ທີ່ຜ່ານມານາຍົກລັດຖະມົນຕີ ແລະ ພາກສ່ວນກ່ຽວ ຂ້ອງໄດ້ອອກມະຕິ ແລະ ຂໍ້ຕົກລົງຕ່າງໆກ່ຽວກັບການຢັບຢັ້ງຫລຸດຜ່ອນການຕັດໄມ້ໃນທົ່ວປະເທດ, ແຕ່ມາຮອດດຽວນີ້ຍັງມີຫລາຍເຂດ ໂດຍສະເພາະທາງພາກກາງລົງໄປຫາພາກໃຕ້ການຂຸດຄົ້ນໄມ້ ແລະ ຕັດໄມ້ແບບຖືກກົດໝາຍ ແລະ ບໍ່ຖືກກົດໝາຍຍັງເກີດມີແຜ່ຫລາຍ ແລະ ບາງບ່ອນເຈົ້າໜ້າທີ່ກ່ຽວຂ້ອງກວດພົບເຫັນຕົວຈິງ, ແຕ່ການນຳໂຕຜູ້ກະທຳຜິດມາປະຕິບັດໂທດຕາມລະບຽບກົດໝາຍຍັງເຮັດ ບໍ່ໄດ້ເຂັ້ມງວດເທົ່າທີ່ຄວນ.
ຄືດັ່ງໃນອາທິດຜ່ານມາ ພະແນກກະສິກຳ ແລະ ປ່າໄມ້ແຂວງຄຳມ່ວນໄດ້ເກັບກຳຂໍ້ມູນຈາກກອງກວດກາປ່າໄມ້ຂອງແຂວງລາຍງານໃຫ້ກົມປ່າໄມ້ກະຊວງກະສິກຳ-ປ່າໄມ້ ກ່ຽວກັບຂໍ້ຂ້ອງໃຈຂອງປະຊາຊົນບ້ານໂພນພະເນົາຕໍ່ບັນຫາການຂຸດຄົ້ນໄມ້ຢ່າງຊະຊາຍຢູ່ເຂດ 3 ເມືອງນາກາຍ, ຍົມມະລາດ ແລະ ໄຊບົວທອງ, ຕໍ່ກັບບັນຫາດັ່ງກ່າວທາງກອງກວດກາປ່າໄມ້ແຂວງໄດ້ຍອມຮັບຕໍ່ການສົ່ງຂ່າວຂອງປະຊາຊົນດັ່ງກ່າວ ແລະ ຊີ້ແຈງວ່າ: ການບຸກລຸກທຳລາຍປ່າໄມ້ໃນເຂດເມືອງນາກາຍ (ເຂດຍົກຍ້າຍຈັດສັນນ້ຳເທີນ 2) ແມ່ນບຸກລຸກຖາງປ່າເຮັດໄຮເພື່ອທຳການຜະລິດລວມມີ 9 ບ້ານ, ພົນລະເມືອງ 419 ຄົນ, ຍິງ 135 ຄົນ, ເນື້ອທີ່ 4.204 ເຮັກຕາ ທາງເມືອງ ແລະ ຫ້ອງການກ່ຽວຂ້ອງສົມທົບກັບເຈົ້າໜ້າທີ່ປ່າໄມ້ໄດ້ຮຽກເອີ້ນປະຊາຊົນດັ່ງກ່າວເຂົ້າມາເຮັດບົດບັນທຶກ 16 ຄັ້ງ ພ້ອມທັງໄດ້ສຶກສາອົບຮົມ ແລະ ໃຫ້ຢຸດທຳການຜະລິດໃນເຂດດັ່ງກ່າວ, ສ່ວນການບຸກລຸກຂຸດຄົ້ນໄມ້ທຳມະຊາດຢູ່ບ້ານທົ່ງ ເມືອງຫລວງ, ບ້ານວັງຫີນ ເຂດປ່າສະຫງວນພູຫີນປູນ ມີຈຳນວນໄມ້ 356 ທ່ອນ, ບໍລິມາດ 1.205 