ນັກວິໄຈກ່າວວ່າ “ລະດັບຂອງທາດເຫລັກທີ່ສູງໃນສະຫມອງລະບຸວ່າເຈົ້າມີແນວໂນ້ມທີ່ຈະມີການພັດທະນາຂອງພະຍາດອັນໄຊເມີລ໌ໄດ້”
ການຄົ້ນພົບຊຶ່ງຕີພິມໃນວາລະສານທາງວິຊາການລະດັບນານາຊາດ Nature Communications ໄດ້ບອກວ່າ ມັນອາດຈະເປັນໄປໄດ້ທີ່ຈະກັກຂັງຫລືຢຸດພະຍາດນີ້ໄດ້ດ້ວຍການໃຊ້ຢາທີ່ກຳຈັດທາດເຫລັກອອກຈາກສະຫມອງ
“ພວກເຮົາຄິດວ່າທາດເຫລັກນັ້ນມີສ່ວນກ່ຽວຂ້ອງກັບການພັດທະນາຂອງພະຍາດອັນໄຊເມີລ໌” ນັກປະສາດວິທະຍາກ່າວໄວ້ ຊຶ່ງກໍຄື ດອກເຕີລ໌ Scott Ayton ຈາກ University of Melbourne
“ມັນມີຫລັກຖານທີ່ເຫັນໄດ້ແຈ້ງໃນການທົດສອບທາງການແພດວ່າການຫລຸດລະດັບທາດເຫລັກພາຍໃນສະຫມອງຈະມີຜົນກະທົບຕໍ່ຄວາມຮູ້ແລະຄວາມເຂົ້າໃຈ”
Ayton ກ່າວວ່າ “ທາດເຫລັກເລີ່ມມີຄວາມກ່ຽວຂ້ອງກັບພະຍາດອັນໄຊເມີລ໌ມາຕັ້ງແຕ່ປີ 1950 ແລະມີການສຶກສາທີ່ສະແດງໃຫ້ເຫັນວ່າລະດັບຂອງທາດເຫລັກທີ່ສູງພາຍໃນສະຫມອງນັ້ນກ່ຽວຂ້ອງກັບພະຍາດນີ້”
“ແຕ່ກໍມີການຂັດແຍ່ງກັນເປັນເວລາຍາວນານວ່າຕົກລົງມັນເປັນເລື່ອງສຳຄັນຫລືວ່າມັນເປັນເຫດການບັງເອີນ”
ໃນການທີ່ຈະຕອບຄຳຖາມນີ້ Ayton ແລະທີມວິໄຈຂອງພວກເຂົາເຮັດການສຶກສາຄວາມເຊື່ອມໂຍງລະຫວ່າງທາດເຫລັກກັບພະຍາດອັນໄຊເມີລ໌ໃນສາມກຸ່ມຂອງຄົນ ປະກອບດ້ວຍ 91 ຄົົນທີ່ມີການຮັບຮູ້ທີ່ປົກກະຕິ 144 ຄົົນທີ່ມີຄວາມຜິດປົກກະຕິທາງການຮັບຮູ້ເລັກນ້ອຍ ແລະ 67 ຄົົນທີ່ເປັນພະຍາດອັນໄຊເມີລ໌
ໃນໄລຍະທຳອິດຂອງການສຶກສາ ນັກວິໄຈໄດ້ທຳການວັດລະດັບຂອງທາດເຫລັກທີ່ຢຶດຕິດກັບໂປຕີນ ເຟີລ໌ລິຕິນ ໃນນ້ຳທີ່ຫລໍ່ລ້ຽງສະຫມອງອ້ອມຮອບສະຫມອງ ເປັນຕົວແທນໃນການວັດລະດັບຂອງທາດເຫລັກພາຍໃນສະຫມອງ
ເມື່ອຜ່ານໄປເປັນເວລາກວ່າ 7 ປີ ພວກເຂົາທຳການທົດສອບການຮັບຮູ້ແລະທຳການສະແກນສະຫມອງດ້ວຍ MRI ເພື່ອເບິ່ງການເສື່ອມຂອງສະຫມອງ
ໃນທັງສາມກຸ່ມ ກຸ່ມທີ່ມີລະດັບໂປຕີນເຟີລ໌ລິຕິນສູງຈະມີການຮັບຮູ້ທີ່ບໍ່ດີກວ່າໄລຍະເວລາກ່ອນໜ້ານີ້ ຊຶ່ງມັນເຂົ້າໄປເລັ່ງການຫົດຕົວຂອງຮິບໂປແຄມປັດ ໂດຍເປັນສ່ວນຫນຶ່ງຂອງສະຫມອງທີ່ເຮັດຫນ້າທີ່ກ່ຽວກັບຄວາມຈຳ ແລະມີແນວໂນ້ມຂອງການພັດທະນາການເປັນພະຍາດອັນໄຊເມີລ໌
ໃນການສຶກສາຕອນທຳອິດນັ້ນຕ້ອງການທີ່ຈະຄົ້ນຫາປະລິມານທາດເຫລັກທີ່ມີຜົນກະທົບຕໍ່ຄວາມສ່ຽງຂອງພະຍາດອັນໄຊເມີລ໌ Ayton ແລະທີມວິໄຈຂອງພວກເຂົາຄົ້ນພົບວ່າ ທຸກໆ 1 ນາໂນກຣາມຕໍ່ມິນລິລີດທີ່ເພີ່ມຂຶ້ນຂອງລະດັບເຟີລ໌ລິຕິນຈະສົ່ງຜົນໃຫ້ເກີດອາການເລີ່ມຕົ້ນຂອງຄວາມຈຳເສື່ອມໃນສາມເດືອນກ່ອນໜ້າ
Ayton ກ່າວວ່າ “ຄວາມເຂັ້ມຂົ້ນຂອງເຟີລ໌ລິຕິນຢ່າງນ້ອຍກໍເປັນສິ່ງໜຶ່ງທີ່ໃຊ້ໃນການຄາດເດົາການພັດທະນາຂອງພະຍາດອັນໄຊເມີລ໌ໄດ້ຊຶ່ງດີກວ່າການໃຊ້ຕົວລະບຸທາງຊີວະພາບແບບດັ່ງເດີມ ເຊັ່ນ ການໃຊ້ໂປຕີນເບຕ້າອະມິລອຍ ແລະເທົາໂປຕີນ”
ທີ່ໜ້າສົນໃຈໄປກວ່ານັ້ນ ນັກວິໄຈຍັງຄົ້ນພົບວ່າ ກຸ່ມທີ່ມີຍີນ APOE-e4 ຊຶ່ງເປັນທີ່ຮູ້ກັນດີວ່າເປັນປັດໄຈຄວາມສ່ຽງຫລັກຕໍ່ການເປັນພະຍາດອັນໄຊເມີລ໌ເມື່ອມີອາຍຸຫລາຍຂຶ້ນຈະມີລະດັບຂອງໂປຕີນເຟີລ໌ລິຕິນສູງໃນນ້ຳທີ່ຫລໍ່ລ້ຽງສະຫມອງ
ສິ່ງນີ້ເຮັດໃຫ້ເຫັນວ່າ ຍີນ APOE-e4 ອາດຈະຊ່ວຍເພີ່ມຄວາມສ່ຽງຂອງພະຍາດອັນໄຊເມີລ໌ໂດຍການເພີ່ມທາດເຫລັກໃນສະຫມອງໄດ້