ຂປລ. ປັດຈຸບັນ ການພັດທະນາເສດຖະກິດ ຢູ່ແຂວງອັດຕະປື ໄດ້ມີການຂະຫຍາຍຕົວຢ່າງຕໍ່ເນື່ອງ ຢູ່ໃນລະດັບສະເລ່ຍ 13,82% ຕໍ່ປີ ສູງກວ່າຄາດໝາຍທີ່ວາງໄວ້, ລາຍຮັບສະເລ່ຍ ຕໍ່ຫົວຄົນ 1.770 ໂດລາສະຫະລັດຕໍ່ຄົນ/ປີ ທຽບໃສ່ປີ 2010 ເພີ່ມຂຶ້ນ 1.156 ໂດລາຕໍ່ຄົນຕໍ່ປີ ໝາຍວ່າເພີ່ມຂຶ້ນ 2 ເທົ່າ ໃນນັ້ນ ຊີວິດການເປັນຢູ່ ຂອງປະຊາຊົນບັນດາເຜົ່າພາຍໃນແຂວງ ໄດ້ຮັບການປັບປຸງດີຂຶ້ນ, ການພັດທະນາເສດຖະກິດ–ສັງຄົມ ເປັນໄປຕາມທິດຍືນຍົງ ແລະ ທັນສະໄໝ, ຫັນເປັນອຸດສາຫະກໍາ ຕາມກົນໄກເສດຖະກິດ ຕະຫລາດ.
ທ່ານ ດຣ. ນາມ ວິຍະເກດ ເຈົ້າແຂວງໆອັດຕະປື ໄດ້ແຈ້ງໃຫ້ຮູ້ເມື່ອບໍ່ດົນມານີ້ວ່າ: ການເຮັດໃຫ້ເສດຖະກິດ ຂະຫຍາຍຕົວຢ່າງຕໍ່ເນື່ອງນັ້ນ ຍ້ອນມີແນວທາງນະໂຍບາຍ ຂອງພັກ-ລັດທີ່ຖືກຕ້ອງ, ເອົາໃຈໃສ່ຢ່າງໃກ້ຊິດຕິດແທດ ຂອງຂັ້ນເທີງ ແລະ ອໍານາດການປົກຄອງແຂວງ ແຕ່ລະຂັ້ນໄດ້ເຊີດຊູ ຄວາມຮັບຜິດຊອບຂອງຕົນ ຊີ້ນໍາໆພາ, ຫັນແນວທາງ, ມະຕິ, ຄໍາສັ່ງ, ເປັນແຜນງານເຂົ້າໃນ ໂຄງການລະອຽດ ເພື່ອຈັດຕັ້ງປະຕິບັດ ຢ່າງແຖດເຖິງຕົວຈິງ ມີຄວາມສາມັກຄີເປັນປຶກແຜ່ນ ຂອງທົ່ວປວງຊົນ, ໄດ້ຮັບການສະໜັບສະໜູນ ຊ່ວຍເຫລືອຈາກບັນດາ ເພື່ອນມິດຍຸດທະສາດ ແລະ ອົງການຈັດຕັ້ງສາກົນຕະຫລອດມາ, ເພີ່ມທະວີຄວາມຮັບຜິດຊອບ ຈັດຕັ້ງປະຕິບັດແນວທາງ ປ້ອງກັນຊາດ–ປ້ອງກັນ ຄວາມສະຫງົບ ທົ່ວປວງຊົນຮອບດ້ານ, ຮັບປະກັນເຮັດໃຫ້ແຂວງ ມິສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ໂດຍພື້ນຖານ.
ທ່ານເຈົ້າແຂວງອັດຕະປື ຍັງກ່າວຕື່ມອີກວ່າ: ການພັດທະນາເສດຖະກິດ ເຖິງວ່າຈະມີຜົນສໍາເລັດ ໃນຫລາຍດ້ານແຕ່ຖ້າທຽບໃສ່ ທ່າແຮງບົ່ມຊ້ອນທີ່ມີ ແລະ ຄວາມຮຽກຮ້ອງຕ້ອງການ ໃນການພັດທະນານັ້ນ ຍັງມີບາງດ້ານທີ່ເຮັດບໍ່ໄດ້ດີເທົ່າທີ່ຄວນ ໂດຍສະເພາະແມ່ນ ການຜະລິດເປັນສິນຄ້າ ຂອງປະຊາຊົນບໍ່ທັນແຂງແຮງ, ບໍ່ທັນມີອັນເປັນພື້ນຖານ, ຕົວແບບການຜະລິດໃໝ່ຍັງມີໜ້ອຍ, ການເຕີບໂຕຂອງເສດຖະກິດພາຍໃນ ແມ່ນໄດ້ມາຈາກພື້ນຖານ ຄ່າໃຊ້ຈ່າຍການລົງທຶນພາຍໃນ ແລະ ຕ່າງປະເທດ, ການຈັດສັນຄຸ້ມຄອງການນໍາໃຊ້ ດິນຫລາຍບ່ອນຍັງສັບສົນ, ການເກັບລາຍຮັບພາສີທີ່ດິນຍັງຕໍ່າ, ການປະຕິບັດໂຄງການນອກແຜນ ຍັງມີລັກສະນະເພີ່ມ ຂຶ້ນ ເຮັດໃຫ້ເກີດມີໜີ້ສິນ, ການຄຸ້ມຄອງລາຍຮັບ-ລາຍຈ່າຍ ມີບາງດ້ານບໍ່ໄປຕາມວິໄນການເງິນ, ການຊຸກຍູ້ສົງເສີມ ສ້າງເງື່ອນໄຂໃຫ້ປະຊາຊົນ ສ້າງຖານລາຍຮັບໃໝ່ ເພື່ອເພີ່ມລາຍຮັບງົບປະມານ ບໍ່ທັນເຂັ້ມແຂງ, ການຈ່າຍງົບປະມານ ຍັງອາໄສການດຸນດ່ຽງຈາກສູນກາງຫລາຍກວ່າເຄິ່ງໜຶ່ງ ຂອງລາຍຈ່າຍທັງໝົດຂອງແຕ່ລະປີ, ການພັດທະນາບາງດ້ານ ບໍ່ທັນຕິດພັນກັບການ ປົກປັກຮັກສາປ່າໄມ້ ແລະ ສິ່ງແວດລ້ອມ, ການສ້າງ ແລະ ປັບປຸງຫົວໜ່ວຍທຸລະກິດຂອງລັດ ແລະ ເສດຖະກິດຮ່ວມມື ຂອງປະຊາຊົນບໍ່ທັນໄດ້ດີ, ການດຶງດູດການລົງທຶນ ໃສ່ບັນດາໂຄງການຈຸດສຸມ ບໍ່ທັນຫລາຍ ແລະ ບໍ່ແຂງແຮງ, ການຄຸ້ມຄອງການຈັດຕັ້ງ ປະຕິບັດໂຄງການລົງທຶນ ຂະໜາດໃຫຍ່ຫລາຍໂຄງການ ທີ່ລົງທຶນສູງແຕ່ຄຸນນະພາບຍັງຕໍ່າ ບໍ່ສົມຄູ່ກັບການລົງທຶນ.
ຂອບໃຈຂ່າວຈາກ:
