ການຂຶ້ນທີ່ສູງປະຈຸບັນກໍມີເທກໂນໂລຍີຫລາຍຢ່າງເຂົ້າມາຊ່ວຍ ເຊັ່ນ ລິບ ຂັ້ນໄດເລື່ອນ ໄປຈົນເຖິງກະເຊົ້າໄຟຟ້າຕາມສະຖານທີ່ທ່ອງທ່ຽວຕ່າງ ໆ ແຕ່ເທກໂນໂລຍີພວກນີ້ກໍບໍ່ໄດ້ໄປຢູ່ທຸກທີ່ເທິງໂລກນີ້ ຫລາຍທີ່ກໍຍັງຕ້ອງເພິ່ງລຳແຂ່ງຂອງເຮົາຄ່ອຍໆ ໄຕ່ຕາມຂັ້ນຂຶ້ນໄປ ເຄີຍເປັນກັນບໍ່? ພໍແຕ່ເຫັນຂັ້ນໄດສູງໆ ກໍຮູ້ສຶກທໍ້ແທ້ ພໍໄດ້ຍ່າງຂຶ້ນໄປ ຄິດວ່າຢູ່ທ່າມກາງການຝຶກທະຫານເລີຍ ແລະຄວາມເໜື່ອຍທີ່ວ່ານີ້ຈະຍິ່ງເພີ່ມຂຶ້ນໄປຕາມອາຍຸອີກ
ເປັນຫຍັງເຮົາເຖິງຮູ້ສຶກເໜື່ອຍເວລາຍ່າງຂຶ້ນຂັ້ນໄດຫລືທີ່ສູງ ເຫດຜົນກໍຄື ເລື່ອງຂອງແຮງໂນ້ມຖ່ວງຂອງໂລກນັ້ນເອງ ເວລາທີ່ເຮົາຍ່າງຂຶ້ນຂັ້ນໄດ ກ້າມເນື້ອຕ່າງໆໃນຮ່າງກາຍຈະຕ້ອງເຮັດວຽກໜັກຂຶ້ນ ເພາະຕ້ອງແບກຮ່າງຝືນແຮງດຶງດູດທີ່ດູດເຂົ້າຫາໂລກເພື່ອໄປໃນທິດທາງກົງກັນຂ້າມ ເຊີ່ງການອອກແຮງທີ່ຫລາຍຂຶ້ນ ຫົວໃຈຈະສູບສີດເລືອດໄປລ້ຽງສ່ວນຕ່າງ ໆ ຂອງຮ່າງກາຍ ປອດກໍເຮັດວຽກໜັກຂຶ້ນ ເຮົາຈຶ່ງຫາຍໃຈໜັກຂຶ້ນແລະເໜື່ອຍຂຶ້ນອີກ ເຊີ່ງກົງກັນຂ້າມກັບການຍ່າງລົງຂັ້ນໄດ ເພາະເປັນທິດທາງຕາມແຮງດຶງດູດຂອງໂລກນັ້ນເອງ
ແຕ່ຄວາມເໜື່ອຍຈະລຸດລົງໄດ້ ຖ້າໃຊ້ວິທີຕາມນີ້ (ພິຈາລະນາກັນເອົາເອງວ່າຢາກນຳໄປໃຊ້ບໍ່)
ເທກນິກທີ່ວ່າ ກໍຄື ການຈັບກົ້ນຂອງຕົວເອງຄະນະຂຶ້ນຂັ້ນໄດ ຈະຊ່ວຍໃຫ້ຂຶ້ນຂັ້ນໄດໄດ້ສະບາຍຂຶ້ນ ເວົ້າງ່າຍໆ ວ່າ ບໍ່ວ່າຂັ້ນໄດຈະສູງຊ່ຳໃດ ກໍຍ່າງຂຶ້ນໄດ້ສະບາຍເລີຍແຫລະ
ທີ່ເປັນເຊັ່ນນີ້ກໍເພາະວ່າ ການຂຶ້ນຂັ້ນໄດແບບປົກກະຕິ ຈຸດສູນຖ່ວງນ້ຳໜັກຈະຍ້າຍໄປຢູ່ຮ່າງກາຍສ່ວນເທິງຫລືດ້ານໜ້າ ສັງເກດໄດ້ຈາກການໂນ້ມຕົວໄປດ້ານໜ້າຄະນະຍ່າງຂຶ້ນຂັ້ນໄດ ດັ່ງນັ້ນຖ້າເຮົາມີແຮງເສີມສົ່ງໄປທິດທາງດຽວກັບທີ່ຈຸດສູນຖ່ວງກຳລັງເຄື່ອນທີ່ໄປ ແຮງໜຸນກໍຈະຊ່ວຍໃຫ້ເຄື່ອນທີ່ໄດ້ງ່າຍແລະສະບາຍຫລາຍຂຶ້ນ ເຊີ່ງໃນທີ່ນີ້ ການຈັບກົ້ນດ້ານໜື່ງກໍຄືກັບການສົ່ງແຮງຈາກດ້ານທ້າຍໄປຍັງດ້ານຫນ້າທີ່ເປັນຈຸດສູນຖ່ວງ ຈຶ່ງເໜື່ອຍນ້ອຍກວ່າການຍ່າງຂຶ້ນຕາມປົກກະຕິນັ້ນເອງ
ແຕ່ຄືວ່າແຫລະເນາະ ການຈັບກົ້ນຕົວເອງໃນທີ່ສາທາລະນະອາດຈະເບິ່ງໜ້າອາຍຈົນເກີນໄປ ເອົາເປັນວ່າຈະເອົາເທກນິກນີ້ໄປໃຊ້ກໍເບິ່ງຄົນຮອບຂ້າງແຕ່ ເຂົາຈະໄດ້ບໍ່ຕົກໃຈ ແລະທີ່ສຳຄັນ ຖ້າຍ່າງກັບໝູ່ ກໍຢ່າຫລົງໄປຈັບກົ້ນຄົນອື່ນເດີ ງານນີ້ກົ້ນໃຜກົ້ນມັນ ຢ່າສວຍໂອກາດລວນລາມໝູ່ໄດ໋ ອິອິ