ກວ່າແມັດກ້ອນ ໄມ້ຈຳນວນດັ່ງກ່າວທາງແຂວງ ແລະ ເມືອງໄດ້ທ້ອນໂຮມເອົາມາໄວ້ສະໜາມ II ເມືອງຍົມມະລາດ ແລະ ຂາຍແລ້ວ ແລະ ປັດຈຸບັນກຳລັງລົງເກັບກຳຂໍ້ມູນ ເພື່ອຊອກຫາຜູ້ກະທຳມາດຳເນີນຄະດີຕາມລະບຽບກົດໝາຍ. ພ້ອມນັ້ນ ຍັງໄດ້ລົງກວດກາ ແລະ ທ້ອນໂຮມຈັກຕັດໄມ້ ໂດຍສົມທົບກັບອຳນາດການປົກຄອງບ້ານເກັບກຳບັນຊີຈັກຕັດໄມ້ຢູ່ເຂດບ້ານທົ່ງ ເມືອງຫລວງ ແລະ ເຂດນາຕານ ທ້ອນໂຮມຈັກຕັດໄມ້ໄດ້ຈຳນວນ 519 ເຄື່ອງ ແລະ ໄດ້ນຳມາທ້ອນໄວ້ຢູ່ສາງປົກຄອງເມືອງ, ໄດ້ເຮັດການເຜີຍແຜ່ລະບຽບກົດໝາຍວ່າດ້ວຍປ່າໄມ້, ກົດໝາຍວ່າດ້ວຍສັດນ້ຳ ແລະ ສັດປ່າ, ແຈ້ງການກ່ຽວກັບການຄຸ້ມຄອງຈັກຕັດໄມ້ ແລະ ບັນດານິຕິກຳທີ່ກ່ຽວຂ້ອງມີ 3 ເຂດ 17 ບ້ານ ມີປະຊາຊົນເຂົ້າຮ່ວມຮັບຟັງການເຜີຍແຜ່ 1.262 ຄົນ, ຍິງ 454 ຄົນ.
ສະເພາະຢູ່ເມືອງຍົມມະລາດ ທາງກອງກວດກາປ່າໄມ້ແຂວງໄດ້ລາຍງານຕື່ມວ່າ: ການຂຸດຄົ້ນໄມ້ຢູ່ເມືອງດັ່ງກ່າວແມ່ນໄດ້ດຳເນີນໄປເພື່ອກໍ່ສ້າງພື້ນຖານໂຄງລ່າງ ເປັນຕົ້ນໂຄງການກໍ່ສ້າງເຮືອນໃຫ້ປະຊາຊົນຢູ່ບ້ານເທີດ ເຊິ່ງເປັນໂຄງການຈັດສັນຂອງລັດຖະບານ ມີເຮືອນທັງໝົດ 58 ຫລັງ ໂຄງການດັ່ງກ່າວເປັນໂຄງການສົມທົບ ໂດຍລັດຖະບານປະກອບສັງກະສີ ແລະ ທ້ອງຖິ່ນກໍນຳໃຊ້ທ່າແຮງທີ່ມີຢູ່. ດັ່ງນັ້ນ ຈຶ່ງໄດ້ນຳໃຊ້ໄມ້ຈຳນວນ 168 ທ່ອນ, ບໍລິມາດ 525 ກວ່າແມັດກ້ອນ ເປັນຊະນິດໄມ້ຄຸ້ມຄອງເພື່ອປຸກສ້າງ ປັດຈຸບັນປະຕິບັດໄດ້ 28 ຫລັງ ແລະ ມີປະຊາຊົນຂຶ້ນຢູ່ແລ້ວ 20 ຫລັງ. ຕົກມາຮອດວັນທີ 1 ມິຖຸນາ 2015 ໄດ້ເກີດມີໄພພິບັດລົມພາຍຸພັດ ເຮັດໃຫ້ເຮືອນ 26 ຫລັງຖືກເປ່ເພທັງໝົດ ທັງໄດ້ເຮັດໃຫ້ປະຊາຊົນບາດເຈັບຈຳນວນ 21 ຄົນ ແລະ ເສຍຊີວິດ 2 ຄົນ, ປະເມີນຄ່າເສຍຫາຍປະມານ 2 ກວ່າຕື້ກີບ, ສ່ວນການຖາງປ່າເຮັດໄຮ່ຂອງປະຊາຊົນເຂດບ້ານເຫລົ່າ, ບ້ານສ້າງແກ້ວ ແລະ ບ້ານທາດ ມີຈຳນວນ 5 ຕອນ ເນື້ອທີ່ 6 ເຮັກຕາ ທາງຫ້ອງການກະສິກຳ ແລະ ປ່າໄມ້ເມືອງສົມທົບກັບພາກສ່ວນກ່ຽວຂ້ອງກຳລັງດຳເນີນການສຶກສາອົບຮົມປະຊາຊົນເຂດດັ່ງກ່າວ. ນອກຈາກນີ້ ຕໍ່ບັນຫາການຕັດໄມ້ທຳລາຍປ່າຢູ່ເມືອງໄຊບົວທອງ ເຊິ່ງເປັນເມືອງທີ່ມີປ່າຜະລິດປົກຫຸ້ມຢູ່ເປັນຈຳນວນຫລາຍນັ້ນ ທາງກອງກວດກາປ່າໄມ້ໄດ້ໃຫ້ຄຳຊີ້ແຈງວ່າ: ການຕັດໄມ້ຢູ່ເຂດປ່າຜະລິດດົງກະປາດນາກະທິງແມ່ນໄດ້ຮັບຂໍ້ຕົກລົງຈາກລັດຖະບານເຫັນດີໃຫ້ແຂວງຂຸດຄົ້ນໄມ້ເພື່ອຕອບສະໜອງໃຫ້ບໍລິສັດເລື່ອງຟັດຣົງນຳເຂົ້າຜະລິດໄມ້ອັດ 223 ຕົ້ນ, ບໍລິມາດ 655 ກວ່າແມັດກ້ອນ ແລະ ມາຮອດປັດຈຸບັນປະຕິບັດໄດ້ 120 ທ່ອນ, ບໍລິມາດ 226 ກວ່າແມັດກ້ອນ.
ຕໍ່ບັນຫາທີ່ກ່າວມານັ້ນ ນັບວ່າເປັນຂໍ້ຄິດເຫັນ ແລະ ຄວາມເປັນຫ່ວງທີ່ດີຂອງປະຊາຊົນທີ່ເປັນຫູເປັນຕາຕິດຕາມເບິ່ງສະພາບການຂຸດຄົ້ນໄມ້ຢູ່ແຂວງຄຳມ່ວນ, ສ່ວນແຂວງອື່ນທີ່ຢູ່ໃກ້ຄຽງ ກໍມີປະຊາຊົນໄດ້ທັກທ້ວງບັນຫາການຕັດໄມ້ຢູ່ເຂດເມືອງຄຳເກີດ, ເມືອງວຽງທອງ ແລະ ເມືອງບໍລິຄັນ ແຂວງບໍລິຄຳໄຊ ລວມໄປເຖິງບາງເມືອງແຂວງເຊກອງ, ສາລະວັນ ແລະ ອັດຕະປື ກໍນັບວ່າມີການຕັດໄມ້ຢ່າງແຜ່ຫລາຍຢູ່. ສະນັ້ນ ພາກສ່ວນກ່ຽວຂ້ອງຕ້ອງໄດ້ເພີ່ມທະວີນຳໃຊ້ມາດຕະການຄຸ້ມຄອງ ແລະ ປົກປັກຮັກສາປ່າໄມ້ ເພື່ອສະກັດກັ້ນບັນຫາດັ່ງກ່າວໃຫ້ມີຄວາມສະຫງົບໂດຍພື້ນຖານ.
ຂອບໃຈຂ່າວຈາກ:
