ນັບວ່າເປັນໂຊກດີທີ່ໂລກຢູ່ໃນບໍລິເວນທີ່ເໝາະກັບການດຳລົງຢູ່ຂອງສິ່ງມີຊີວິດ ໃນຂະນະທີ່ເພື່ອນບ້ານຢ່າງດາວສຸກແລະດາວອັງຄານບໍ່ໄດ້ຢູ່ໃນບໍລິເວນທີ່ເໝາະ ແມ່ນດາວສຸກຈະມີລັກສະນະທາງກາຍະພາບທີ່ຄ້າຍກັບໂລກ ແຕ່ໃນຄວາມເປັນຈິງ ບັນຢາກາດເທິງດາວສຸກຍັງຮ້ອນຈົນບໍ່ສາມາດມີສິ່ງມີຊີວິດຢູ່ໄດ້ ແລ້ວເປັນຫຍັງໂລກຈຶ່ງໂຊກດີຂະໜາດນັ້ນ
ງານວິໄຈຊິ້ນລ່າສຸດທີ່ໄດ້ຮັບການເຜີຍແຜ່ໃນວາລະສານວິຊາການ Nature Geoscience ຊີ້ແຈງວ່າ ທຳອິດເປືອກຂອງໂລກນັ້ນອຸດົມໄປດ້ວຍທາດທີ່ປ່ອຍຄວາມຮ້ອນແລະກຳມັນຕະລັງສີ ອອກມາ ເຊັ່ນ ຍູເລນຽມແລະໂພແຕດຊຽມ ຈາກນັ້ນ ເປືອກໂລກຖືກກັດກ່ອນແລະຫາຍໄປສູ່ອາວະກາດເມື່ອອຸກກາບາດຕົກລົງເຂົ້າໃສ່ໂລກໃນຍຸກທຳອິດ ປາກົດການນີ້ເອງທີ່ເຮັດໃຫ້ໂລກມີໂຄງສ້າງເລີ່ມຕົ້ນແຕກຕ່າງກັບດາວສຸກ ແລະເຮັດໃຫ້ມີອົງປະກອບເປັນຢ່າງທຸກມື້ນີ້
ນັກວິໄຈທີ່ມະຫາວິທະຍາໄລບິຕິດໂຄລຳເບຍ ແລະມະຫາວິທະຍາໄລແຄລິຟໍເນຍ ຊານຕາ ບາລ໌ບາລາ ຊີ້ແຈງວ່າ ການຫາຍໄປຂອງທາດຍູເລນຽມແລະໂພແຕດຊຽມ ຊ່ວຍບົ່ງບອກວິວັດທະນາການຂອງແຜ່ນເປືອກໂລກ ສະໜາມແມ່ເຫລັກ ແລະສະພາບອາກາດໃນເວລາຕໍ່ມາໄດ້
“ເຫດການທີ່ບອກເຖິງການກໍ່ຕົວແລະອົງປະກອບຊ່ວງທຳອິດຂອງໂລກ ເຮັດໃຫ້ເຮົາຮູ້ປະຫວັດຂອງແຜ່ນເປືອກໂລກ ສະໜາມແມ່ເຫລັກ ແລະສະພາບອາກາດຂອງໂລກໃນເວລາຕໍ່ມາ ທຸກຢ່າງທີ່ເກິດຂື້ນຕາມມາລ້ວນແລ້ວແຕ່ເຮັດໃຫ້ໂລກເປັນແບບທີ່ເຮົາມີຊີວິດຢູ່ໄດ້ໃນທຸກມື້ນີ້ ເຫດການເຫລົ່ານີ້ເອງທີ່ເຮັດໃຫ້ໂລກແຕກຕ່າງໄປຈາກດາວເຄາະດວງອື່ນໆ” ສາດສະດາຈານມາກ ເຍນລິເນັກ ແຫ່ງມະຫາວິທະຍາໄລບິຕິດໂຄລຳເບຍເຜີຍ
