ອົງການບໍລິຫານການບິນແລະອາວະກາດສະຫາລັດ ຫລືນາຊ່າໄດ້ເປີດເຜີຍພາບ ຂຸມດຳພະລັງງານມະຫາສານດູດກືນດາວຂະໜາດໃຫຍ່ດວງໜຶ່ງ ໃຈກາງກາແລັກຊີ່ທີ່ຢູ່ຫ່າງອອກໄປ 2.7 ພັນລ້ານປີແສງ
ໂດຍນາຊ່າ ໄດ້ເປີດເຜີຍວ່າ ພາບເຫດການດັ່ງກ່າວ ບັນທຶກໄດ້ຈາກຫໍສັງເກດການເບັນອາວະກາດຂອງນາຊ່າທີ່ມີຊື່ວ່າ ກາແລັກຊີ່ ເອໂວລູຊັ່ນ ເອັກຊ໌ພໍເລີລ໌ (Galaxy Evolution Explorer) ແລະກ້ອງໂທລະທັດ Pan-STARRS1 ທີ່ຕັ້ງຢູ່ເທິງຍອດພວກເຂົາຮາລີຄາລາ ໃນລັດຮາວາຍ ສະແດງໃຫ້ເຫັນພາບເຫດການທີ່ເກິດຂື້ນໃນກາແລັກຊີ່ທີ່ຢູ່ຫ່າງຈາກໂລກໄປກວ່າ 2.7 ລ້ານປີແສງ ເມື່ອດາວດວງໜຶ່ງທີ່ອັດແໜ້ນໄປດ້ວຍກ໊າດ ໄດ້ໂຄຈອນເຄື່ອນເຂົ້າມາຍັງພື້ນທີ່ມືດວ່າງ ແລະຖືກຂຸມດຳເຊີ່ງເປັນພະລັງງານມະຫາສານທີ່ບໍ່ມີຫຍັງສາມາດຜ່ານໄດ້ເລີຍແມ່ນກະທັ່ງແສງ ດູດກືນດາວກ໊າດດວງນີ້ເຂົ້າໄປ ຈາກນັ້ນພະລັງງານມະຫາສານໃນຂຸມດຳນີ້ ກໍແຍກກ໊າດທີ່ລວມຕົວຢ່າງຫນາແຫນ້ນໃນດາວດວງນີ້ອອກເປັນອະໜູກະຈັດກະຈາຍໄປທົ່ວ ບາງສ່ວນຖືກດູດກືນເຂົ້າສູ່ໃຈກາງ ບາງສ່ວນກໍກະເດັນ ອອກມານອກຂຸມດຳ ແລະເມື່ອກ໊າດຖືກກະເດັນອອກມາດ້ວຍແຮງມະຫາສານແລ້ວ ສົ່ງຜົນໃຫ້ກ໊າດມີອຸນຫະພູມສູງເຖິງຂີດສຸດ ເຮັດໃຫ້ເຫັນເປັນແສງສະຫວ່າງ ກາຍເປັນປາກົດການຂະໜາດມະຫຶມາ ສ່ອງສະຫວ່າງໄປທົ່ວກາແລັກຊີ່
ລາຍງານລະບຸວ່າ ຂຸມດຳແຫ່ງນີ້ ມີຂະໜາດຫລາຍກວ່າດວງອາທິດໃນລະບົບສຸລິຍະຂອງເຮົານັບລ້ານເທົ່າ ແລະຈາກການວິເຄາະລັກສະນະຂອງດວງດາວທີ່ຖືກຂຸມດຳກືນກິນ ກໍພົບວ່າ ໜ້າຈະເປັນດາວທີ່ອັດແໜ້ນດ້ວຍກ໊າດຮີລຽມ ແລະມີໄຮໂດຣເຈນຢູ່ເປັນສ່ວນນ້ອຍ ຈຶ່ງເຮັດໃຫ້ເຫັນເປັນແສງສະຫວ່າງເມື່ອເຮັດປະດິກິລິຢາກັບຂຸມດຳດັ່ງກ່າວ ຂະນະທີ່ໄລຍະເວລາການເກີດປາກົດການນີ້ນັ້ນ ນັກວິທະຍາສາດກ່າວວ່າ ແຕ່ສະເພາະຈາກວິດີໂອທີ່ເຮົາເຫັນ ກໍກິນເວລາໄປກວ່າ 139 ມື້ແລ້ວ ຄາດວ່າມັນຄົງຈະໃຊ້ເວລາອີກດົນຫລາຍ ກວ່າທຸກຢ່າງຈະກັບມາມືດດັ່ງເດີມ
ຢ່າງໃດກໍດີ ຂຸມດຳແຫ່ງນີ້ບໍ່ໄດ້ຫາກໍ່ຖືກຄົ້ນພົບ ແຕ່ຖືກຄົ້ນພົບມາດົນແລ້ວ ພຽງແຕ່ບໍ່ເຄີຍໄດ້ເຫັນປາກົດການຂຸມດຳກືນດາວ ແລະປະສິດທິພາບຂອງການທຳລາຍລ້າງຂອງຂຸມດຳແບບນີ້ມາກ່ອນ ຈຶ່ງນັບວ່າ ພາບວິດີໂອທີ່ໄດ້ເຫັນໃນເທື່ອນີ້ ຖືເປັນປາກົດການຂຸມດຳກືນດາວທີ່ຊັດເຈນທີ່ສຸດເທົ່າທີ່ເຄີຍເຫັນມາເລີຍ