ງ່າຍໆ ກັບວິທີກຳຈັດຝ້າກະຈົກ
ຊ່ວງທີ່ຝົນຕົກ ຫຼື ອາກາດເຢັນລົງ ຫຼາຍຄົນອາດປະສົບບັນຫາເວລາຂັບລົດແລ້ວກະຈົກໜ້າ ແລະ ກະຈົກຫຼັງເກີດຝ້າ ເຮັດໃຫ້ທັດສະນະວິໄສໃນການຂັບຂີ່ບໍ່ດີເທົ່າທີ່ຄວນ ຕ້ອງໃຊ້ຄວາມລະມັດລະວັງເປັນພິເສດ ແຕ່ພໍຈະລອງໄລ່ຝ້າໃຫ້ຫາຍໄປຈາກກະຈົກໜ້າຂອງລົດເຮົານັ້ນ ເຮົາກໍບໍ່ຮູ້ວິທີການທີ່ແນ່ນອນແລະຊັດເຈນ ເຄີຍເປັນບໍ່ ພໍຝ້າຂຶ້ນແລ້ວເຮົາພະຍາຍາມໄລ່ໃຫ້ໝົດໄປ ແຕ່ກັບໜັກກວ່າເກົ່າ ບາດນີ້ລະມືດມົວເບິ່ງຫຍັງຈົນບໍ່ເຫັນເລີຍ ມື້ນີ້ ຈະນຳເອົາສາລະວິທີການໄລ່ຝ້າແບບໄດ້ຜົນເຫັນໆ ພ້ອມທັງສາເຫດທີ່ເຮັດໃຫ້ຝ້າເກີດຂຶ້ນມາໃຫ້ຮູ້ກັນ ຈະໄດ້ຮູ້ວິທີຈັດການກັບມັນໃຫ້ເຫັນຜົນ
ຝ້າທີ່ກະຈົກເກີດຈາກອຸນຫະພູມຄວາມຊື້ນພາຍໃນແລະພາຍນອກລົດແຕກຕ່າງກັນ ຝ້າທີ່ກະຈົກດ້ານນອກ ເກີດຈາກອຸນຫະພູມພາຍນອກສູງກວ່າພາຍໃນ ແລະຝ້າທີ່ກະຈົກດ້ານໃນເກີດຈາກອຸນຫະພູມພາຍໃນລົດສູງກວ່າພາຍນອກ ວິທີແກ້ໄຂງ່າຍໆ ຄື ປັບເພີ່ມລຸດຄວາມເຢັນແອໃຫ້ເກີດຄວາມສົມດຸນກັນ ການປັບທິດທາງຊ່ອງລົມແລະຄວາມແຮງລົມ ການໃຊ້ທີ່ປັດນ້ຳຝົນ ໃຊ້ຜ້າເຊັດ ແລະການແງ້ມກະຈົກໃຫ້ອຸນຫະພູມພາຍໃນແລະພາຍນອກລົດເທົ່າກັນ ບໍ່ດົນຝ້າທີ່ເກາະເທິງກະຈົກກໍຫາຍໄປ
ການໄລ່ຝ້າກະຈົກໜ້າ ບໍ່ວ່າຈະດ້ວຍສາເຫດໃດກໍຕາມ ຜູ້ຂັບຂີ່ກໍຕ້ອງກຳຈັດຝ້ານັ້ນອອກໄປເພື່ອເພີ່ມທັດນະວິໄສໃນການເບິ່ງເຫັນ ຜູ້ຂັບຂີ່ຫຼາຍທ່ານໄດ້ເຮັດຄວາມເຂົ້າໃຈກັບຄູ່ມືການໃຊ້ລົດກ່ຽວກັບຝ້າທີ່ກະຈົກບັງລົມໜ້າ ແລະໃນຄູ່ມືການໃຊ້ລົດລະບຸໄວ້ວ່າການໄລ່ຝ້າດ້ານໃນກະຈົກບັງລົມໜ້າຄວນປະຕິບັດດັ່ງນີ້
1. ຕັ້ງຄວາມແຮງພັດລົມ ໄປທີ່ຄວາມແຮງຕາມຄວາມຕ້ອງການ ຍົກເວັ້ນ OFF (ປິດ)
2. ຕັ້ງອຸນຫະພູມ ໄປທີ່ອຸນຫະພູມຕາມຄວາມຕ້ອງການ ຍົກເວັ້ນ OFF (ປິດ)
3. ຕັ້ງຊ່ອງອາກາດເຂົ້າ ໄປທີ່ຮັບອາກາດພາຍນອກ
ການເປີດຊ່ອງຮັບອາກາດດ້ານນອກເຂົ້າມາ ເພື່ອປັບອຸນຫະພູມພາຍໃນຫ້ອງໂດຍສານ ໃຫ້ໃກ້ຄຽງກັບອຸນຫະພູມດ້ານນອກຈະຊ່ວຍລຸດການເກີດຝ້າໄດ້ ແຕ່ບາງເທື່ອອາດມີສິ່ງແປກປອມເລັດລອດເຂົ້າມາໄປຕິດທີ່ຕູ້ແອ ສົ່ງຜົນໃຫ້ຕູ້ແອອຸດຕັນແລະເກີດການເສຍຫາຍໃນທີ່ສຸດ ດັ່ງນັ້ນ ທາງຜູ້ຂັບຂີ່ຈະຕ້ອງລະມັດລະວັງຈຸດນີ້ໄວ້ນຳ ແຕ່ຖ້າຜູ້ຂັບຂີ່ໝັ່ນໃຈວ່າບໍ່ມີສິ່ງໃດທີ່ຈະມີຜົນຕາມມາກໍສາມາດກະທຳໄດ້ຕາມຂໍ້ຄວາມຂ້າງຕົ້ນ
ການໄລ່ຝ້າກະຈົກຫຼັງ ປຸ່ມໄລ່ຝ້າ ອຸປະກອນທີ່ຊ່ວຍເພີ່ມທັດສະນະວິໄສໃນການຂັບຂີ່ ເພື່ອຄວາມປອດໄພຫາຍຂຶ້ນ ເສັ້ນໄລ່ຝ້າຕິດຕັ້ງຢູ່ທີ່ກະຈົກຫຼັງ (ສະເພາະລຸ້ນທີ່ມີ) ເປັນເສັ້ນລວດທີ່ເຮັດມາຈາກທອງແດງ ໂດຍຝັງຢູ່ເທິງຜິວໜ້າຂອງກະຈົກ ເມື່ອມີກະແສໄຟຟ້າໄຫຼຜ່ານເຂົ້າໄປທີ່ຂົດລວດ ຈະກໍ່ໃຫ້ເກີດຄວາມຮ້ອນທີ່ກະຈົກ ຫຍົດນ້ຳທີ່ເກີດຂື້ນເທິງກະຈົກຈະຫາຍໄປ ເຮັດໃຫ້ເບິ່ງຜ່ານກະຈົກໄດ້ຢ່າງຊັດເຈນ
ໃນລົດແຕ່ລະລຸ້ນຈະແຕກຕ່າງກັນໄປ ລວມເຖິງສັນຍະລັກ ຫຼື ຕຳແໜ່ງຂອງສະວິດ ເຊີ່ງໃນລົດບາງລຸ້ນສາມາດທີ່ຈະຕັດການເຮັດວຽກໂດຍອັດຕະໂນມັດ ໃນກໍລະນີທີ່ກະຈົກແຫ້ງ ຫຼື ຂົດລວດຮ້ອນເກີນໄປ ແຕ່ຖ້າຫາກໃນລົດທີ່ບໍ່ມີຕົວຕັດການເຮັດວຽກ ອັນນີ້ຕ້ອງລະວັງເປັນພິເສດ ເພາະອາດເຮັດໃຫ້ກະຈົກແຕກເສຍຫາຍໄດ້ ດັ່ງນັ້ນ ເມື່ອເຫັນວ່າກະຈົກແຫ້ງ ກໍຄວນກົດສະວິດຕັດການເຮັດວຽກທັນທີ