ການເຄື່ອນຕົວຂອງແຜ່ນເປືອກໂລກນັ້ນເຮັດໃຫ້ພື້ນຜິວຂອງໂລກປ່ຽນໄປຕະຫລອດເວລາ ຊ່ວຍເຮັດໃຫ້ຊັ້ນແມນເທີນທີ່ຢູ່ຂ້າງໃຕ້ເຢັນຕົວ ເຮັດໃຫ້ສະໜາມແມ່ເຫລັກຄົງຢູ່ໄດ້ ແລະເກີດພູເຂົາໄຟລະເບີດ ພູເຂົາໄຟທີ່ລະເບີດນີ້ກໍຊ່ວຍປ່ອຍແກ໋ດເຮືອນກະຈົກຈາກທີ່ຢູ່ໃຕ້ຜິວດວງດາວໃຫ້ຂຶ້ນມາຢູ່ເທິງຊັ້ນບັນຍາກາດ ຈົນເຮັດໃຫ້ໂລກມີລັກສະນະທີ່ແຕກຕ່າງໄປຈາກດາວເຄາະຫິນແຂງອື່ນໆ
ດາວສຸກມີລັກສະນະຄ້າຍກັບໂລກໃນເລື່ອງຂອງຂະໜາດ ຄວາມໜາແໜ້ນ ແຮງໂນ້ມຖ່ວງ ແລະສ່ວນປະກອບກໍຈິງ ແຕ່ໂລກນັ້ນມີຄວາມສະຖຽນແລະມີສະພາບອາກາດທີ່ເໝາະກັບການດຳລົງຢູ່ຂອງສິ່ງມີຊີວິດຫລາຍກວ່າ ດາວສຸກມີບັນຢາກາດທີ່ປັ່ນປ່ວນ ເຕັມໄປດ້ວຍຄາບອນໄດອອກໄຊ ໜາ ແລະ ມີອຸນຫະພູມສູງເຖິງ 470 ອົງສາ ໃນງານວິໄຈນີ້ ສາສະດາຈານເຍນລິເນັກແລະຮອງສາສະດາຈານແມັດ ແຈັກສັນແຫ່ງມະຫາວິທະຍາໄລແຄລິຟໍເນຍຊ່ວຍກັນອະທິບາຍວ່າຍ້ອນຫຍັງດາວເຄາະທັງສອງດວງຈຶ່ງມີວິວັດທະນາການທີ່ແຕກຕ່າງກັນ
“ໂລກອາດຈະຈົບເປັນແບບດາວສຸກໄດ້ງ່າຍໆເລີຍ ແຕ່ສິ່ງທີ່ເຮັດໃຫ້ສົມດຸນຂອງດາວທັງສອງດວງຕ່າງກັນກໍຄື ການຈີກຂອງເປືອກດາວນັ້ນເອງທີ່ແຕກຕ່າງກັນ”
ເມື່ອມີການກັດກ່ອນທີ່ນ້ອຍກວ່າ ດາວອັງຄານຈຶ່ງເຢັນຕົວລົງເປັນຊ່ວງໆແລະມີພູເຂົາໄຟລະເບີດເລື້ອຍຫລາຍເທື່ອ ເຮັດໃຫ້ສະພາບອາກາດປ່ຽນໄປມາເປັນເວລາຫລາຍພັນລ້ານປີ
“ເຮົາຮູ້ວ່າການກັດກ່ອນນີ້ເກີດຂຶ້ນກັບໂລກ ແລະເຮົາກໍສາມາດສະແດງໃຫ້ເຫັນວ່າຜົນກະທົບຂອງການກັດກ່ອນນີ້ເຮັດໃຫ້ໂຄງສ້າງເລີ່ມຕົ້ນຂອງໂລກເຮົາເປັນຢ່າງໃດ ແລະເຮັດໃຫ້ເກີດວິວັດທະນາການຕາມມາຢ່າງໃດ ຈົນກະທັ້ງໂລກເປັນໂລກທີ່ພິເສດຫລາຍຢ່າງທຸກມື້ນີ້”