ຂປລ. ເມືອງປາກກະດິງ ແຂວງບໍລິຄຳໄຊ ໃນ 1 ປີຜ່ານມາ, ມີຜູ້ຄ້າຂາຍຢາເສບຕິດ146 ຄົນ, ທຽບໃສ່ປີ 2014 ຫລຸດລົງ 16 ຄົນ, ຜູ້ເສບຢາເສບຕິດ 1.289 ຄົນ, ທຽບໃສ່ປີ 2014 ເພີ່ມຂຶ້ນ 448 ຄົນ.
ທ່ານ ຄຳໃສ ຄຳພູບານ ປະທານຄະນະກຳມະການ ຊີ້ນຳການກວດກາ ແລະ ຄວບຄຸມຢາເສບຕິດ ຂັ້ນເມືອງ ໄດ້ລາຍງານ ຕໍ່ກອງປະຊຸມ ປຶກສາຫາລືກ່ຽວກັບບັນຫາຢາເສບຕິດ ທີ່ຈັດຂຶ້ນ ເມື່ອທ້າຍເດືອນ ກໍລະກົດນີ້ ຢູ່ເມືອງປາກກະດິງ ແຂວງບໍລິຄຳໄຊ, ໂດຍມີ ທ່ານ ດຣ ສຸວັນນີ ໄຊຊະນະ ຮອງເຈົ້າແຂວງໆບໍລິຄຳໄຊ ທັງເປັນປະທານ ຄະນະກຳມະການ ກວດກາ ແລະ ຄວບຄຸມຢາເສບຕິດ ຂັ້ນແຂວງ, ທ່ານ ບຸນຍູ້ ພົມມະວົງສາ ເຈົ້າເມືອງປາກກະດິງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມນັ້ນວ່າ: ໃນ 1 ປີຜ່ານມາ ຢູ່ເມືອງປາກກະດິງ ໄດ້ເອົາໃຈໃສ່ກວດກາ ແລະ ຄວບ ຄຸມ ຢາເສບຕິດຢ່າງຕໍ່ເນື່ອງ, ເຮັດໃຫ້ສັງຄົມມີຄວາມສະຫງົບ ໂດຍພື້ນຖານ, ບັນດາປະກົດການ ຫຍໍ້ທໍ້ຕ່າງໆໃນສັງຄົມ ໄດ້ຫລຸດໜ້ອຍຖອຍລົງ ຢູ່ໃນລະດັບ ທີ່ສາມາດຄວບຄຸມໄດ້ ແລະ ໄດ້ປະກາດສ້າງບ້ານປອດ ຢາເສບຕິດ 2 ບ້ານ, ໂຮງຮຽນປອດຢາເສບຕິດ 6 ແຫ່ງ. ເມືອງປາກກະດິງ ຍັງມີກຸ່ມຄົນຈຳນວນໜຶ່ງ ທີ່ພົວພັນກັບ ຢາເສບຕິດເຊັ່ນ: ຜູ້ຄ້າຂາຍຢາເສບຕິດ 146 ຄົນ, ທຽບໃສ່ປີ 2014 ຫລຸດລົງ 16 ຄົນ, ຜູ້ເສບຢາເສບຕິດ 1.289 ຄົນ, ທຽບໃສ່ປີ 2014 ເພີ່ມຂຶ້ນ 448 ຄົນ, ຕໍ່ກັບບັນຫາດັ່ງກ່າວ ທາງເຈົ້າໜ້າທີ່ ໄດ້ຈັບຕົວຜູ້ກະທຳຜິດ ມາດຳເນີນຄະດີ ຕາມລະບຽບກົດໝາຍ ຢ່າງເຄັ່ງຄັດ.
ທ່ານ ດຣ ສຸວັນນີ ໄຊຊະນະ ກໍໄດ້ ຊີ້ນຳ ໃຫ້ມີການຕິດຕາມກວດກາ ເປົ້າໝາຍຜູ້ເສບ, ຜູ້ຂາຍຢາເສບຕິດ ຕາມບ້ານ-ໂຮງຮຽນ ທີ່ໄດ້ປະກາດສ້າງໃຫ້ປອດຢາເສບຕິດ ຢ່າງໃກ້ຊິດ ເພື່ອເຮັດໃຫ້ບັນຫາ ຢາເສບຕິດຫລຸດໜ້ອຍຖອຍລົງ ເທື່ອລະກ້າວ ແລະ ໝົດໄປຈາກສັງຄົມລາວເຮົາ.
ຂອບໃຈຂ່າວຈາກ:
