ມະນຸດເຮົາກໍແປກທີ່ມັກຈະຈິນຕະນາການວ່າຈະເກີດຫຍັງຂຶ້ນຖ້າຫາກວ່າມີອຸກກາບາດຂະໜາດມະຫຶມາພຸ່ງເຂົ້າຊົນໂລກຂອງເຮົາ ແຕ່ຈະເກີດຫຍັງຂຶ້ນຖ້າຫາກກ້ອນຫິນນ້ຳແຂງຂະໜາດໃຫຍ່ແຍກຕົວເອງເຂົ້າຫາດວງອາທິດລະ? ກຸ່ມນັກດາລາສາດກຸ່ມໜື່ງໄດ້ໃຊ້ຄະນິດສາດເພື່ອຫາຄຳຕອບຂອງຄຳຖາມດັ່ງກ່າວ “ຂ້ອຍຂຶ້ນໄປເວົ້າກ່ຽວກັບເລື່ອງເຫລົ່ານີ້ແລະຂ້ອຍໄດ້ເອີ້ນມັນວ່າກ້ອນຫິມະຄວາມໄວເໜືອສຽງໃນນະຮົກ” John Brown ຈາກ Astronomer Royal for Scotland ກ່າວ
ຂະນະທີ່ດາວຫາງຂະໜາດນ້ອຍເຂົ້າໃກ້ດວງອາທິດນັ້ນພວກມັນກໍຈະລະເຫີຍຢ່າງວ່ອງໄວພາຍໃຕ້ພະລັງງານລັງສີທີ່ເຂ້ມຂົ້ນແລະແຕກລະລາຍອອກເປັນສ່ວນໆໃນທີ່ສຸດ ແຕ່ກໍມີດາວຫາງຂະໜາດໃຫຍ່ບາງດວງທີ່ສາມາດຜ່ານຊັ້ນນອກຂອງດວງອາທິດຫລື corona ແລະກໍຜະເຊີນກັບສິ່ງທີ່ຮ້າຍແຮງຂຶ້ນໄປອີກ ດັ່ງນັ້ນ ຖ້າຫາກວ່າແທນທີ່ດາວຫາງຈະໄປຄູດກັບພື້ນຜິວຂອງດວງອາທິດ ມັນກັບສາມາດພຸ່ງຊົນລົງໄປສູ່ຊັ້ນບັນຢາກາດຊັ້ນລຸມຂອງດວງອາທິດໄດ້ເດ ຈະເກີດຫຍັງຂຶ້ນ
ຢ່າງທຳອິດເລີຍກໍຄື ການຕົກເຂົ້າສູ່ແຮງໂນ້ມຖ່ວງຂອງດວງອາທິດນັ້ນຈະໄປເລັ່ງຄວາມໄວຂອງດາວຫາງໃຫ້ສູງຫລາຍເຖິງ 600 ກິໂລແມັດຕໍ່ວິນາທີ ແລະແຮງຕ້ານຈາກຊັ້ນບັນຢາກາດຂອງດວງອາທິດກໍຈະໄປເຮັດໃຫ້ດາວຫາງດວງນີ້ແບນຈົນຄ້າຍແຜ່ນແພນເຄັກກ່ອນທີ່ມັນຈະລະເບີດອອກແລະປົດປ່ອຍພະລັງງານສູງເທົ່າກັບການປ່ອຍມວນຂອງດວງອາທິດຫລື coronal mass ejection ເລີຍ ແລະການລະເບີດດັ່ງກ່າວອາດສາມາດເຮັດໃຫ້ເກີດການສັ່ນສະເທືອນຂອງດວງອາທິດເປັນຄື້ນໄປທົ່ວຊັ້ນບັນຢາກາດກໍເປັນໄດ້ ເຊີ່ງຈາກເທິງໂລກນັ້ນເຮົາອາດກວດຈັບການປະທຸຂອງລັງສີ UV ແລະລັງສີ X ດ້ວຍກໍໄດ້
ເພື່ອທີ່ຈະຜະເຊີນກັບຊະຕາກຳດັ່ງທີ່ວ່າມານັ້ນ ດາວຫາງທີ່ຈະພຸ່ງເຂົ້າຊົນດວງອາທິດນັ້ນຈະຕ້ອງມີນ້ຳໜັກຢ່າງນ້ອຍ 1,000,000,000 ກິໂລກ ເຊີ່ງຫລາຍເທົ່າກັບມະຫາພີລະມິດແຫ່ງກີຊາ ແລະເຖິງຢ່າງນັ້ນມັນກໍຍັງມີນ້ຳໜັກນ້ອຍກວ່າດາວຫາງ ISON ແລະ Lovejoy ເຊີ່ງເຄີຍຖາກຜິວຂອງດວງອາທິດໄປແລ້ວເມື່ອບໍ່ດົນມານີ້ ດັ່ງນັ້ນ ເຖິງແມ່ນວ່າເຫດການດັ່ງກ່າວຈະເປັນໄປໄດ້ຍາກ ແຕ່ມັນກໍຢູ່ໃນຂອບເຂດຂອງຄວາມເປັນໄປໄດ້ແນ່ນອນ