທຸລະກິດທີ່ພົ້ນເດັ່ນ ແລະ ມີບົດບາດໃນການພັດທະນາ ເສດຖະກິດຂອງລາວ ທັງເປັນເວທີພົບປະແລກປ່ຽນ ຂໍ້ມູນຂ່າວສານດ້ານການຄ້າ ແລະ ການລົງທຶນຮ່ວມກັນ ລະຫວ່າງນັກທຸລະກິດລາວ ແລະ ປະເທດເພື່ອນມິດ ຄາດວ່າຈະມີຜູ້ເຂົ້າຮ່ວມ ປະມານ 400 ກວ່າບໍລິສັດ, ອົງການ ຈາກພາຍໃນ ແລະ ຕ່າງປະເທດ; ມີຮ້ານຫລາຍກວ່າ 600 ຮ້ານ ຈາກບັນດາກະຊວງ, ຫົວໜ່ວຍທຸລະກິດທີ່ພົ້ນເດັ່ນ ຈາກ 18 ແຂວງ ຈະນຳເອົາສິນຄ້າມາວາງສະແດງ ໂດຍສະເພາະ ຜະລິດຕະພັນກະສິກຳ ແລະ ອາຫານ, ເຟີນິເຈີ ແລະ ຕົບແຕ່ງພາຍໃນ, ຫັດຖະກຳ, ເຄື່ອງປະດັບອັນຍະມະນີ, ສິນຄ້າບໍລິໂພກ-ອຸປະໂພກ, ເຄື່ອງນຸ່ງຫົມ, ເຄື່ອງອີເລັກໂທຣນິກ, ສິນຄ້າ ODOP ແລະ ອື່ນໆ
ການຈັດ ງານວາງສະແດງໃນຄັ້ງນີ້ ເປັນກິດຈະກຳໜຶ່ງທີ່ນອນ ໃນຫລາຍກິດຈະກຳ ທີ່ຈັດຂຶ້ນເພື່ອເປັນການສ້າງຂະບວນການ ສະເຫລີມສະຫລອງ ການສະຖາປະນາ ສປປ ລາວ ຄົບຮອບ 40 ປີ ພ້ອມກັນນີ້ກໍຍັງເປັນການກຽມຄວາມພ້ອມ ໃຫ້ແກ່ການເຂົ້າຮ່ວມປະຊາຄົມ ເສດຖະກິດອາຊຽນ ໃນທ້າຍປີ 2015 ນີ້
ຂອບໃຈຂ່າວຈາກ:
