ເຂົ້າໜ້າຝົນກັນແລ້ວຝົນຕົກເກືອບທຸກມື້ ອີກເລື່ອງໜຶ່ງທີ່ຄວນຄຳນຶງເຖິງຄື ການກວດເຊັກ ລົດທີ່ຮັກຂອງເຮົາ ໃຫ້ພ້ອມຮັບໜ້າຝົນ ເພື່ອຄວາມປອດໄພ ໃນການຂັບຂີ່ຊ່ວງໜ້າຝົນ ລອງມາເບິ່ງກັນວ່າໃນໜ້າຝົນແບບນີ້ ເຮົາຈະກຽມຄວາມພ້ອມຢ່າງໃດໃຫ້ປອດໄພເຖິງທີ່ໝາຍແບບຫາຍຫ່ວງ
ຖ້າຫາກຝົນຕົກໜັກ ບໍ່ຄວນເປີດໄຟສຸກເສີນ ໃນກໍລະນີທີ່ຝົນຕົກໜັກ ບໍ່ສົມຄວນທີ່ຈະເປີດໄຟສຸກເສີນ ເນື່ອງຈາກໄຟສຸກເສີນມີໄວ້ເພື່ອກໍລະນີສຸກເສີນເທົ່ານັ້ນ ແລະຈະເຮັດໃຫ້ແຍກບໍ່ອອກຫາກມີລົດທີ່ໄດ້ຮັບອຸປະຕິເຫດ ເປີດໄຟສຸກເສີນແລະຈອດຂ້າງທາງ ລວມທັງຈະບໍ່ສາມາດໃຫ້ສັນຍານເມື່ອຕ້ອງການປ່ຽນເລນ ເຮັດໃຫ້ ເກີດອຸປະຕິເຫດໄດ້ງ່າຍຈາກລົດທີ່ຕາມມາດ້ານຫລັງ ຄາດເດົາທິດທາງຂອງລົດບໍ່ໄດ້
ກວດສະພາບຢາງໃຫ້ພ້ອມ ໝັ່ນກວດສະພາບຢາງກ່ອນໃຊ້ງານສະເໝີ ແລະແນ່ໃຈວ່າເຈົ້າໄດ້ເຮັດຕາມຂັ້ນຕອນໃນການບຳລຸງຮັກສາດັ່ງຕໍ່ໄປນີ້ ເຕີມລົມຢາງໃຫ້ເໝາະສົມ ຕາມຂໍ້ແນະນຳຂອງບໍລິສັດຜະລິດລົດ ເຊີ່ງສ່ວນຫລາຍຈະມີສະຕິກເກີຂໍ້ມູນແນະນຳຄວາມດັນລົມຢາງຕິດໄວ້ບໍລິເວນ ຂອບປະຕູແລະຢູ່ໃນຄູ່ມືປະຈຳລົດ ຂະໜາດຄວາມດັນລົມຢາງທີ່ຢູ່ເທິງຢາງເປັນຕົວເລກທີ່ບອກຄວາມສາມາດໃນການຮັບແຮງດັນສູງສຸດຂອງຢາງເສັ້ນນັ້ນໆ ບໍ່ໄດ້ເປັນແຮງດັນລົມທີ່ເໝາະສົມໃນການໃຊ້ງານ ເຈົ້າຄວນກວດແຮງດັນລົມຢາງຢ່າງນ້ອຍເດືອນລະເທື່ອກວດຄວາມເລິກດອກຢາງ ຄວາມເລິກເໝາະສົມຂອງດອກຢາງທີ່ເຫລືອຢູ່ເປັນຕົວປ້ອງກັນການມື່ນ ຂອງຖະໜົນ
ຂັບໃຫ້ຊ້າລົງ ເມື່ອຝົນຕົກ ສິ່ງສົກກະປົກແລະນ້ຳມັນ ເທິງຖະໜົນຈະລວມຕົວກັນເຮັດໃຫ້ຖະໜົນມື່ນເຮັດໃຫ້ລົດເກີດການໄຖໄດ້ ທາງທີ່ດີທີ່ສຸດໃນການຫລີກລ້ຽງການມື່ນໄຫລ ຄື ການຂັບຂີ່ໃຫ້ຊ້າລົງ ການຂັບຂີ່ທີ່ຊ້າລົງເຮັດໃຫ້ດອກຢາງສາມາດສຳຜັດຖະໜົນໄດ້ຫລາຍຂຶ້ນ ເຮັດໃຫ້ການເກາະຖະໜົນດີຂຶ້ນ
ຖິ້ມໄລຍະຫ່າງຈາກລົດຄັນໜ້າ ຄວນຖິ້ມໄລຍະຫ່າງຈາກລົດຄັນໜ້າພໍສົມຄວນ ເນື່ອງຈາກໃນສະພາວະອາກາດ ທີ່ບໍ່ປົກກະຕິອາດຈະເກີດອຸບັດເຫດໄດ້ຕະຫລອດເວລາ ການຖິ້ມໄລຍະຫ່າງຈາກຄັນໜ້າຈະສາມາດເຮັດໃຫ້ເຮົາກຽມພ້ອມສຳລັບເຫດການທີ່ບໍ່ຄາດຄິດໄດ້ສະເໝີ
ກຽມການສຳລັບການເດິນທາງ ການຂັບຂີ່ເທິງຖະໜົນປຽກຕ້ອງການການຄວບຄຸມຢ່າງນຸ່ມນວນບໍ່ກະແທກ ໃນການບັງຄັບລ້ຽວ ການເລັ່ງ ແລະ ການເບຣກ ເມື່ອເຈົ້າຂັບລົດໃນມື້ຝົນຕົກ ເກີບອາດຈະປຽກແລະມື່ນອອກຈາກແປ້ນຄັນເລັ່ງ ຫລືເບຣກໄດ້ງ່າຍ ໃຫ້ເຊັດພື້ນເກີບກັບພົມຮອງພື້ນໃນລົດກ່ອນຕິດຈັກລົດ ຜູ້ຂັບລົດທຸກຄົນຄວນກວດໄຟໜ້າ ໄຟທ້າຍ ໄຟເບຣກ ແລະ ໄຟລ້ຽວວ່າສາມາດ ເຮັດວຽກໄດ້ຕາມປົກກະຕິ ເມື່ອຖະໜົນປຽກໄລຍະເບຣກຈະເພີ່ມເປັນ 3 ເທົ່າ ຈາກຖະໜົນແຫ້ງ ດັ່ງນັ້ນໃນການຂັບຂີ່ຈະຕ້ອງເວັ້ນໄລຍະຫ່າງຈາກຄັນໜ້າໃຫ້ຫລາຍຂຶ້ນ
ຮຽນຮູ້ວ່າຈະຫລີກລ້ຽງແລະຮັບມືກັບການເຫີນນ້ຳໄດ້ຢ່າງໃດ ການເຫີນນ້ຳເກີດຂຶ້ນເມື່ອປະລິມານນ້ຳທີ່ຢູ່ທີ່ໜ້າຢາງລວມຕົວກັນຫລາຍກວ່າປະລິມານນ້ຳທີ່ຢາງສາມາດໄລ່ອອກໄປໄດ້ ແຮງດັນຂອງນ້ຳເຮັດໃຫ້ຢາງຍົກຕົວສູງຂຶ້ນຈາກພື້ນຖະໜົນ ແລະໄຖຢູ່ເທິງຟິມບາງໆ ຂອງນ້ຳທີ່ຢູ່ລະຫວ່າງຢາງກັບຖະໜົນ ດັ່ງນັ້ນການພົບກັບແອ່ງນ້ຳຕາມຖະໜົນອາດຈະເກີດຂຶ້ນໄດ້ທຸກເມື່ອ ຄວນກຽມພ້ອມໂດຍການຂັບຂີ່ທັງສອງມືແລະປະຄອງພວງມາໄລໃຫ້ຫມັ້ນຄົງເມື່ອຄາດເດົາວ່າຈະພົບກັບແອ່ງນ້ຳ ເພາະການເຫີນນ້ຳຈະເຮັດໃຫ້ລົດສະບັດແລະອາດຈະປ່ຽນທິດທາງ ໄດ້ງ່າຍ
ຖ້າຝົນຕົກໜັກຫລາຍໃຫ້ຢຸດລົດ ກໍລະນີຝົນຕົກໜັກຫລາຍໆ ໃບປັດນ້ຳຝົນຈະບໍ່ສາມາດປັດນ້ຳອອກໄດ້ທັນ ຖ້າຝົນຕົກໜັກຈົນເບີ່ງທາງບໍ່ແຈ້ງຫລືເບີ່ງລົດຄັນອື່ນບໍ່ແຈ້ງໃນໄລຍະຫ່າງທີ່ປອດໄພ ໃຫ້ຈອດລົດໃນບໍລິເວນທີ່ປອດໄພ ຈົນຝົນເບົາລົງ ຫລື ຢຸດ ກໍລະນີທີ່ຕ້ອງຈອດຂ້າງທາງ ໃຫ້ຈອດລົດຫ່າງຈາກຖະໜົນໃຫ້ຫລາຍທີ່ສຸດ ແລະເປີດໄຟສຸກເສີນໄວ້ ເພື່ອເຕືອນໃຫ້ລົດທີ່ວແລ່ນມາຮູ້ວ່າມີລົດຈອດຢູ່ ຝົນທີ່ຕົກໃນຕອນທຳອິດ ຖະໜົນຈະມື່ນທີ່ສຸດ ເຮັດໃຫ້ ການຂັບຂີ່ຍາກທີ່ສຸດເພາະຂີ້ຕົມ ແລະນ້ຳມັນທີ່ຢູ່ເທິງພື້ນຜິວຈະລວມຕົວກັບນ້ຳຝົນ ກາຍເປັນຊັ້ນຜິວມື່ນໆ ເທິງພື້ນຖະໜົນ ດັ່ງນັ້ນເຈົ້າຕ້ອງເພີ່ມຄວາມລະມັດລະວັງຢ່າງຫລາຍໃນໄລຍະທີ່ຝົນຕົກ