ຕອນເຊົ້າວັນທີ 17 ສິງຫາ 2015 ຢູ່ທີ່ ໂຮງຮຽນເຕັກນິກວິຊາຊີບແບບປະສົມ ແຂວງຫົວພັນ ໄດ້ຈັດພິທີມອບທືນການສຶກສາ ແລະ ເຝິກອົບຮົມວິຊາຊີບຊັ້ນຕົ້ນ C1 ( ຊີ1 ) ໃຫ້ແກ່ກຸ່ມດ້ອຍໂອກາດຢູ່ໃນ 10 ເມືອງທົ່ວ ແຂວງຫົວພັນ ທີ່ບໍ່ສາມາດເຂົ້າເຖິງການສຶກສາດ້ານວິຊາຊີບໃນທຸກລະດັບຂອງ ໂຄງການ VELA( ເວລາ ) ໂດຍເປັນກຽດການເຂົ້າຮ່ວມຂອງ ທ່ານ ມອນສິງ ເພັດວຽງສີ ຮອງຫົວໜ້າພະແນກສຶກສາທິການ ແລະ ກິລາ ແຂວງ, ມີຜູ້ຕາງໜ້າກົມອະຊີວະ ກະຊວງສຶກສາທິການ ແລະ ກິລາ, ຫົວໜ້າ, ຄະນະອຳນວຍການໂຮງຮຽນດັ່ງກ່າວຕະຫຼອດຮອດນັກສຶກສາເຂົ້າຮ່ວມນຳ ໃນພິທີຜູ້ເຂົ້າຮ່ວມໄດ້ຮັບຟັງການຂຶ້ນຜ່ານແຜນດຳເນີນ ການຮຽນ-ການສອນ ວິຊາຊີບລະດັບຊັ້ນຕົ້ນ C1 ( ຊີ1 ) ໃນສົກຮຽນ 2015-2016 ຈາກ ທ່ານ ກົມແກ້ວ ບຸນຈະເລີນ ຜູ້ອຳນວຍການ ໂຮງຮຽນເຕັກວິຊາຊີບແບບປະສົມ ແຂວງຫົວພັນ ຜູ້ທີ່ໄດ້ຮັບທືນການສຶກສາໃນຄັ້ງນີ້ລວມມີ 71 ຄົນ, ຍິງ 24 ຄົນ ໂດຍຜ່ານການຄັດເລືອກຂອງແຕ່ລະເມືອງ 10 ເມືອງ ທົ່ວແຂວງຫົວພັນ ເຊິ່ງການຮຽນ-ການສອນ ແມ່ນຈະເລີ່ມແຕ່ວັນທີ 18 ສິງຫາ 2015 ຫາວັນທີ 18 ພະຈິກ 2015 ໂດຍແມ່ນການຈັດເປັນຮູບແບບໂມດູນ ໃນນັ້ນຈະມີ ການຮຽນ-ການສອນ ແລະ ວັດປະເມີນຜົນ ໃນແຕ່ລະໂມດູນຕາມໂຄງສ້າງຂອງຫຼັກສູດທີ່ໂຮງຮຽນວາງໄວ້ເຊິ່ງຄິດໄລ່ຕາມອັດຕາສ່ວນ 10 % ແລະ 90% ຄື: ທິດສະດີ 10 % ແລະ ພາກປະຕິບັດ 90% ວິຊາຮຽນທີເປີດ ການຮຽນ-ການສອນ ໃນຊຸດນີ້ປະກອບມີ 5 ສາຂາວິຊາຮຽນຄື: ປູກຝັງ, ລ້ຽງສັດ, ສ້ອມແປງ, ກໍ່ສ້າງ ແລະ ຕັດຫຍິບ ຈຸດປະສົງແມ່ນເພື່ອເຮັດໃຫ້ນັກຮຽນໃນກຸ່ມດ້ອຍໂອກາດທີ່ບໍ່ສາມາດເຂົ້າເຖິງການສຶກສາດ້ານວິຊາຊີບໃນທຸກລະດັບໄດ້ຮຽນຮູ້ວິຊາຊີບໃດໜຶ່ງຕາມຄວາມຕ້ອງການ, ເປັນການພັດທະນາຄຸນນະພາບ ຊີວິດການເປັນຢູ່ຂອງເຂົາເຈົ້າໃຫ້ມີຄວາມສົມບູນໃນສັງຄົມໃຫ້ຫຼຸດພົ້ນອອກຈາກຄວາມທຸກຍາກໄດ້ ແລະ ໃຫ້ສັງ ຄົມມີຄວາມສົມບູນພູນສຸກ ປະເທດຊາດມີຄວາມຈະເລີນ ນັກຮຽນວິຊາຊີບລະດັບ C1 ( ຊີ1 ) ນີ້ແຕ່ລະຄົນແມ່ນຈະໄດ້ຮັບນະໂຍບາຍເບ້ຍລ້ຽງຜູ້ລະ 800.000 ( ແປດແສນກີບ ) ກີບຕໍ່ເດືອນ, ໃນນັ້ນຫັກຄ່າໃຊ້ຈ່າຍເຂົ້າໃນການບູລະນະໂຮງຮຽນ, ຄ່ານ້ຳ, ຄ່າໄຟຟ້າຕ່າງໆຜູ້ລະ 180.000 ( ໜຶ່ງແສນແປດສິບພັນກີບ ) ໂອກາດດຽວກັນນັກສຶກສາທຸກໆຄົນໄດ້ພ້ອມກັນຂຽນຊື່ ແລະ ລົງລາຍເຊັນໃສ່ໃບລົງທະບຽນຮຽນ ຕອນທ້າຍພິທີ ທ່ານ ມອນສິງ ເພັດວຽງສີ ຮອງຫົວໜ້າພະແນກສຶກສາທິ ການ ແລະ ກິລາ ແຂວງມີຄຳເຫັນໂອ້ລົມເນັ້ນໃຫ້ນັກສຶກສາມີຄວາມຕັ້ງໃຈສຶກສາຄົ້ນຄ້ວາຮ່ຳຮຽນໃຫ້ປະສົບຜົນສຳເລັດຕາມຫຼັກສູດເພື່ອນຳເອົາຄວາມຮູ້ທີ່ໄດ້ຮຽນມາໄປພັດທະນາການດຳລົງຊີວິດຂອງຄອບຄົວ, ພັດທະນາທ້ອງຖິ່ນ, ບ້ານເກີດເມືອງນອນ ແລະ ປະເທດຊາດ ໃຫ້ມີຄວາມຮຸ່ງເຮືອງສີວິໄລຂຶ້ນໃນຕໍ່ໜ້າ.
ຂ່າວແລະພາບຈາກ: ສກຂ ຫົວພັນ