ຕອນເຊົ້າວັນທີ 22 ກໍລະກົດ 2015 ນີ້ ຢູ່ທີ່ພະແນກສຶກສາທິການ ແລະ ກິລາ ແຂວງຫົວພັນ ໄດ້ຈັດກອງປະຊຸມຮ່ວມສະຫຼຸບຕີລາຄາ 6 ໜ້າວຽກສຳຄັນຂອງການສຶກສາ ແລະ ກິລາ ລະຫວ່າງຫົວໜ້າ,ຄະນະພະແກນສຶກສາທິການ ແລະ ກິລາ ແຂວງຫົວພັນ ກັບ ຫົວໜ້າ,ຄະນະຫ້ອງການສຶກສາທິການ ແລະ ກິລາ 10 ເມືອງ ທົ່ວແຂວງຫົວພັນ ແລະ ໂຮງຮຽນອ້ອມຂ້າງແຂວງ
ພາຍໃຕ້ການເປັນປະທານ ແລະ ເຂົ້າຮ່ວມຂອງ ທ່ານ ເພີດ ມາປັນຍາ ກຳມະການພັກແຂວງ ຫົວໜ້າ ພະແນກສຶກສາທິການ ແລະ ກິລາ ແຂວງ,ຫົວໜ້າຫ້ອງການສຶກສາທິການ ແລະ ກິລາ ມາຈາກ 10 ເມືອງທົ່ວແຂວງ ແລະ ຜູ້ອຳນວຍການໂຮງຮຽນອ້ອມແຂວງເຂົ້າຮ່ວມຢ່າງຕັ້ງໜ້າ ໃນພິທີຜູ້ເຂົ້າຮ່ວມໄດ້ຮັບຟັງການຜ່ານບົດສະ ຫຼຸບ 6 ໜ້າວຽກໃຫຍ່ທີ່ສຳຄັນຂອງວຽກງານການສຶກສາ ແລະ ກິລາ ໃນແຂວງຫົວພັນ ຈາກ 6 ຂະແໜງການຢູ່ໃນ ພະແນກສຶກສາທິການ ແລະ ກິລາແຂວງ ຂຶ້ນລາຍງານບົດສະຫຼຸບຕີລາການຈັດຕັ້ງປະຕິບັດໃນສົກປີ 2014-2015
ໃນໄລຍະຜ່ານມາເຊິ່ງເຫັນໄດ້ຫຼາຍດ້ານດີຜົນງານ ແລະ ດ້ານອ່ອນຄົງຄ້າງທີ່ຈະຕ້ອງໄດ້ພ້ອມກັນບຸກບືນສືບຕໍ່ປັບປຸງແກ້ໄຂໃຫ້ດີຂຶ້ນໃນຕໍ່ໜ້າໂດຍສະເພາະແມ່ນ: ວຽກງານການຈັດຕັ້ງປະຕິບັດວຽກງານບໍລິຫານ-ການເງິນ ແລະ ວຽກກໍ່ສ້າງ ສົກປີ 2014-2015 ຜ່ານໂດຍ ທ່ານ ທອງວັນ ບຸນທະວົງ ຮອງຫົວໜ້າຂະແໜງບໍລິຫານ,ວຽກງານການຈັດຕັ້ງປະຕິບັດ 3 ຂໍ້ແຂ່ງຂັນ ຂອງກະຊວງສຶກສາທິການ ແລະ ກິລາ ຜ່ານໂດຍ ທ່ານ ສຸພາກອນ ແກ້ວຄຳພູ ຫົວໜ້າຂະແໜງ ອະນຸບານ ແລະ ປະຖົມສຶກສາ,ວຽກງານຈັດວາງຊັບຊ້ອນ,ຄັດເລືອກ,ຄຸ້ມຄອງ-ນຳໃຊ້ພະນັກງານ ສົກປີ 2014-2015 ຜ່ານໂດຍ ທ່ານ ວົງສີ ສິງດາທອງ ຫົວໜ້າຂະແໜງຈັດຕັ້ງ-ພະນັກງານ,ວຽກງານກວດກາສະພາບປະກົດການຫຍໍ້ທໍ້ຕ່າງໆຂອງຂະແໜງການສຶກສາ,ຮ່າງຄຳສັ່ງແນະນຳກ່ຽວກັບກການສະກັດກັ້ນ ແລະ ແກ້ໄຂນັກຮຽນ,ຄູ-ພະນັງານທີ່ເສບຢາເສບຕິດຢ່າງແທດເໝາະສົກປີ 2014-2015 ຜ່ານໂດຍ ທ່ານ ສີພອນ ຈັນດາວົງໄຊ ຫົວໜ້າຂະແໜງກວດກາ ແລະ ປະເມີນຜົນ,ວຽກງານວາງແຜນສ້າງກອງທຶນພັດທະນາກິລາກາຍຍະກຳທົ່ວແຂວງ ຜ່ານໂດຍ ເພັດລາວອນ ບໍລະສິງ ຫົວໜ້າຂະແໜງ ພະລະ ແລະ ສິລະປະສຶກສາ
ພ້ອມທັງທົບທວນຄືນການນຳສະເໜີການປະຕິບັດນະໂຍບາຍໂມງເກີນຄືນໃຫ້ພະນັກງານ-ຄູ ຕາມດຳລັດ 177 / ລບ ທັງນີ້ກໍ່ເພື່ອເປັນການຖອດຖອນບົດຮຽນໃນການພັດທະນາການສຶກສາ ຈາກຂັ້ນເທິງລົງສູ່ຂັ້ນທ້ອງຖິ່ນຫຼືຂັ້ນຕ່າງໆໃນຖັນແຖວການສຶກສາໃນຂອບເຂດທົ່ວປະເທດເວົ້າລວມ,ເວົ້າສະເພາະແຂວງຫົວພັນ ໃນການດຳເນີນກອງປະຊຸມຜູ້ແທນເຂົ້າຮ່ວມໄດ້ພ້ອມກັນພັດປ່ຽນກັນປະກອບຄຳເຫັນໃສ່ບົດມະຕິກອງປະຊຸມຢ່າງມີເຫດຜົນ ແລະ ເປັນບົດຮຽນໃນການວາງແຜນໃນສົກປີຕໍ່ໆໄປ
